އިސްލާމީ އުންމަތް ބަލިކަށިވެފައިވާ މިންވަރުން އަޅުގަނޑުމެން ހިތާމަކުރަންޖެހޭ: އިމްރާން

މިހާރު އިސްލާމީ އުއްމަތް ވަނީ ވަރަށް ބޮޑަށް ބަލިކަށިވެފައިކަމަށާއި، މިއީ މުސްލިމުން ހިތާމަ ކުރަންޖެހޭކަމެއްކަމަށް ހޯމް މިނިސްޓަރު އިމްރާން އަބްދުالله ވިދާޅުވެއްޖެއެވެ.

ރާއްޖެ އިސްލާމްވި ދުވަހުގެ މުނާސަބަތުގައި ރޭ ބޭއްވި ރަސްމީ ޖަލްސާގައި ވާހަކަ ދައްކަވަމުން އިމްރާން ވަނީ ފަލަސްތީނުގެ އަދުގެ ހާލަތާއި މުސްލިމު އުންމަތުގެ ހާލަތަށް އަލިއަޅުއްވާލައްވާފައެވެ.

އެގޮތުން ވިދާޅުވީ, ކީރިތި ގުރުޢާނާއި ރަސޫލާ ޞައްލައްالله ޢަލައިހި ވަސައްލަމްގެ ސުންނަތުން އަހަރެމެންގެ އިސްލާމީ އުންމަތަކީ އެކަތިގަނޑަކަށް އޮތް އެއް އުންމަތެއްކަން ވަރަށް ސާފުކޮށް އެނގެން އޮތް ކަމަށެވެ. އަދި އެއް މުސްލިމަކާއި، އަނެއް މުސްލިމަކާއި ދެމެދު އޮންނަ ގުޅުމަކީ ލޭގެ ގުޅުމާއި ރަހިމުގެ ގުޅުމަށްވުރެވެސް ބޮޑު އެއްޗެއް ނަމަވެސް، މިއަދު އިސްލާމީ އުއްމަތުގެ ނިކަމެތިކަމާއި ބަލިކަށިކަން ގޮސްފައިވާ ހާލަތުން ހިތާމަ ކުރަންޖެހޭކަމަށް އިމްރާން ވިދާޅުވިއެވެ.

މިއަދު އިސްލާމީ އުންމަތުގެ ނިކަމެތިކަމާއި ބަލިކަށިކަން ގޮސްފައިވާ ހާލަތު އަޅުގަނޑުމެން ހިތާމަކުރަންޖެހޭ ހިސާބުގައި މިއޮތީ. އޭގެ ހަގީގަތަކީ އަޅުގަނޑުމެންގެ އަޅުގަނޑުމެންގެ އީމާންކަން ބަލިކަށިވެފައިވާ މިންވަރު. އަޅުގަނޑުމެންގެ މުސްލިމު އުންމަތާއި ދޭތެރޭގައި މުސްލިމުންގެ އިހްސާންތެރިކަން ނެތް މިންވަރު.

ޢިމްރާން އަބްދުالله

މިއާއެކު ޢިމްރާން ވިދާޅުވީ އެންމެ ހަ ދުވަސް ތެރޭގައި އިޒްރޭލުން ފަލަސްތީނަށް އަޅާފައިވަނީ އަފްގާނިސްތާނަށް އެއް އަހަރުގެ ތެރޭގައި އެޅި ބޮންކަމަށާ އެ ހަމަލާތަކުގެ ސަބަބުން ފަލަސްތީނުގެ 3،000 އެއްހާ މީހުން ޝަހީދުވެ، 10,000 އަށްވުރެ ގިނަ މީހުން މިހާރުވެސް ޒަޚަމްވެފައިވާ ކަމަށެވެ.

އެއްބަނޑު އެއްބަފާ މީހަކަށް މި ކަހަލަ ކަމެއް ދިމާވާއިރު މަޑުން ތިބެވޭނެތޯ ސުވާލު އުފައްދަވައި އިމްރާން ވަނީ ރަސޫލާ ޞައްލައްالله ޢަލައިހި ވަސައްލަމްގެ ހަދީސް ފުޅަށް އަލިއަޅުވާލައްވައި މުއުމިނުންގެ މިސާލަކީ އެއް ހަށިގަނޑެއްގެ މިސާލު ކަމަށާއި އެއް ގުނަވަނުގައި ވޭން އެޅުމުން މުޅި ހަށިގަނޑު ނިދިން މަހުރޫމް ކުރާ ކަމަށް ވިދާޅުވެފައެވެ.

އިމްރާން ވިދާޅުވީ، މުއުމިނު އަޅަކު، އޭނާގެ އަޚާ ނެތް ތަނުގައި އެ އަޚާއަށްޓަކައި ކުރާ ދުއާ، މާތް الله އިޖާބަ ކުރެއްވުން އަވަސް ކަމަށެވެ. އެހެންކަމުން އަޚުންނާއި އުޚުތުންނަށް ޓަކައި ދުޢާކޮށް، މާތް الله މަގުގައި ހޭދަކުރެވެން ހުރި ވަރަކަށް ހޭދަކޮށް، ފަލަސްތީނަށް އެހީވުމަށް އިމްރާން އެދިވަޑައިގަތެވެ.