2015ވަނަ އަހަރުގެ މޭޑޭގައި ބޭއްވުނު މުޒާހަރާގައި ހިނގި ހަމަނުޖެހުންތަކުގެ ތެރެއިން ފުލުހަކަށް ހަމަލާދިންކަމުގެ ކުށް ސާބިތުވެ ޖަލަށްލާފައި ހުއްޓާ ނިޔާވި ގ.ކީމާ އަލްމަރުހޫމް އަބްދުﷲ ރަޝީދުގެ މަރުގެ ވާހަކަ ދައްކަވަމުން ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖު ކީރިތި ކުރައްވައިފިއެވެ.
މިއަދުގެ ރައްޔިތުންގެ މަޖިލީހުގައި ޖަލްސާގައި މަޖިލީހުގެ ތަޅުމަށް ހުށައެޅުނު މިނިވަން މުއައްސަސާތަކުގެ ކޮމިޓީ ރިޕޯޓާއި މެދު ވާހަކަދައްކަވަމުން މެންބަރު ސިރާޖު ވިދާޅުވީ މިނިވަން މުއައްސަސާތަކުން އިހުމާލުވާ ވާހަކައާއި އެފަދަ ފަރާތްތަކާއި މެދު ފިޔަވަޅު އަޅަންޖެހޭނެކަމަށް ތަކުރާރުކޮށް ވާހަކަދެކެވޭ ކަމަށެވެ. ނަމަވެސް އެފަރާތްތަކަށް ލިބޭ ހަމައެކަނި އަދަބަކީ މަގާމުން ވަކިކުރުން ކަމަށާއި، އެއީ އެންމެ ހަމަޖެހޭ ގޮތްކަމަށް ދެކެވަޑައި ނުގަންނަވާ ކަމަށެވެ.
އެގޮތުން ގާނޫނުގައި އަދާކުރަން މަތިކޮށްފައިވާ ޒިންމާއެއް އަދާނުކުރުމަކީ ޖިނާއީ ކުށެއްކަމަށް މެންބަރު ސިރާޖު ވިދާޅުވިއެވެ.
އެބޭފުޅާ ވިދާޅުވީ މޭޑޭގައި ފުލުހެއްގެ ގައިގައި ޖެހިކަމުގެ ކުށް ސާބިތުވެ ޖަލަށްލި މަރުހޫމް ރަޝީދު ޖަލުގައި އަނިޔާވެރިކޮށް އަޅާނުލާ ބޭއްވުމުގެ ސަބަބުން ނިޔާވީ ވަރަށް ގިނަ ބައެއްގެ އިހުމާލުންކަމަށެވެ. އަދި އެފަދަ ހާލަތެއްގައި އަދަބެއްގެ ގޮތުން މަގާމުން ވަކިކޮށް މުސާރަ ކަނޑާލުމަކީ އެންމެ އިންސާފުވެރި ގޮތްކަމަށް ދެކެވަޑައިނުގަންނަވާކަމަށްވެސް ސިރާޖު ވިދާޅުވިއެވެ.
މެންބަރު ސިރާޖު އިތުރަށް ވިދާޅުވީ ފުލުހެއްގެ ގައިގައި ޖެހުމުން ލިބޭ އަނިޔާއަށްވުރެ، މީހަކު ދުނިޔެއިން އަލްވަދާއު ކިޔުމުން އެ ލިބޭ ގެއްލުން މާބޮޑުކަމަށް ގަބޫލުފުޅު ކުރެއްވޭ ކަމަށެވެ.
"ގައިމުވެސް އަޅުގަނޑަށް ވަރަށް އަސަރުކުރާ ވާހަކައެއް އަބްދުﷲ ރަޝީދުގެ ވާހަކަ ދެއްކުމަކީ"، މިހެން ވިދާޅުވެ، މެންބަރު ސިރާޖު ވަނީ ކީރިތިކުރައްވަން ފައްޓަވައި، މަރުހޫމްގެ ވަކީލެއްގެ ގޮތުން ސިރާޖް ވަޑައިގެންނެވިކަމަށް ހާމަކުރެއްވިއެވެ.
Advertisement
This content is created and paid for by advertisers and does not involve Voice Journalists
