ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އާއި އަނބިކަނބަލުން ސާޖިދާ މުޙައްމަދު ހައްޖުގެ މަތިވެރި އަޅުކަން އަދާކުރެއްވުމަށް ސަޢުދީއަރަބިއްޔާއަށް ކުރެއްވި ދަތުރުފުޅު ނިންމަވާލައްވައިފިއެވެ.

މިއަދު އޮތް ބައްދަލްވުމުގައި ދެ ގައުމުގެ ގުޅުން އިތުރަށް ބަދަހި ކުރެއްވުމާއި ގުޅޭގޮތުން ދެ ލީޑަރުން މަޝްވަރާ ކުރެއްވި ކަމަށް ސަރުކާރުން ބުނެ އެވެ.

ރައީސުލްޖުމްހޫރިއްޔާގެ ރަސްމީ އެކްސް އެކައުންޓުން، ޢަރަބި ބަހުން ކުރެއްވި ޕޯސްޓެއްގައި، ސަޢޫދީ ޢަރަބިއްޔާގެ މި އޯގާތެރިކަން އެމަނިކުފާނު ސިފަކުރައްވާފައިވަނީ، ހިތަށްވެސް ގެންނަންދަތި، މަތިވެރި ޚިދުމަތްތަކެއްގެ ގޮތުގައެވެ.

ސައުދީ ސަރުކާރުން މިއަދު ވަނީ ހައްޖުގެ އަޅުކަމަށް އެ ގައުމަށް ޖަމާވި މީހުންގެ ތަފާސް ހިސާބުތައް އާންމުކޮށްފަ އެވެ. މި އަހަރު ޙައްޖުގެ އަޅުކަން 171 ގައުމަކުން 1,673,230 މީހުން ޖަމާވި ކަަމަށް ބުނެފައިވެ އެވެ.

"އަޅުގަނޑުގެ ދުއާއަކީ ބަރަކާތްތެރި މި ހައްޖު ދުވަހުގެ ހެޔޮ ދަރުމައާ ސަވާބު އަޅުގަނޑުމެން އެންމެންނަށް މިންވަރު ކުރެއްވުން," ރައީސްގެ މެސެޖުގައި ދުއާ ކުރެއްވި އެވެ.

ޙައްޖު މަހުގެ ފުރަތަމަ ދިހަ ދުވަހަކީ ހެޔޮ ކަމާއި ބަރަކާތުން ފުރިގެންވާ ދުވަސް ތަކެކެވެ. އެދުވަސް ތަކުގެ ތެރޭގައި ހިމެނޭ އެންމެ މާތް ދުވަހަކީ ޙައްޖު ދުވަސް ނުވަތަ ޢަރަފާތު ދުވަހެވެ. އެ ދުވަހު ޢަރަފާތުގެ ބިމަށް ޖަމާވެފައިވާ ޙައްޖުވެރިންގެ ގިނަގުނަ ފާފަތައް މާތް الله ފުއްސަވައިދެއްވައެވެ. އެއީ ފާފަފުއްސެވުމާއި، ޢަފޫކުރެއްވުމުގެ ދުވަހެވެ. ނަރަކައިން ދިންނަވައި، މުއްތިކުރެއްވުމުގެ ދުވަހެވެ.

މިއަހަރު ހައްޖަށް ދިޔަ ދިވެހި ހުރިހާ ޙައްޖާޖީންނަށް ޢަރަފާތު ބިމަށް ދެވިފައިވާ ކަމަށާ، ޙައްޖާޖީންގެ ޙާލު ރަނގަޅަށް ކަމަށް ދިވެހި ހައްޖު މިޝަނުން ބުނެފިއެވެ.