މާލެ ނޫން ރަށްތަކުގައިވެސް މިނީ ބަހުން ވިއްކާނީ ކަރުދާސް ޓިކެޓް
މާލެ ނޫން ރަށްތަކުގައިވެސް މިނީ ބަހުން ކަރުދާސް ޓިކެޓް ވިއްކަން ފަށަން (އެމްޓީސީސީ)ން ނިންމައިފިއެވެ.
އާރުޓީއެލްގެ ދަށުން މިހާރު މިނީ ބަހުގެ ހިދުމަތް ދެނީ މާލޭގެ އިތުރުން އައްޑޫ ސިޓީ އާއި ފުވައްމުލައް ސިޓީ އާއި ލާމު އަތޮޅުގައެވެ. މި ސަރަހައްދުތަކުގައި ބަސްތަކުން ކަރުދާސް ޓިކެޓް ވިއްކަން ފަށާނީ އަންނަ ހޮނިހިރު ދުވަހުން ފެށިގެންނެވެ.
އެމްޓީސީސީން ބުނީ ކަރުދާސް ޓިކެޓް ބައްލަވައިގަތުން ހަމަޖެހިފައިވަނީ ބަސް ތެރެއިން ކަމަށާއި، ޓާރމިނަލްތަކުން ކަރުދާސް ޓިކެޓް ލިބޭނެ އިންތިޒާމް ހަމަޖެހިފައެއް ނުހުންނާނެ ކަމަށެވެ.
އަދި މި ކަރުދާސް ޓިކެޓް ބައްލަވައިގަންނަވާ ބަސް ޓިކެޓުގެ ފައިސާ ލާނެ ހާއްސަ ފޮއްޓެއް، ބަސްތެރޭގައި ބެހެއްޓިފައި ހުންނާނެއެވެ. އެހެންކަމުން ސީދާ ޓިކެޓަށްވާ ފައިސާ ގެނައުމަށް އެމްޓީސީސީން ވަނީ އެދިފައެވެ. ބަހުގެ ހިދުމަތް ހޯދުމުގައި އައްޑުއާއި ފުވައްމުލަކާއި ލާމުގައި އަގުތައް އުޅެނީ 5 ރުފިޔާ އާއި 20 ރުފިޔާއާ ދެމެދުގައެވެ.އެމްޓީސީސީން ބުނީ މިގޮތަށް ހަމަޖައްސާފައިވާ މައިގަނޑު ސަބަބަކީ ކަސްޓަމަރުންގެ ވަގުތު ސަލާމަތް ކުރުމަށާއި، ބަހުގެ ޝެޑިއުލަށް ބުރުލެއް އެރިޔަ ނުދިނުމަށެވެ.
ކަރުދާސް ޓިކެޓުގެ އިތުރުން ކިޔުއާރު ޓިކެޓް ވެސް މިނީ ބަހުގެ ހިދުމަތް ހޯދާ ކަސްޓަމަރުންނަށް ނެގޭނެއެވެ. ކިޔުއާރު ޓިކެޓް ލިބޭނީ އާރުޓީއެލް ވެބްސައިޓާއި މޯބައިލް އެޕްލިކޭޝަނުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
