ދިވެހިރާއްޖޭގެ ޤައުމީ ފުޓްބޯޅަ ޓީމް މިރޭ ނިކުންނާނީ ކިރްގިސްތާނާ ދެކޮޅަށް

ދިވެހިރާއްޖޭގެ ޤައުމީ ސީނިއާ ފުޓްބޯޅަޓީމް ކުޅޭ ދެވަނަ މެޗްގައި މިރޭ ކިރްގިސްތާނާ ދެކޮޅަށް ނިކުންނާނެއެވެ.

ކިރްގިސްތާނުގައި ކުޅުމަށް ހަމަޖެހިފައިވާ މިމެޗް ފެށުމަށް ހަމަޖެހިފައިވަނީ ރާއްޖެ ގަޑިން 19:00 ގައެވެ. ތަޖުރިބާ ހޯދުމުގެ ގޮތުން ރާއްޖެ ކުރާ މި ދަތުރުގައި އެންމެ ފުރަތަމަ ކުޅެފައިވަނީ ޗައިނާ އާ ދެކޮޅަށެވެ. އެމެޗުން ރާއްޖެ ބަލިވީ 3-0 ގެ ނަތީޖާއިންނެވެ.

ރާއްޖެ ވަނީ މީގެ ކުރިންވެސް ކިރްގިސްތާނާ ދެކޮޅަށް ކުޅެފައެވެ. އެގޮތުން ޖުމްލަ ހަތަރު ފަހަރެއްގެ މަތިން ކުޅުނުއިރު ރާއްޖެއިން ވަނީ ދެފަހަރު މޮޅުވެފައެވެ. މީގެ 10 އަހަރުކުރިން ކުޅުނު ދެޓީމްގެ ފަހުމެޗް ރާއްޖެއިން ކާމިޔާބުކުރީ ދިވެހިރާއްޖެ އެވެ.

ކިރްގިސްތާން މެޗަށްފަހު ރާއްޖެ ދެން ނިކުންނާނީ ލުބުނާނާ ދެކޮޅަށެވެ. އެކުވެރިކަމުގެ މެޗްތަކަށްފަހު ރާއްޖެ ދެން އެންމެ އަވަހަށް ތައްޔާރުވާނީ ބަންގްލަދޭޝްގައި ބާއްވާ ސާފް ޗެމްޕިއަންޝިޕް މުބާރާތަށެވެ. މި މުބާރާތް ބޭއްވުމަށް ތާވަލްކޮށްފައިވަނީ އަންނަ ނޮވެމްބަރުމަހުގެ 4 ކުން 17 އަށެވެ.