"އެދެނީ ތިޖޫރިތަކަށް ވީ ގޮތް ބަލަން، މި ދިނީ ފިލައިގެން ނުދާނެކަމުގެ ޔަގީންކަން"

ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ)ގެ މެނޭޖިން ޑިރެކްޓާ މޫސާ އަލިމަނިކު (މޫކޭ) އަށް ކުރެވޭ ވައްކަމާއި ކޮރަޕްޝަންގެ ތުހުމަތުތައް ވެރިކަމާއި ހަވާލުވުމަށްފަހު ބެއްލެވުމުގެ ފުރުސަތު ލިބިވަޑައިގަންނަވާނެ ކަމަށާއި، ޔަގީނުންވެސް ފިލައިގެން ނުދާނެކަމަށް އެބޭފުޅާ ވިދާޅުވެއްޖެ އެވެ.

ރިޔާސީ އިންތިޚާބުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބަލިވުމާއެކު އާ ސަރުކާރު ހަވާލުވަންދެން މި އޮންނަ އިންތިޤާލީ މުއްދަތުގެ ތެރޭގައި ރައީސް ޞާލިހުގެ ސަރުކާރުގައި ވައްކަމާއި ކޮރަޕްޝަނާއި ގުޅޭ ލިޔުންތަކަށް ބަދަލުގެނައުމާއި ނައްތާލުމުގެ ފުރުސަތު ދީގެން ނުވާނެކަމަށް ޑރ ޖަމީލު ވަނީ ވިދާޅުވެފަ އެވެ.

އޭގެ އިތުރުން އެފަދަ މައްސަލަތަކާއި ގުޅުންހުރި ސަރުކާރު ކުންފުނިތަކުގެ ވެރިން ރާއްޖެއިން ބޭރަށް ފުރުން މަނާކުރަންވެސް ޑރ ޖަމީލު ވަނީ ގޮވާލައްވާފަ އެވެ.

ޑރ ޖަމީލު އެފަދައިން ގޮވާލައްވާ ކުރައްވާފައިވާ ޓްވީޓަކަށް ރައްދުދެއްވަމުން މޫކޭ ވިދާޅުވީ އޭނާއަށް ކުރެވޭ ތުހުމަތުތައް ބެލުމުގެ ފުރުސަތު ބަދަލުވާ ވެރިކަމާއެކު ލިބިގެންދާނެ ކަމަށެވެ.

އޭރުން އޭނާ އާރުޑީސީއާއި ހަވާލުވިފަހުން ގެއްލުނު ތިޖޫރިތަކުގެ މައްސަލައާއި، އާރުޑީސީން ހިންގިކަމަށް ބުނާ ކޮރަޕްޝަންގެ މައްސަލަތައް ވެސް ބެލުމުގެ ފުރުސަތު ލިބިގެންދާނެ ކަމަށް މޫކޭ ވިދާޅުވި އެވެ.

އެއާއެކު އޭނާ ވިދާޅުވީ އާރުޑީސީން އެއްވެސް ވައްކަމެއް ކުރައްވާފައި ނުވާނެ ކަމަށެވެ. އަދި އޭނާގެ މައްސަލައެއް ބަލަން ފެށި ނަމަވެސް ފިލައިގެން ނުދާނެކަމުގެ ޔަގީންކަން ވެސް ދެއްވާ ކަމަށެވެ.

"ފިލައިގެން ފުރައިގެން ދާންޖެހޭ ސަބަބެއް ނޯންނާނެ. ކުޑަ ދުވަސްކޮޅެއްގެ ތެރޭގައި ތިޖޫރިއާއި 13 މިލިއަނަށް ވީ ގޮތް ބެލުމުގެ ފުރުސަތު މިހާރުގެ އިދިކޮޅަށް ލިބޭނެ. ޔަގީނުންވެސް ވައްކަމެއް ކޮށްފައި އޮވެގެން ލެވޭނެ ޖަލެއް ނުހުންނާނެ"

އާރުޑީސީގެ އެމްޑީ މޫކޭ

އާރުޑީސީއާއި މޫކޭ ހަވާލުވެ ހުންނަވަނިކޮށް ދެ ފަހަރެއްގެ މަތިން އެ ކުންފުނީގެ ތިޖޫރި ފަޅާލާ ލައްކައަކަށްވުރެ ގިނަ ރުފިޔާ ވަނީ ވަގަށް ނަގާފަ އެވެ. އެ މައްސަލަތަކުގެ ފުރިހަމަ ތަހުހީގެއް ހަދައި މިހާތަނަށް ގެއްލުނު ފައިސާ ހޯދިފައެއް ނުވެއެވެ.

ނުވިތާކަށް މޫކޭ އެމްޑީއަކަށް ހުންނަވަނިކޮށް ޕެޓީކޭޝްގެ ގޮތުގައި މިލިއަނުން ރުފިޔާ އަތްމައްޗަށް ނަގައި އެކި މުވައްޒަފުންގެ އެކައުންޓަށް ޖަމާކުރި މައްސަލައެއްވެސް ވަނީ ފެންމަތިވެފައެވެ.

މިފަދަ ކަންކަމާއި ގުޅިގެން އާރުޑީސީއަށް ގިނަ ފަރާތްތަކެއްގެ ތުހުމަތުގެ އިނގިލި ފާއިތުވި ފަސް އަހަރު އަމާޒުވެގެން ދިޔައެވެ. އާރުޑީސީގެ އެންމެ ބޮޑު ފެއިލިއާކަމަށް ސިފަކުރާ އަމީނީ މަގު ތަރައްގީކުރުމުގެ މަޝްރޫއަކީ ވެސް އިންތިހާއަށް އަގުބޮޑުކޮށް ކޮރަޕްޝަނަށް މަގުފަހިވާގޮތަށް އެ ކުންފުންޏާއި ހަވާލުކޮށްފައިވާ މަޝްރޫއެއްކަމަށް މާލޭ ސިޓީ ކައުންސިލުން ވެސް ވަނީ ތުހުމަތުކޮށްފަ އެވެ.

އެހެން ނަމަވެސް މޫކޭ ވިދާޅުވަނީ އެ ހުރިހާ ތުހުމަތުތަކާއި ވެސް ކެރިގެން ކުރިމަތިލައްވަން ކެރިވަޑައިގަންނަވާނެ ކަމަށެވެ.