މިއަހަރު ހައްޖަށް ދިޔަ ދިވެހި ހުރިހާ ޙައްޖާޖީންނަށް ޢަރަފާތު ބިމަށް ދެވިފައިވާ ކަމަށާ، ޙައްޖާޖީންގެ ޙާލު ރަނގަޅަށް ކަމަށް ދިވެހި ހައްޖު މިޝަނުން ބުނެފިއެވެ.

ދިވެހި ހައްޖުވެރިން ޢަރަފާތު ބިމަށް ދިޔުމަށް ދަތުރު ފެށީ ރޭ މައްކާ ގަޑިން 21:30 ގައެވެ. އަދި ފަތިހު 3:30 ކަންހާއިރު އެންމެނަށްވެސް ޢަރަފާތު ބިމަށް އާދެވިފައިވާ ކަމަށް ޙައްޖު ކޯޕަރޭޝަންގެ އެމްޑީ ޝަކީލް ވަނީ ވިދާޅުވެފައެވެ.

މިއަދު ހުރިހާ ހާޖީން އަރަފާތު ޓެންޓުތަކުގައި މަޑުކޮށްލައިގެން ދުޢާކޮށް ޒިކުރުކުރަމާއި އަޅުކަމުގައި މަސްއޫލުވުމުގައި އެތައް ގަޑިއިރެއްވަންދެން ދެމިތިބޭނެއެވެ. 

ހައްޖާޖީން އަރަފާތު ބިމަށް ޖަމާވެފައުވާއިރު، ސަޢުދީ ހައްޖު އަދި އުމްރާގެ މިނިސްޓަރު ތައުފީޤް އަލް-ރަބީއާ ވަނީ އަރަފާތު ބިމުގެ ހޫނުމިން 40 ޑިގްރީއިން މައްޗަށް ދާނެ ކަމަށް ލަފާކޮށް ހޫނު ވަގުތު ތަކުގައި ޓެންޓުތަކުގައި މަޑު ކުރުމަށް އިލްތިމާސް ކޮށްފައެވެ. 

އެގޮތުން، މިނިސްޓަރު ވިދާޅުވި ގޮތުގައި، ހެނދުނު 10:00 އިން ހަވީރު 4:00 އަށް ހައްޖާޖީން އެމީހުންގެ ކޭމްޕްތަކުގައި މަޑުކުރުމަކީ ވަރަށް މުހިންމު ކަމެކެވެ. މިއީ ހޫނުގަދަވުމުގެ ސަބަބުން ދިމާވެދާނެ ނުރައްކާތެރި ހާލަތްތަކުން ސަލާމަތްވުމަށް ކުރެވިދާނެ ކަމެއް ކަމުގައި އޭނާ ވިދާޅުވިއެވެ. އަދި އެވަގުތު ތަކުގައި ބޭރުގައި ހިނގާ އުޅުމަކީ ހައްޖާޖީންގެ ސަލާމަތަށް ނުރައްކާވެދާނެ ކަމެއްކަމަށްވެސް އޭނާ އިންޒާރު ދެއްވިއެވެ.

މީގެ އިތުރުން، އަރަފާތުން މުޒްދަލިފާއަށް ދިއުމަށް ކަނޑައެޅިފައިވާ ދަތުރުފަތުރުގެ ވަސީލަތްތައް ބޭނުންކުރުމަށް މިނިސްޓަރު އިރުޝާދު ދެއްވިއެވެ. އަދި، ހައްޖާޖީންގެ ހަރަކާތްތަކާ ގުޅޭ ގަވާއިދުތަކަށް ފުރިހަމައަށް ތަބާވުމަށްވެސް  އަންގަވާފައިވެއެވެ.

ހަމައެހެންމެ، މިނިސްޓަރު އަލް-ރަބީއާ ވަނީ ނުސުކް ކާޑުގެ މުހިންމުކަން ފާހަގަކުރައްވައި، މި ކާޑަކީ މަސްޖިދުލް ހަރާމަށާއި، މަޝްއަރުލް ހަރާމްތަކަށާއި، އާންމު ދަތުރުފަތުރުގެ ވަސީލަތްތަކަށް ވަދެނިކުމެ އުޅުމަށް ކޮންމެހެން ބޭނުންވާނެ އެއްޗެއްކަމުގައި ވިދާޅުވެފައެވެ. އަދި މިއަހަރު ހައްޖު ހުއްދަ ޗެކްކުރުން އިތުރަށް ހަރުދަނާކުރެވޭނެ ކަމަށްވެސް ވިދާޅުވެފައިވެއެވެ.