ޕާކިސްތާނުން މެދުނުކެނޑި 10 ވަނަ ރޭ އިންޑިއާއަށް ޙަމަލާދީފި

ޕަހަލްގަމްގައި ހަނގުރާމަވެރިން ޙަމަލާދީ 26 މީހުން މަރާލި ޙާދިސާއަށްފަހު، އިންޑިއާއާއި ޕާކިސްތާނުގެ ގުޅުން މިއިން ޒަމާނަކު ގޯސްނުވާހާ ގޯސްވެފާއިރު، ރޭވެސް ޕާކިސްތާނުން ޙަމަލާދީފައިވާކަމަށް އިންޑިއާއިން ބުނެފިއެވެ.
އިންޑިއާއާއި ޕާކިސްތާނުގެ ގުޅުން ވަރަށް ބޮޑަށް ގޯސްވެފައިމިވަނީ، އެޕްރީލް މަހުގެ 22 ވަނަ ދުވަހު ޕާކިސްތާނުގެ ހަނގުރާމަވެރންގެ ބަޔަކު ކަޝްމީރުގެ އިންޑިއާފަޅީގައި އޮންނަ ފަތުރުވެރިންގެ މެދުގައި މަޤްބޫލު ވާދީއެއްކަމަށްވާ ޕަހަލްގަމްއަށް ހަމަލާދިނުމާއި ގުޅިގެންނެވެ. ލަޝްކަރޭ ތައިބާއާއި ގުޅުން އޮންނަ ޖަމާއަތަކަށް ނިސްބަތްވާކަމަށް އިންޑިއާއިން ތުހުމަތުކުރާ ހަނގުރާމަވެރި ޖަމާޢަތަކުން ދިން މިހަމަލާގައި 26 މީހަކު ވަނީ މަރާލާފައެވެ.

ހަނގުރާމަވެރިންނަށް ވާގިވެރިވާކަމުގެ ތުހުމަތާއި، ޕާކިސްތާނުގެ ތެރެއިން އިންޑިއާއަށް ދެމުންދާ ހަމަލާތައް ހުއްޓުވަން މަސައްކަތް ނުކުރާކަމުގެ ތުހުމަތުގައި އިންޑިއާއިން ވަނީ ޕާކިސްތާނުގެ ސަރުކާރާއި ދެކޮޅަށް މިހަމަލާއަށްފަހު ފިޔަވަޅުތަކެއް އަޅާފައެވެ. ދެގައުމުގެ ދެމެދުގައި އޮންނަ ސަރަހައްދީ އިމުގެ މަސްރަހު އިތުރަށް ހޫނުވެފައިވަނީ މިކަމުގެ ސަބަބުންނެވެ.

އިންޑިއާގެ އަސްކަރިއްޔާއިން ބުނީ ރޭވެސް ސަރަހައްދީ ރޮނގު ހުރަސްކޮށް ޕާކިސްތާނުން ޙަމަލާދިން ކަމަށާއި، މިއީ މެދުނުކެނޑި ޕާކިސްތާނުން މިގޮތަށް ޙަމަލާދިން 10 ވަނަ ރޭ ކަމަށެވެ. އަދި ރޭގެ ހަމަލާތަކަކީ މި 10 ރޭގެ ތެރެއިން އެންމެ ވަރުގަދަ ހަމަލާތައް ދިން ރޭ ކަމަށެވެ. އެގޮތުން ލައިން އޮފް ކޮންޓްރޯލްގެ އިންޑިއާ ފަޅީގައި އޮންނަ ކުޕްވަރާ، ބަރަމުއްލާ، ޕޫންޗް، ރަޖައޫރީ، މެންދަރް، ސުންދަރްބާނީ އަދި އަޚްނޫރުގެ ތެރެއަށް ޕާކިސްތާނުން ހަމަލާދިންކަމަށް އިންޑިއާގެ އަސްކަރިއްޔާއިން މިއަދު ހެނދުނު ބުންޏެވެ. މިއީ މުޅިންވެސް ކަޝްމީރުގެ އިންޑިއާ ފަޅީގެ އަވަށްތަކެވެ.