އިންޑިޔާގެ ކުރީގެ އެމްޕީ އަތީޤް އަހްމަދު މަރާލައިފި

އިންޑިޔާގެ ޤާނޫނު ހަދާ މަޖިލީހުގެ ކުރީގެ މެމްބަރެއް ކަމަށްވާ އަތީޤް އަހްމަދާއި އޭނާގެ ބޭބެ އަޝްރަފް އަހްމަދުގެ ގަޔަށް ބަޑިޖަހައި މަރައިލައިފިއެވެ.

އިންޑިޔާގެ އުއްތަރް ޕްރަދޭޝްގައި މިކަން ހިނގިއިރު އެމަންޒަރު ލައިވްކޮށް ޓީވީ އަކުން ދައްކައި ފައިވެސްވެއެވެ. އަތީޤް އާއި އޭނާގެ ބޭބެ އަޝްރަފް ތިބީ ފުލުހުންގެ ބެލުމުގެ ދަށުގައެވެ. މި ހާދިސާ ހިނގައިފައިވަނީ އެދެމީހުންގެ ބަލި ހާލަތު ހުރި ގޮތުން ފަރުވާދިނުމަށް ހޮސްޕިޓަލަށް ގެންދިޔުމަށް ބޭރަށް ނެރުނު ވަގުތެއްގައެވެ.

އަތީޤް އާއި އޭނާގެ ބޭބެ އަޝްރަފްގެ ގަޔަށް ބަޑިޖަހައި މަރާލިމީހާ، އެސަރަހައްދަށް ގޮސްފައިވަނީ ނޫސްވެރިއެއް ކަމަށް ފެންނަ ގޮތައް ހެދުން އަޅައިގެން ކަމަށާއި، މީހުންގަނޑުގެ ތެރެއިން ކުއްލިއަކަށް ނުކުމެ އެމީހާ އަތީޤް އާއި އަޝްރަފްގެ ގަޔަށް ބަޑިޖެހީކަމަށް އަލްޖަޒީރާގައި ބުނެފައިވެއެވެ.

މިމައްސަލަޔާއި ގުޅިގެން ތުހުމަތުކުރެވޭ ތިން މީހަކުވަނީ ވަގުތުން ފުލުހުންނަށް އަމާންދީފައެވެ. އަދި އެމީހުން ވަގުތުން ފުލުހުންގެ ވެހިކަލްގައި ގެންދެވިފައިވާ ކަމަށް އަލްޖަޒީރާގައި ބުނެފައިވެއެވެ.

މި ހާދިސާގައި ބަޑިޖެހި މީހާ ބަޑިޖެހި ވަގުތު ހިންދޫ ދީނުގެ ޝިރުކީ ޝުޢޫރެއް ކަމަށްވާ "ޖައި ޝްރީ ރާމް" ގޮވި ކަމަށް އަލްޖަޒީރާގައި ބުނެފައިވެއެވެ. އިންޑިޔާގެ ހައްދުފަހަނަ އެޅި ހިންދޫއިން އެ ޤައުމުގެ މުސްލިމުންނާއި ދެކޮޅަށް ހިންގާ ޢަމަލުތަކުގައި އެ ޝުޢޫރު ބޭނުން ކުރުން ވަނީ ޢާންމުވެފައެވެ. އަދި ހިންދޫންގެ އެންގުމަށް އެހެން ނުކިޔާ މުސްލިމުންނަށް އިންސާނިއްޔަތާއި ޚިލާފު އަދަބުތައް ދީ ހަދަމުންދާ ކަން ބައިނަލް އަޤްވާމީ މީޑީއާ ތަކުން އަންނަނީ ފާޅުކޮށް ހާމަކޮށްދެމުންނެވެ.

މިމައްސަލަ އާއި ގުޅިގެން އިންޑިޔާ ޕޮލިހުން ބުނެފައިވާ ބަހުން، މި މަރުގެ ފަހަތުގައި ވަނީ ކޮން މަޤްސަދެއްތޯ ހޯދުމަށް އެމީހުން މަސައްކަތް ކުރާ ކަމުގެ ޔަޤީންކަމެއް ލިބިފައި ނުވާ ކަމަށް އަލްޖަޒީރާގައި ބުނެފައިވެއެވެ.