އިސްތަންބޫލްގެ މި މިސްކިތުގެ ނަމުގެ މާނައަކީ ”އަހަރެން ކެއި ފަދަ“: ނަމުގެ ފަހަތުގައި ވަނީ ޢިބްރަތްތެރި ވާހަކައެއް!

ތާރީޚީ އެތައް ހާދިސާތަކަކާއި ކަންތައްތަކެއް ފޮރުވިފައިވާ ތުރުކީވިލާތުގެ އިސްތަންބޫލްގެ ގޯޅިތަކުގެ ތެރެއިން ހިނގާލާފައި ދާއިރު ތުރުކީ ބަހުން ކިޔާ "ސަންކީ ޔެދިމް" (Sanki Yedim) ނަމަކަށް ކިޔާ މިސްކިތެއް ފެންނަން ހުންނާނެއެވެ. މިއީ ދުނިޔޭގައި ވެސް އެންމެ ތަފާތު ނަމެއް ދެވިފައިވާ މިސްކިތަކަށް ވާނެއެވެ. އެ މިސްކިތުގެ ނަމުގެ މާނައަކީ "އަހަރެން ކެއި ފަދަ" އެވެ.

ނަމުގެ ފަހަތުގައިވާ ވާހަކަ

މި މިސްކިތުގެ ނަމާ ގުޅިފައިވަނީ ޢިބްރަތުން ފުރިގެންވާ ވަރަށް ރީތި ވާހަކައެކެވެ. އިސްތަންބޫލްގެ ފާތިހް އަވަށުގައި ދިރިއުޅުނު ޚައިރުއްދީން ކެޗެޖީ އެފެންދީ ނަމަކަށް ކިޔާ ދީންވެރި، ނިކަމެތި މީހެކެވެ. އޭނާ ބާޒާރުމަތިން ހިނގާފައި ދާއިރު، މީރު މޭވާއެއް، މަހުގެ ބާވަތެއް ނުވަތަ ފޮނިކާއެއްޗެއް ފެނި އެ ކާހިތްވާ ކޮންމެ ފަހަރަކު، އެ އެއްޗެއް ނުގަނެ އަމިއްލަ ނަފްސަށް ބުނެލައެވެ؛ "ހީވާކަހަލައެވެ. އަހަރެން ކެއި ފަދައެވެ!"

އަދި އެ ތަކެތި ގަންނަން ޚަރަދުވާނެ ފައިސާ ނަގައި ފޮށްޓަކަށް ވައްޓާލައެވެ. މިގޮތަށް ދުނިޔަވީ އެދުންތަކުން ދުރުހެލިވެ، އޭނާގެ އާމްދަނީން ސަލާމަތްކުރި ފައިސާ އަހަރުތަކެއް ވަންދެން އެއްކުރަމުން ގޮސް، އޭނާ ދިރިއުޅޭ އަވަށުގައި ކުޑަ މިސްކިތެއް ބިނާކުރެވޭ ވަރަށް ފައިސާ ޖަމާވިއެވެ. ދެން އޭނާ އެ ފައިސާއިން މިސްކިތެއް އެޅިއެވެ. މި ވާހަކަ އަވަށުގެ މީހުންނަށް އެނގުމުން، އެމީހުން އެ މިސްކިތަށް "ސަންކީ ޔެދިމް" ގެ ނަމުން ނަންދިނެވެ. މިއީ މުޅި އިސްތަންބޫލް އަދި މުޅި ދުނިޔޭގައި ވެސް މިސްކިތަކަށް ކިޔުނު އެންމެ ތަފާތު ނަމަށް ވެގެންދިޔައެވެ.

މިސްކިތް ހުންނަނީ ކޮންތާކު؟ އަދި މިހާރުގެ ހާލަތަކީ ކޮބާ؟

މިއަދު ވެސް އިސްތަންބޫލަށް ޒިޔާރަތްކޮށް، ފާތިހް އަވަށުގެ ކިރްބަސީ ނާމް މަގަށް ވަދެއްޖެނަމަ، ބައު ގޭތަކުގެ މެދުގައި ހުރި މި ތާރީޚީ މިސްކިތް ފެންނާނެއެވެ. މިއީ އާޚިރަތުގެ މަތިވެރި ޘަވާބަށްޓަކައި ދުނިޔޭގެ އަރާމުތައް ދޫކޮށްލި ނިކަމެއްޗެއްގެ އިޚްލާޞްތެރިކަމުގެ ދިރިހުރި ހެއްކެކެވެ.

މި މިސްކިތަކީ އެތެރޭގައި ގާތްގަނޑަކަށް 100 އަކަމީޓަރު އަދި ބޭރުގައި 130 އަކަމީޓަރު ހުންނަ، އެއްފަހަރާ 200 އެއްހާ މީހުންނަށް ނަމާދުކުރެވޭ ވަރުގެ ކުޑަ މިސްކިތެކެވެ. މިސްކިތް ބިނާކޮށްފައިވަނީ ސިމެންތިންނެވެ. ބޮޑު ގުއްބަކާއި އެއް ބެލްކަނީ ލީ މުންނާރެއް ހުންނައިރު، މިސްކިތުގައި މާބޮޑެތި ކުރެހުންތަކާއި ޒީނަތްތެރިކަމެއް ނުހުރެއެވެ. ހުންނަނީ ވަރަށް އާދައިގެ ސާދާ ގޮތަކަށެވެ.

ފުރަތަމަ ބޮޑުހަނގުރާމައިގެ ކުރިން ހިނގި އަލިފާނުގެ ބޮޑު ހާދިސާއެއްގައި މި މިސްކިތަށް ބޮޑެތި ގެއްލުންތަކެއް ލިބި، އަޅާނުލެވި އެތައް ދުވަހަކު ހުއްޓެވެ. ނަމަވެސް 1959 އާއި 1960 އާ ދެމެދު އަވަށުގެ ރައްޔިތުންނާއި އެކި ފަރާތްތަކުގެ އެހީތެރިކަމާއެކު މިސްކިތް ވަނީ އަލުން މަރާމާތުކޮށްފައެވެ. އަދި މިހާރު މިސްކިތުގެ ދޮރުމަތީގައިވާ މާބްލް ހިލައިގައި ވަނީ މި ތަފާތު ނަމުގެ ފަހަތުގައިވާ ޢިބްރަތްތެރި ވާހަކަ ކުރުގޮތަކަށް ބިންވަޅު ނަގާފައެވެ.

”އަހަރެން ކެއި ފަދައެވެ“ މި މިސްކިތުގެ ވާހަކައިން އެނގިގެންދާ އެންމެ މުހިންމު ކަމަކީ، ދުނިޔޭގެ ވަގުތީ އުފަލާއި އަރާމުތައް ކިތަންމެ ގޮވައިލި ކަމުގައިވިޔަސް، އާޚިރަތުގެ ދާއިމީ ނިޢުމަތަށް އިސްކަންދިނުމުގެ މުހިންމު ކަމެވެ.