ކުރީގެ ރައީސް އަބްދުﷲ ޔާމީންގެ ސަރުކާރުގައި ހުޅުމާލޭގެ ދެވަނަ ފިޔަވަހީގައި ތަރައްގީކުރަން ފެށި ހިޔާ މަޝްރޫއުގެ ދަށުން ދޫކުރާ އެއް ކޮޓަރި އެޕާޓްމެންޓްތަކުގެ ކުރެހުމެއް ހާމަވެއްޖެއެވެ.

މި ކުރެހުން ހާމަކޮށްފައިވަނީ ހިޔާ މަޝްރޫއުއާާއި ބެހޭ މައުލޫމާތުތައް ގެނެސްދިނުމަށް ހަދާފައިވާ "ކޮތަރު ކޮށި ކޮމިއުނިޓީ"، ކިޔާ ވައިބަރ ގްރޫޕެއްގައެވެ. މިއީ މި މަޝްރޫއުއަށް އެޗްޑީސީގެ ފަރާތުން ހުއްދަ ދިން ކުރެހުމެވެ.

މި ކުރެހުން ހާމަކުރަމުން ވައިބަރ ގްރޫޕް ހިންގުމުގައި އިސްކޮށް ހަރަކާތްތެރިވާ މޯލްޑިވްސް-ޗައިނާ ޓްރޭޑް އެންޑް ކަލްޗަރަލް އޯގަނައިޒޭޝަންގެ ނައިބު ރައީސް މިދުއަމް ސައުދު ބުނީ އެއް ކޮޓަރީގެ އެޕާޓްމެންޓްތައް ހުންނާނީ، ހިޔާ މަޝްރޫއުގެ ދަށުން ސަރުކާރުގެ ކުންފުނިތަކުން ހަދާ ފްލެޓްތަކުގެ ފުރަތަމަ ފަންގިފިލާއިން ފެށިގެން ހަތަރުވަނަ ފަންގިފިލާއާއި ހަމައަށެވެ.

މި ފްލެޓްތައް އެޅުމަށް ނަގަންޖެހޭ ލޯނުތައް ނެގުމަށް ސަވަރިން ގެރެންޓީ ދީފައިވަނީ ސަރުކާރުގެ ފަރާތުންނެވެ. 2018 ވަނަ އަހަރުގެ ތެރޭގައި މިފަދައިން ދިހަ ޓަވަރުގެ މަަސައްކަތް ފެށިފައިވާއިރު، ކޮންމެ ޓަވަރަކުން ހަތަރު ފަންގިފިލާ ސަރުކާރަށް ދޭންޖެހެއެވެ. މިދުއަމް ބުނިގޮތުގައި ސަރުކާރުން އެ ހަތަރު ފަންގިފިލާގެ އެޕާޓްމެންޓްތައް ދޭން ހަމަޖައްސާފައިވަނީ ހިޔާ މަޝްރޫއުގެ އިޖްތިމާއީ ގެދޮރުވެރިކަމުގެ ބައިގެ އެއް ކޮޓަރި އެޕާޓްމެންޓާއި ކުރިމަތިލި ފަރާތްތަކަށެވެ. 

މި ޓަވަރުތަކުން ދޫކުރާ އެއް ކޮޓަރި އެޕާޓްމެންޓްތަކުގެ ބޮޑުމިނަކީ 450 އަކަފޫޓެވެ. ކޮންމެ ޔުނިޓެއްގެ އަގަކީ 38،000 ޑޮލަރެވެ. 

މި އެޕާޓްމެންޓްތައް ދޫކުރަން އޮތީ ފިނިޝިންގގެ މަސައްކަތް ނިންމައި، އެއާ ކޮންޑިޝަންވެސް ހަރުކުރުމަށް ފަހުގައެވެ.

މިސަރުކާރުން މިހާތަނަށްވެސް އެއްކޮޓަރީގެ ފްލެޓްތަކާ ބެހޭގޮތުން މައުލޫމާތު ދީފައިނުވެއެވެ. "ވޮއިސް" ގެ ފަރާތުން ސަރުކާރުގެ މުއައްސަސާތަކުން އެހެންކަމުން މި މައުލޫމާތު ހޯދުމަށް އިންފޮމޭޝަން ކޮމިޝަން މެދުވެރިކޮށް މަސައްކަތް ކުރުމަށް އަންނަނީ ތައްޔާރުވަމުންނެވެ.