ގަދަ ހޫނުގެ ސަބަބުން އިންޑިޔާގައި 30 އަށްވުރެ ގިނަ މީހުން މަރުވެއްޖެ

އިންޑިޔާގެ އުއްތަރް ޕްރަދޭޝްގައި ހޫނު ގަދަވުމުގެ ސަބަބުން ފާއިތުވި ދެތިންދުވަސް ތެރޭ 34 މީހަކު މަރުވެފައިވާކަމަށް އިންޑިޔާގެ އޮފިޝަލުން ބުނެފިއެވެ.

އަލްޖަޒީރާގައި ބުނެފައިވަނީ އިންޑިޔާގެ އުތުރުގައި އޮންނަ އުއްތަރް ޕްރަދޭޝްގައި ގަދަ ހޫނުގެ ސަބަބުން 34 މީހަކު މަރުވެފައި ވާކަމަށް އެޤައުމުގެ އޮފިޝަލުން ބުނެފައިވާކަމަށެވެ.

އުއްތަރް ޕްރަދޭޝްގައި ދިރިއުޅޭ 60 އަހަރުން މަތީގެ މީހުންނަށް ދުވާލުގެ ވަގުތުތަކުގައި ގެއިން ބޭރަށް ނުކުމެ ނޫޅުމަށް ޑޮކްޓަރުން ވަނި ލަފާދީފައެވެ.

ގަދަ ހޫނުގެ ސަބަބުން މަރުވި 34 މީހުންނަކީ ވެސް އެކި ބަލިތަކަށް ފަރުވާ ހޯދަމުން އަންނަ 60 އަހަރުން މަތީގެ މީހުން ކަމަށް އަލްޖަޒީރާގައި ބުނެފައިވެއެވެ. އަދި އެމީހުން މަރުވި ކަމަށް، ކަމާއި ބެހޭ ފަރާތްތަކުން ލަފާކޮށްފައިވަނީ ގަދަ ހޫނުގެ ސަބަބުން އެމީހުން ތަހައްމަލް ކުރަމުންދިޔަ ބަލި ބޮޑުވުމެވެ.

އުއްތަރް ޕްރަދޭޝްގެ  ވެރިކަންކުރާ ލަކްނައުގެ އިރުދެކުނުން 300 ކިލޯ މީޓަރު ދުރުގައި އޮންނަ ބަލިއާ ކިޔާ ޑިސްޓްރިކް އަކުން މަރުވި މި 34 މީހުން ގެ މަރާއި ގުޅޭ ގޮތުން ވާހަކަ ދައްކަމުން ބަލިއާގެ ޗީފް މެޑިކަލް އޮފިސަރ ޖަޔަންތް ކުމާރް ބުނެފައިވަނީ ބުރާސްފަތި ދުވަހު 23 މީހެއް މަރުވެގެން ރިޕޯޓް ކޮށްފައި ވާކަމަށާއި ހުކުރު ދުވަހު އިތުރު 11 މީހަކު މަރުވެފައި ވާކަމަށެވެ.

"އޭގެ ކޮންމެ މީހަކީވެސް ކޮންމެވެސް ބައްޔެއް ހުރި މީހެއް، ގަދަ ހޫނުގެ ސަބަބުން ބަލި ހާލަތު އިތުރަށް ގޯސްވީ" ޖަޔަންތް ބުނެފައިވެއެވެ.

އޭނާ ބުނެފައިވަނީ އެއްބަޔަކު ހާޓް އެޓޭކް ޖެހިގެން މަރުވި އިރު އަނެއް ބަޔަކު ސިކުނޑިއަށް ސްޓްރޯކް ޖެހިގެން މަރުވި ކަމަށެވެ. އަދި އެއްބަޔަކު ބޭރަށް ހިންގުންޖެހިގެން މަރުވެފައިވާކަމަށްވެސް އޭނާ ބުނެފައިވެއެވެ.

މިއަހަރުގެ އޭޕްރީލް މަހުވެސް ހޫނުގަދަވެގެން އިންޑިޔާގެ ވެރިކަންކުރާ މުމްބާއީ އިން 13 މީހަކު މަރުވެފައިވެއެވެ. އަދި މުމްބާއީގެ ސްކޫލްތައް ވެސް އެއް ހަފްތާއަށް ބަންދުކުރިއެވެ.