ބްރިޖްގައި ސްޓަންޓް ޖައްސާ އުސޫލުން ސައިކަލް ދުއްވި މައްސަލާގައި ހިމެނޭ މީހުން ޖޫރިމަނާކުރިކަމަށް ފުލުހުން ބުނެފިއެވެ.

އާއްމުންގެ ހިތްތަނުގައި ބިރުވެރިކަން އުފެދޭގޮތަށް ސްޓަންޓް ޖައްސާ ބީދައިން ސިނަމާލެ ބްރިޖްގައި ސައިކަލް ދުއްވި މައްސަލައެއް ވަނީ ފެންމަތިވެފައެވެ. މި މައްސަލާގައި އެންމެ ފުރަތަމަ ވާހަކަދައްކަމުން ފުލުހުން ބުނެފައިވަނީ، އެމީހުން ދުއްވި ސައިކަލްތައް ފުލުހުން ޓޯކޮށްފައިވާކަމަށެވެ. މިވާހަކަ މީޑިއާތަކުން ރިޕޯޓްކުރުމާ ގުޅިގެން ގިނަ އަދަދެއްގެ ފަރާތްތަކުން ވަނީ އުޅަނދު ދުއްވި މީހުންނަށް ފިޔަވަޅެއް ނާލައި ސައިކަލްތައް ޓޯކުރިގޮތާމެދު ސުވާލު އުފައްދައި އެކަމުގެ ކަންބޮޑުވުން ފާޅުކޮށްފައެވެ. 

އާއްމުން ސޯޝަލް މީޑިއާގައި ކަންބޮޑުވުން ފާޅުކުރަން ފެށިތާ ގާތްގަނޑަކަށް ފަސް ގަޑިއިރުފަހުން ފުލުހުން ބުނެފައިވަނީ، ސްޓަންޓް ޖެއްސި މީހުން ޖޫރިމަނާ ކޮށްފައިވާކަމަށެވެ. އެގޮތުން ސައިކަލް ދުއްވި ފަރާތްތަކުގެ ތެރެއިން ދެ މީހަކު 2,000 ރުފިޔާއިން ޖޫރިމަނާކޮށްފައިވާއިރު، ތަކުރާރުކޮށް ނުރައްކާތެރިކޮށް ދުއްވުމުގެ ސަބަބުން އަނެއް ފަރާތް 4,000 ރުފިޔާއިން ޖޫރިމަނާ ކޮށްފައިވާކަމަށް ފުލުހުން ބުންޏެވެ.

ސިނަމާލެ ބްރިޖްގައި ސްޓަންޓް ޖެއްސި މައްސަލާގައި ހިމެނޭ ސައިކަލްތައް ވަނީ 30 ދުވަހަށް ހިފަހައްޓާފައެވެ.