ގަތުލްޢާއްމަށް 100 ދުވަސް, ނިރުބަވެރި ޔަހޫދީން ބުނީ ހަމަލާ ދިނުން ނުހުއްޓޭނެ ކަމަށް

ނިރުބަވެރި ޔަހޫދީން ފަލަސްތީނުގެ ޣައްޒާއަށް ދެމުންގެންދާ ހަމަލާތައް ނުހުއްޓާނެ ކަމަށް ބުނެފިއެވެ.

ހަރުކަށި އިސްރާއީލުގެ ބޮޑުވަޒީރު ނަތަންޔާހޫ ބުނީ ހަނގުރާމައިން އެމީހުންނަށް ކާމިޔާބީ ލިބެންދެން ކުރިއަށް ގެންދާނެ ކަމަށާއި އެއްވެސް މީހަކަށް އެކަން ބަދަލު ނުކުރެވޭނެ ކަމަށެވެ. އޭނާ މިހެން ބުނީ އިސްރާއީލުން ހިންގަމުންދާ ލާއިންސާނީ އަމަލުތަކާއި ދެކޮޅަށް ދެކުނު އެފްރިކާއިން އިންޓަނޭޝަނަލް ކޯޓް އޮފް ޖަސްޓިސް އަށް ހުށައެޅި މައްސަލައާއި ގުޅިގެންނެވެ.

ޣައްޒާގެ މީޑިއާ ތަކާއި ހަވާލާދީ އަލްޖަޒީރާއިން ރިޕޯޓް ކުރާ ގޮތުގައި މި މަހު އެކަނިވެސް ނިރުބަވެރި އިސްރާއީލުން 65,000 ޓަނަށް ވުރެ ގިނަ ބޮން ވަނީ އަޅާފައެވެ. އަދި ސެޓަލައިޓް ފޮޓޯ ތަކުން ދައްކާ ގޮތުގައި އެ ސަރަހައްދުގެ 33% ގެއެއް ވަނީ ބިމާއި ހަމަވެފައެވެ.

އާބާދީގެ ގާތްގަނޑަކަށް 85% ނުވަތަ 1.9 މިލިއަން މީހުންގެ ގެދޮރު ގެއްލިފައިވާއިރު، 90% ވުރެ ގިނަ މީހުންނަށް ކާބޯތަކެތީގެ ދަތިކަމާއި ކުރިމަތިލާން ޖެހިފައިވާ ކަމަށް އދ އިން އަންދާޒާކުރެއެވެ.

ފަލަސްތީނުގެ ފޮރިން މިނިސްޓްރީން ބުނީ 100 ދުވަހުގެ ތެރޭގައި އިސްރާއީލުން ކެނޑިނޭޅި ދެމުންގެންދާ ހަމަލާތަކުގެ ސަބަބުން ޣައްޒާގައި މީހުންނަށް ދިރިއުޅެވޭ ވަރު ކޮށްފައިވާ ކަމަށެވެ. އެ މިނިސްޓްރީން ބުނީ މިފަދަ ބިރުވެރިކަމަކާއި ޣައްޒާގެ ރައްޔިތުންނަށް ކުރިމަތި ލާން ޖެހުނީ ފަލަސްތީނުގެ މައްސަލައާ ގުޅުންހުރި ބައިނަލްއަޤްވާމީ ޤަރާރުތައް ތަންފީޒުކުރުމުގައި ބައިނަލްއަޤްވާމީ މުޖުތަމަޢު ނާކާމިޔާބުވަމުން ކަމަށެވެ.

ފަލަސްތީންގެ ޣައްޒާއަށް ހައްދު ފަހަނައަޅާފައިވާ އިސްރާއީލުން ދެމުންގެންދާ ހަމަލާ ތަކަށް 100 ދުވަސްވެފައި ވާއިރު މިހާތަނަށް ހަމަލާ ތަކުގައި 23,968 މީހަކު ޝަހީދު ވެފައިވާއިރު 60,582 މީހަކު ވަނީ މި ހަމަލާ ތަކުގައި ޒަހަމް ވެފައެވެ. އޭގެ ތެރޭގައި ގިނައިން ހިމެނެނީ ކުޑަ ކުދިންނާއި އަންހެނުންނެވެ.