ޔަހޫދީންނާއި ދެކޮޅަށް ތެދުވުމަށް އަލް އަޒްހަރުން ގޮވާލައިފި
މިޞްރުގެ އެންމެ ބޮޑު އަދި އެންމެ ދުވަސްވީ ޔުނިވާސިޓީ އަލް އަޒްހަރުން، އިޒްރާއިލުގެ ޔަހޫދީންނާއި ދެކޮޅަށް ތެދުވުމަށް އެންމެހާ މުސްލިމުންނަށް ގޮވައިލައިފިއެވެ.
އަލް އަޒްހަރު ޔުނިވާސިޓީ އިން ބުނެފައިވަނީ އިޒްރާއިލުން ފަލަސްޠީނުގެ ރައްޔިތުންނާއި މެދު ހިންގަމުންގެންދާ ލާއިންސާނީ ޢަމަލުތައް ބައިނަލް އަޤްވާމީ މިންގަނޑަކުން ތަހްޤީޤު ކުރަން ޖެހޭ ކަމަށެވެ.
އަޒްހަރުން ޢަރަބި އިސްލާމީ ޤައުމަތަކަށް ގޮވައިލައިފައިވަނީ އެބައިމީހުންގެ ދީނީ އަދި ތާރީޚީ ވާޖިބު އަދާ ކުރުމަށެވެ. އަދި ފަލަސްޠީންގެ ޣައްޒާގައި ޙާލުގައި ޖެހިފައިވާ ފަރާތްތަކަށް އެންމެ އެކަށީގެންވާ އިންސާނީ އެހީ ފޯރުކޮށްދިނުމަށެވެ.
އަޒްހަރުން ވަނީ ހުޅަނގުގެ ޤައުމުތަކުން ސުވާލުކުރުމެއް ނެތި އަދި ހިފެހެއްޓެމެއްނެތި އިޒްރާއިލްއަށް ވަމުންދާ މަދަދަށްޓަކައެ އެޤައުމުތަކަށް ވަރަށް ބޮޑަށް ފާޑު ކިޔައިފައެވެ.
އަދި ނަންމަޝްހޫރު ހުޅަނގުގެ މީޑިއާ ތަކުން ފަލަސްޠީނުގެ މައްސަލައިގައި ދޮގު ޚަބަރު ފެތުރުމާއި ފަލަސްޠީނާއި މެދު ހަދަމުންދާ ދޮގު ތަކަކީ މިނިވަން މީޑީއާގެ އުސޫލެއް ކަމަށް ދައްކަން އުޅޭ ދެއްކުމާއި މެދު ވެސް އަޒްހަރުން ވަނީ ފާޑުކިޔައިފައެވެ.
"ޢާންމުންނަށް އަމާޒުކޮށް ހަމަލާދިނުން، ޚާއްސަކޮށް އެމީހުންގެ ދިފާޢުގައި އެއްވެސް ކަމެއް ނުކުރެވޭނެ، ކުޑަކުދިންނާއި، ޢުމުރުން ދުވަސްވީ މީހުންނަށް އަންހެނުންނަށް ހަމަލާދިނުމާއި، ސިއްޚީ ފަރުވާދޭ ހޮސްޕިޓަލް ތަކަށާއި، ބާޒާރުތަކަށާއި، އެމްބިޔުލާންސް، މިސްކިތް އަދި ޢާންމުން ވަގުތީ ހިޔަލުގެ ގޮތަގައި ބޭނުން ކުރަމުންދާ ސްކޫލްތަކަށް ހަމަލާދިނުމަކީ ބައިނަލްއަޤްވާމީ ޤާނޫނު ތަކުންވެސް މަނާކޮށްފައިވާ ކަމެއް" އަޒްހަރުން ބުނެފައިވެއެވެ.
އެތަނަށް ދެމުންދިޔަ ކަރަންޓާއި ފެން ފަދަ ޒަރޫރީ ޚިދްމަތްތައް ކަނޑާލުމާއި ހަމަލާދިނުމަށް އެންމެ ބާރުގަދަ ގެއްލުންދެނިވި ނުރައްކާތެރި ހަތިޔާރު ބޭނުންކުރުމާއި ކާބޯތަކެއްޗާއި ޙާލުގައި ޖެހިފައިތިބި މީހުންނަށް ބޭނުންވާ އިންސާނީ އެހީ ފޯރުކޮށްދިނުމަށް ބޭނުންވާ މަގު ބަންދު ކުރުމަކީ އިންސާނިއްޔަތާއި ޚިލާފު ގެއްލުންދެނިވި ޢަމަލު ތަކެއް ކަމުގައި އަޒްހަރުން ވަނީ ސިފަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
