ކުޅުދުއްފުށީ އެއާޕޯޓުގެ ރޭގަނޑު ދަތުރުތަކުގެ ޓެސްޓް ފްލައިޓް ޖައްސައިފި
ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް)ގެ ފަރާތުން ހިންގަމުންދާ ކުޅުދުއްފުށީ އެއާޕޯޓްގައި ނައިޓްލޭންޑިން ސިސްޓަމް ގާއިމު ކުރެވި އެ ހިދުމަތް ރަސްމީކޮށް ފެއްޓުމަށްޓަކައި އަޅަންޖެހޭ ޓެސްޓު ފްލައިޓް އަޅައިފިއެވެ.
ނައިޓް ލޭންޑިންގެ ހިދުމަތާއެކު ކުޅުދުއްފުށީ އެއާޕޯޓުންދޭ ހިދުމަތްތައް 24 ގަޑިއިއރަށް ބަދަލު ވާނެއެވެ.
ނައިޓް ލޭންޑިންގެ ހިދުމަތް ފެށުމުން ކުޅުދުއްފުއްޓާއި ކައިރީގައިވާ ރަށްރަށުގައި ދިރިއުޅޭ ރައްޔިތުންނަށް ދިމާވެފައިވާ ދަތިތަކަށް ހައްލެއް ލިބި ރޭގަނޑު ވައިގެ މަގުން ދަތުރު ކުރުމުގެ މަގު ފަހިވެގެންދާނެ ކަމަށާއި ކުއްލި ހާލަތްތަކުގައި ބަލިމީހުން ރޭގަނޑު ވައިގެ މަގުން އުފުލުމަށް އޮތް ހުރަހަށް ނިމުމެއް އަންނާނެ ކަމަށް އާރްއޭސީއެލްއިން މައުލޫމާތުދެއެވެ.
އޭގެ އިތުރުން ވިޔަފާރިތަކަށާއި ގެސްޓްހައުސް އަދި ރިސޯޓުތަކަށްވެސް މިކަމުގެ ސަބަބުން އިތުރު މަންފާ ލިބިގެންދާނެ ކަމަށް އާރްއޭސީއެލްއިން ދެކެއެވެ.
ކުޅުުދުއްފުށީ އެއާޕޯޓްގެ އިތުރުން އާރްއޭސީއެލްގެ ފަރާތުން ހިންގަމުންދާ ހޯރަފުށީ އެއާޕޯޓާއި މާވަރުލު އެއާޕޯޓްގައި ނައިޓް ލޭންޑިންގެ ހިދުމަތް ދިނުމުގެ މަސައްކަތް ކުރަމުންދާ ކަމަށާއި ކުރިއަށްއޮތް މަހެއްހާ ދުވަހުގެ ތެރޭގައި އެ ދެ އެއާޕޯޓުގައި ނައިޓް ލޭންޑިންގެ ހިދުމަތް ފެށޭނެ ކަމަށް އާރްއޭސީއެލްއިން ބުނެއެވެ.
ކުޅުދުއްފުށީ އެއާޕޯޓުގައި ނައިޓް ލޭންޑިންގް ހިދުމަތް ފެށުމާއެކު، އާރްއޭސީއެލްގެ ފަރާތުން ހިންގަމުންދާ އެއާޕޯޓްތަކުގެ ތެރެއިން ނައިޓްލޭންޑިންގެ ހިދުމަތްދޭ އެއާޕޯޓްތަކުގެ އަދަދު ހަތަރަކަށް އަރާނެއެވެ.
އެއީ ހަނިމާދޫ އިންޓަނޭޝަނަލް އެއާޕޯޓާއި ކުޅުދުއްފުށީ އެއާޕޯޓް އަދި ފަރެސްމާތޮޑާ އެއާޕޯޓުގެ އިތުރުން ފުވައްމުލަކު އެއާޕޯޓެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
