އެމްޑީޕީ އާ ގުޅުމަށް އެދި ރައީސް ނަޝީދު އަޅުގަނޑަށް މެސެޖުކުރި؛ ގައުމީ މަޖިލީހުގެ %99 އެކަމާ ދެކޮޅު: ރައީސް

އެމްޑީޕީގެ ގައުމީ މަޖިލީހުގެ 99 އިންސައްތަ މެންބަރުން، އެ ޕާޓީގެ ކުރީގެ ރައީސް މުހައްމަދު ނަޝީދު ޕާޓީއާއި އަލުން ގުޅުމާއި ދެކޮޅު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު އެމްޑީޕީއާ ގުޅުމާއިމެދު ދެކެލައްވާ ގޮތާމެދު ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ، އެމްޑީޕީއާ ގުޅިވަޑައިގަންނަން ބޭނުންވާކަން ހާމަކޮށް ރައީސް ނަޝީދުގެ މެސެޖެއް ލިބިވަޑައިގެންނެވި ކަމަށެވެ. އަދި ރައީސް ޞާލިހް ވިދާޅުވީ އެކަން ކުރާނީ ޕާޓީގެ އުސޫލުތަކާ އެއްގޮތަށް ކަމަށެވެ.

50 ޕަސެންޓް ލިބިވަޑައިގެންފިއްޔާ ތިމަންނަ (ނަޝީދު) އެމްޑީޕީއާ ގުޅިވަޑައިގަންނަވާނަމޭ. އަޅުގަނޑަށްވެސް އެބައިން މެސެޖު ކޮށްފައި. ތިމަންނަ މިހުރީ ތައްޔާރަށޭ. އަޅުގަނޑު ދަންނަވާނީ އެމްޑީޕީއަށް މެންބަރުން ވަނުމުގައި ކަން ކުރަންވާގޮތް އުސޫލު އެބައޮތް. އެއީ ވަކި ގުނަވަނެއްގެ ވަކި ވަރެއްގެ ތާއީދު އޮވެގެން ކުރަން ކުރާ ކަމެއް ނޫން. އަދި ޕާޓީއަށް ވަންނަން އެދިފައި ފޯމު ފުރުއްވާފައި ފޮނުވީމާ ޕާޓީގެ އެ އޮންނާ އުސޫލު ތަކުގެ ތެރެއިން އެއީ އަޅުގަނޑުމެންގެ ޕާޓީއަށް ވައްދަން ބޭފުޅެއް ކަމަށް އެ ގުނަވަނަށް ފެނިއްޖެއްޔާ އެ އޮންނަ އުސޫލު ތެރެއިން އެކަން ކުރިއަށް ދާނެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މިއާއެކު ރައީސް ޞާލިހް ވިދާޅުވީ އެމަނިކުފާނު ނަޝީދަށް ތާއީދު ކުރުމާއި ނުކުރުމާއި މެދު ގޮތެއް އަދި ވިސްނަވާފައި ނުވާ ކަމަށާ، އެމަނިކުފާނު އަބަދުވެސް މަސައްކަތް ކުރައްވާނީ އެމްޑީޕީ އަށާއި އެޕާޓީގެ މުސްތަގުބަލަށް ފައިދާ ހުރި ގޮތަށް ކަމަށެވެ.

މީގެ އިތުރުން އެމްޑީޕީގެ ގައުމީ މަޖިލީހުގެ މެންބަރުންގެ ތެރެއިން 99 އިންސައްތަ މެންބަރުންނަށް ރައީސް ނަޝީދު އެޕާޓީއާއި ގުޅިވަޑައިގަންނަވަން ނުފެންނަ ކަމަށްވެސް ރައީސް ޞާލިހު ވިދާޅުވިއެވެ.

އަޅުގަނޑު ވެސް ގައުމީ މަޖިލީހުގައި އިންނަން. ގައުމީ މަޖިލީހުގެ ރޫހު ހުރިގޮތް އަޅުގަނޑަށް ފެނޭ. ގާތްގަނޑަކަށް އަޅުގަނޑަށް ދެންނެވިދާނެ 99 ޕަސެންޓް މިހާތަނަށް ހަމަ ނޫނެކޭ ބުނަމުން އަންނަނީ. ބަރުލަމާނީ އަށްވެސް ހަމަ ނޫނެކޭ ބުނަމުން އަންނަނީ

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

އެމްޑީޕީގެ ރިޔާސީ ޕްރައިމަރީން ލިބުނު ނާކާމިޔާބީ އާއެކު ފިކުރެއްގެ ދިރުން ނަމުގައި އެމްޑީޕީގެ ތެރޭގައި ގޮތްޕެއް އުފެއްދެވުމަށްފަހު ފަހުން ދަ ޑިމޮކްރެޓްސް ނަމުގައި ސިޔާސީ ޕާޓީއެއް އުފައްދަވައި އެ ޕާޓީއަށް ރައީސް ނަޝީދު ވަނީ ގުޅިވަޑައިގެންފައެވެ. އަދި އެ ގުޅިވަޑައިގެންނެވި ރޭގައި އެމަނިކުފާނު ވަނީ އެމްޑީޕީ ރޫޅާލާނެ ކަމަށް ވިދާޅުވެފައެވެ.