އިންޑިއާގައި އިސްރާއީލުގެ ދޮން މީހުންނަށް އެކަނި ޚިދުމަތްދޭ ކެފޭތަކެއް ހިންގާތީ ރައްޔިތުން ރުޅިގަދަވެއްޖެ

އިންޑިއާގެ އެކި ސަރަޙައްދުތަކުގައި ހަމައެކަނި އިސްރާއީލުގެ ރައްޔިތުންނަށް ވަދެވޭ ގޮތަށް ޚާއްޞަކޮށްގެން ހިންގާ ކެފޭތަކާއި ވިޔަފާރިތައް އިތުރުވަމުންދާތީ، އެ ޤައުމުގެ ޢާންމު ރައްޔިތުންނާއި އެކްޓިވިސްޓުން ރުޅިގަދަވެއްޖެއެވެ.

ޑިޖިޓަލް ނިއުސް އައުޓްލެޓް 'އޭޖޭ ޕްލަސްއިން ގެނެސްދިން ރިޕޯޓެއްގައި ވާހަކަދައްކަވަމުން، އެކްޓިވިސްޓް އަދި ތަޢުލީމީ ދާއިރާގެ ބޭފުޅެއް ކަމަށްވާ ޝްރިޝްތީ ކަންނާ ވަނީ، އިންޑިއާގެ ރައްޔިތުންނާއި އެހެން ޤައުމުތަކުގެ ފަތުރުވެރިންނަށް އެ ތަންތަނަށް ނުވަދެވޭ ގޮތަށް ހަދައި، ހިންގަމުންދާ ނަސްލީ ތަފާތުކުރުންތަކަށް ވަރަށް ބޮޑަށް ފާޑުވިދާޅުވެފައެވެ.

ޝްރިޝްތީ ވިދާޅުވި ގޮތުގައި "ހޫމަސް ޓްރެއިލް" ގެ ގޮތުގައި މަޝްހޫރުވެފައިވާ ފަތުރުވެރިކަމުގެ ސަރަޙައްދުތަކުގައި މިފަދަ ތަންތަން ގިނައެވެ.

"މި ކެފޭތަކަށް ވަދެވެނީ ހަމައެކަނި ދޮން ނަސްލުގެ އިސްރާއީލް މީހުންނަށް. މިކަން މިހާރު ދަނީ ވަރަށް ބޮޑަށް އިތުރުވަމުން. މިއީ ވަކި ބަޔަކަށް ބާރުތަކެއް ލިބިދޭ ގޮތަށް އުފައްދާފައިވާ ނިޒާމެއް. އިންޑިއާ މީހުންނަކަށް އަދި އެހެން ޤައުމުތަކުގެ ދޮން މީހުންނަކަށް ވެސް މި ތަންތަނަކަށް ނުވަދެވޭ،" އޭނާ ވިދާޅުވިއެވެ.

އޭޖޭ ޕްލަސްގެ ރިޕޯޓުގައި ފާހަގަކޮށްފައިވާ ގޮތުގައި، އިސްރާއީލުގެ އަސްކަރިއްޔާގައި ޚިދުމަތް ކުރުމަށްފަހު އިންޑިއާއަށް ދަތުރުކުރުމުގެ ސަގާފަތެއް އެމީހުންގެ މެދުގައި ފެށުނީ 1980 ގެ އަހަރުތަކުގައެވެ. މިގޮތުން އަހަރަކު ގާތްގަނޑަކަށް 80،000 އެއްހާ އިސްރާއީލު މީހުން އިންޑިއާއަށް ދަތުރުކުރާއިރު، އޭގެ ތެރެއިން ގިނަ ބަޔަކު ހިމާޗަލް ޕްރަދޭޝް، ދަރަމްކޯޓް އަދި ގޯއާ ފަދަ ސަރަޙައްދުތަކުގައި ވަގުތީ ގޮތުން ދިރިއުޅެއެވެ.

މިފަދަ ތަންތަނުގައި ޕްރައިވެޓް ޕާޓީތަކާއި، ރޭވްތަކާއި ކެފޭތައް ހިންގަނީ ވަކި ޚާއްޞަ މާޙައުލެއްގައެވެ. ޝްރިޝްތީ މިކަން ސިފަކުރެއްވީ "އިސްތިޢުމާރީ" އަދި "އެޕާތައިޑް“ ނުވަތަ ނަސްލީ އިމްތިޔާޒުގެ އުސޫލެއްގެ ގޮތުގައެވެ. ސަބަބަކީ އެތަންތަނުގައި އިންޑިއާގެ ޤާނޫނުތަކަށް ބެލުމެއްނެތި، ވަކި އުސޫލުތަކަކަށް ޢަމަލުކުރަމުންދާއިރު އިންޑިއާ މީހުންނަށް އެކަމަށް އެއްވެސް ބަހެއް ބުނުމުގެ ޙައްޤު ނޯންނާތީއެވެ.

މީގެއިތުރުން، މި ފަތުރުވެރިންގެ ތެރޭގައި ޣައްޒާގައި ހިންގަމުންދާ ލާއިންސާނީ ޢުދުވާންތަކުގައި ބައިވެރިވެފައިވާ އަސްކަރީ ސިފައިން ހިމެނޭއިރު، އެމީހުންގެ މައްޗަށް އެއްވެސް ޝަރީޢަތެއް ހިންގުމުގެ ބިރެއް ނެތި އިންޑިއާގައި މިނިވަންކަމާއެކު އުޅެމުންދާކަން ރިޕޯޓުގައި ފާހަގަކޮށްފައިވެއެވެ.

މިފަދަ ނަސްލީ ތަފާތުކުރުންތަކަށް އިންޑިއާގެ ސަރުކާރުން ލޯމަރާލައިގެން އޮންނަނީ، ބޮޑުވަޒީރު ނަރެންދުރަ މޯދީގެ ވެރިކަންކުރާ ބީޖޭޕީ ޕާޓީއާއި އިސްރާއީލުގެ ސަރުކާރާ ދެމެދު އޮތް ސިޔާސީ އަދި ފިކުރީ ގުޅުމުގެ ސަބަބުން ކަމަށް ޝްރިޝްތީ ތުހުމަތުކުރެއްވިއެވެ. އޭނާ ވިދާޅުވީ، ބީޖޭޕީ އަދި އާރްއެސްއެސް އިން ޒަޔަނިޒަމް އިން ހިތްވަރު ލިބިގަނެ، އިސްރާއިލާ އިންޑިޔާއާ ދެމެދުގައިވާ ގުޅުން އިތުރަށް ވަރުގަދަކުރަމުންދާ ކަމަށެވެ.