މާލީ ހާލަތުދަށްވެ ލަންކާގެ އާއިލާތަކުން ކުދިންނަށް ކާންދޭ ވަރު މަދުކޮށްފި

އަވައްޓެރި ސްރީލަންކާގައި މާލީ ފުއްދުންތެރިކަން ކުޑަވެ އާއިލާތަކުން އެއާއިލާތަކުގެ ކުޑަ ކުދިނަށް ކާންދޭ މިންވަރު މަދުކޮށްފިއެވެ.

ސްރީލަންކާގެ މިކުދިން ގެއްލުމުގެ ކުރިން މިކަމަށް, ސްރީލަންކާގެ ސަރުކާރާއި ބައިނަލްއަޤްވާމީ ފަރާތްތަކުން އެހީތެރިވުމަށް, ކުޑަކުދިންގެ ހައްޤުތަކަށް ވަކާލާތުކުރާ ޗައިލްޑް ރައިޓްސް ޗެރިޓީ އިން ވަނީ ގޮވާލައިފައެވެ.

2021 ގެ ފަހުކޮޅުން ފެށިގެން ލަންކާއަށް ވަނީ މާލީ ދަތިކަން ކުރިމަތިވެފައެވެ. އެކަމުގެ ސަބަބުން އެޤައުމުގެ ރައްޔިތުން ދަނީ އެތައް ތަކުލީފުތަކެއް އުފުލަމުންނެވެ.

22 މިލިއަން މީހުންގެ އާބާދީއެއް ދިރިއުޅޭ ލަންކާއިން ވަނީ އައިއެމްއެފްގެ މާލީ އެހީއަށް އެދިފައެވެ. ފާއިތުވި އޭޕްރީލް މަހު 46 ބިލިއަން ޑޮލަރުގެ ލޯނެއް ލަންކާއަށް އައިއެމްއެފްއިން ވަނީ ދޫކޮށްފައެވެ. އެލޯނު ދެއްކުމަށްވެސް ލަންކާ ސަރުކާރުން ވަނީ ނުކުޅެދިފައެވެ.

"މީގެ އަހަރެއްހާ ދުވަސް ކުރިން ސްރީލަންކާ ސަރުކާރުވަނީ ދަރަނި ދެއްކުމަށް ނުކުޅެދިފަ، އިންފްލޭޝަން ރޭޓު ދަނީ މައްޗަށް، ކާބޯތަކެއްޗާއި، ބޭސް، އަދި ތެލުގެ ދަތިކަން ވަނީ ކުރިމަތިވެފައި، ރަނގަޅު އާމްދަނީ އެއްލިބޭ ވަޒީފާއެއް ނެތުމުގެ ސަބަބުން އާއިލާތަކަށް ދަނީ ހަރަދުތައް ނުހިފެހެއްޓޭ ވަރުވަމުން" ޗެރިޓީ އިން ބުނެފައިވެއެވެ.

ސްރީލަންކާގެ ގޭބިސީތަކުން ދެބައިކުޅަ އެއްބައި ގޭބިސީތަކުން ހަރަދު ކުޑަކުރުމަށް ކުދިންނަށް ކާންދޭ މިންވަރު ވަނީ މަދުކޮށްފައި، 2،300 އެއްހާ ގޭބިސީ ތަކުގައި ކުދިންނަށް ކާންދިނުމަށް ބޮޑެތިމީހުން ތިބެނީ ރަނގަޅަށް ނުކައި ކަމަށް ޗެރިޓީ އިން ބުނެފައިވެއެވެ.

ކޮންމެ 10 ގޭބިސީއަކުން 9 ގޭބިސީ އިން ބުނެފައިވަނީ ކުދިންނަށް ފައިދާހުރި ކާނާއެއް ދެވޭނެ ކަމުގެ ގެރެންޓީއެއް ނެތްކަމަށްބުނެފައެވެ.

"ދަ ސޭވް ޗިލްޑްރެން" ރިޕޯޓު ޗެރިޓީ އިން މިނެރުނީ ލަންކާގެ މަސައްކަތް ތެރިން ސަރުކާރާއި ދެކޮޅަށް މުޒާހަރާ ކުރިތާ އެއްދުވަސް ފަހުންނެވެ. ލަންކާގެ އެތައްހާސް މަސައްކަތް ތެރިންނެއް އެމީހުންގެ އަސާސީ ޚިދްމަތައް މެދުކަނޑާލައި މުޒާހަރާ ކޮށްފައިވަނީ ޤައުމު ދަރަނިވެފައިވާ އިރު ސަރުކާރުން ޢަމަލު ކުރަމުންދާގޮތާއި މެދު ހިތްހަމަ ނުޖެހިގެނެވެ.