އައިއޭސީ ގުދަނަށް ހަމަލާ ދިނުމުގެ ސަބަބުން ހަލާކުވީ މިއަދު ބަހަން ތައްޔާރު ކުރި ތަކެތި!

ފަލަސްޠީނުގައި ހުރި އިންޓަނޭޝަނަލް އެއިޑް ކެންޕެއިންގެ ގުދަނަކަށް ހައްދުފަހަނަޅައަޅާފައިވާ އިސްރާއީލްގެ ސިފައިން ދިން ހަމަލާގައި ހަލާކުވެފައިވަނީ މިއަދު ބެހުމަށް ތައްޔާރު ކޮށްފައިވާ ތަކެތި ކަމަށް އެ ޖަމިއްޔާ އިން ބުނެފި އެވެ.

ފަލަސްތީނުގައި ހުރި އައިއޭސީގެ ގުދަން ތަކުގެ ތެރެއިން ގުދަނަކަށް ސީދާ އަމާޒުކޮށްގެން އިސްރާއީލްގެ ސިފައިން މިއަދު ހަމަލާއެއް ދީފައިވާއިރު، އެ ހަމަލާގެ ސަބަބުން އެ ގުދަނުގައި ރައްކާ ކޮށްފައިހުރި އެހީގެ ތަކެތިތަކެއް ވަނީ ހަލާވެފައެވެ.

އެގޮތުން އެ ހަމަލާގެ ސަބަބުން، އެހީގެ ގޮތުގައި ދިނުމަށް ތައްޔާރު ކޮށްފައިވާ 2000 ބްލޭންކެޓް/ރަޖާ އާއި، 1000 ވަގުތުން ކެވޭގޮތަށް ތައްޔާރު ކުރެވިފައިވާ ކާނާ ޕެކާއި، 3000 އަންނައުނު ޕެކް އެއްކޮށް ހަލާކުވެފައިވާއިރު، އެ ތަކެއްޗަކީ މިއަދު ބެހުމަށްޓަކައި ތައްޔާރު ކޮށް ރޭގައި އެ ގުދަނަށް ލާފައިވާ ތަކެތި ކަމަށް އައިއޭސީން މައުލޫމާތު ދެއެވެ.

އަދި އެ ތަކެއްޗަކީ ހަނގުރާމައިގެ ސަބަބުން ހާލުގައި ޖެހިފައިވާ މީހުންގެ ތެރެއިން އދ ގެ ސުކޫލުތަކުގައި ތިބި މީހުންނަށް ބެހުމަށް ހަމަޖެހިފައިވާ ތަކެތި ކަމަށާ ހަމަލާތަކުގެ ސަބަބުން ތަކެތި ބެހުމުގެ ކަންކަން މިއަދު ނުފެށި އުޅެނިކޮށް ގުދަނަށް ހަމަލާ ދީފައިވާ ކަމަށް އައިއޭސީން ބުނެފައިވެއެވެ.

އޭއައިސީން ބުނި ގޮތުގައި ހަމަލާގައި ދިވެހީންގެ އެހީގައި ފޮނުވި ހުރިހާ ތަކެތި ހަލާކުވީ ނޫން ކަމަށެވެ. ހަމަލާ ގައި ހަލާކުވީ އެ ވަގުތު އެ ވެއާ ހައުސްގައި ހުރި ތަކެއްޗެވެ. އެއީ ނިސްބަތުން މަދު އަދަދެއްގެ ތަކެއްޗަށް ވާއިރު މި ހަމަލާއާ އެކު ދިވެހީންގެ އެހީ ފަލަސްތީނަށް ފޯރުކޮށް ދިނުން ނުހުއްޓޭނެ ކަމަށް ވެސް އެ ޖަމިއްޔާ އިން ބުންޏެވެ.

މިއަދު ބެހުމަށް ހަމަޖެހުނު އެ ތަކެއްޗަށް ލިބުނު ގެއްލުމުގެ އިތުރުން، އެ ސަރަހައްދަށް ދިން ހަމަލާއެއްގައި އައިއޭސީގެ އޮފިޝަލުން ތަކެތި އުފުލުމަށް ބޭނުން ކުރަމުންދާ ކާރަށްވެސް ގެއްލުންވެފައިވާ ކަމަށާ، އަދި އެ ޖަމިއްޔާގެ ބައެއް އޮފިޝަލުންނަވެސް ކުދި ޒަޚަމްތައް ލިބިފައިވާކަމަށް ބުނެފައިވެއެވެ.

ނަމަވެސް، މާތް الله ގެ ރަހުމަތުން އެއްވެސް މީހެއްގެ ފުރާނައަށް ގެއްލުންވާ ފަދަ އަނިޔާއެއް ނުވާ ކަމަށް އެ ޖަމިއްޔާ އިން މައުލޫމާތު ދެއެވެ.

މީގެ އިތުރުން އައިއޭސީން ބުނީ، ހަލާކުވެފައިވަނީ އެ ޖަމިއްޔާގެ ގުދަން ތަކުގެ ތެރެއިން އެއް ގުދަން ކަމަށާ، އަދި ދިވެހީންގެ އެހީގެ ދީފައިވާ ހުރިހާ ތަކެތި ހަލާކު ނުވާ ކަމަށެވެ.