މާދަމާއިން ފެށިގެން މިނީ ބަހުގެ ޚިދުމަތުން އަގު ނަގަނީ، ޓިކެޓް އޮންލައިންކޮށް!

ފުރަ މާލޭގައި ފަށާފައިވާ ރާއްޖެ ޓްރާންސްޕޯޓް ލިންކް (އާރްޓީއެލް) މިނީ ބަހުގެ ޚިދުމަތުން މާދަމާއިން ފެށިގެން އަގު ނަގަން ފަށާއިރު، މި ޚިދުމަތް ހޯދާ ފަރާތްތަކަށް ޓިކެޓް ވިއްކުމަށް ހަމަޖެހިފައިވަނީ އޮންލައިން ކޮށް ކަމަށް އެމްޓީސީސީން ބުނެފިއެވެ.

މާލެ ސަރަހައްދުގައި މިނީ ބަހުގެ ޚިދުމަތް ދޭން ފަށާފައިވަނީ މި ސެޕްޓެމްބަރު މަހުގެ ފަސް ވަނަ ދުވަހުއެވެ. މި ޚިދުމަތް ދިން ފުރަތަމަ ދެ ހަފްތާގައިވެސް ހިލޭ ދަތުރުތައް ކުރެވިފައިވާއިރު މާދަމާއިން ފެށިގެން ދަތުރަކަށް ނަގަން ނިންމާފައި ވަނީ 7 ރުފިޔާއެވެ. އެހެން ނަމަވެސް، ބަހުގަައި ސްކޫލްތަކުގެ ދަރިވަރުންނާއި، ޢުމުރުން 65 އަހަރުން މަތީގެ މީހުންނާއި، ތިން އަހަރުން ދަށުގެ ކުދިންނާއި ޚާއްސަ އެހީއަށް ބޭނުންވާ މީހުންނަށް މުޅިން ހިލޭ ދަތުރު ކުރެވޭނެ ކަމަށް އެމްޓީސީސީން މީގެ ކުރިން ވަނީ ބުނެފައެވެ.

މާދަމާއިން ފެށިގެން ބަހުގެ ޚިދުމަތަށް ފައިސާ ނަގަން ހަމަޖެހިފައިވާ އިރު، މި ޚިދުމަތަށް އާރްޓީއެލް އެޕްލިކޭޝަން އަދި ވެބް ޕޯޓަލް މެދުވެރިކޮށް ފައިސާ ދައްކައި ޓިކެޓް ނެގޭނެއެވެ. އަދި މިޚިދުމަތް އަލަށް ހޯދާއިރު ޚިދުމަތަށް ރަޖިސްޓްރީކުރަން ޖެހޭނެއެވެ. އެއަށްފަހު އެ ލޮގިން، ސޭވްކޮށްލުމުން ދެން އާ ލޮގިންއެއް ހަދާކަށް ނުޖެހޭނެއެވެ.

ޓިކެޓް ނަގާއިރު، އެމީހަކު ބަހުގައި ދަތުރުކުރާ ރޫޓާއި، ޓިކެޓް ނަގާ އަދަދު ޚިޔާރުކޮށް، ބޭންކް ކަރޑް މަޢުލޫމާތާއި އީ.މެއިލް އެޑްރެސްއެއް ޖެހުމުން ފައިސާ ދައްކާ ޓިކެޓް ނެގޭނެއެވެ. މި ޚިދުމަތުގައި ފައިސާ ދައްކާ ކާޑުގެ މަޢުލޫމާތުވެސް ސޭވް ކުރެވޭނެއެވެ.

ފައިސާ ދެއްކުމުން ޓިކެޓް ފެންނާނެއެވެ. ނަގާ ޓިކެޓް 7 ދުވަހުގެ މުއްދަތައް ބޭއްވޭނެއެވެ. ބަހަށް އަރާ ޓިކެޓްގެ ކިއު.އާރް ކޯޑް ސްކޭންކޮށްލުމުން ބަހަށް ފައިސާ ދެއްކުނީއެވެ.

މިވަގުތު ފައިސާ ދެއްކޭނީ ހަމައެކަނި ޕޯޓަލްއާއި އެޕްލިކޭޝަން މެދުވެރިކޮށެވެ. ނަމަވެސް އާއްމުންނަށް މި ޚިދުމަތަށް ފަސޭހައިން ފައިސާ ދެއްކޭނެ ގޮތް ހަމަޖެއްސުމަށް، ކޭޝްކާޑް ބޭނުންކޮށްގެން ވަގުތުން ޓިކެޓަށް ފައިސާ ދެއްކޭނެ އިންތިޒާމް ދަނީ ހަމަޖައްސަމުންނެވެ.

ޚިދުމަތަށް ފަސޭހަކަމާއެކު ޓިކެޓް ނަގާނެގޮތްތަކަށް މީހުން އަހުލުވެރިކުރުވުމުގެ ޕްރޮގްރާމްތަކެއް އެ ޚިދުމަތް ދެމުން އަންނަ އެމްޓީސީސީން އަންނަނީ ކުރިއަށް ގެންދަމުންނެވެ.

މިނީ ބަހަކީ މި ސަރުކާރުގެ 100 ދުވަހުގެ ވައުދެކެވެ. އެކި ފަހަރު އެކި ސަބަބުތަކާހުރެ، އެ ޚިދުމަތް ފެށުން ލަސްވެގެން ދިޔަނަމަވެސް އެ ޚިދުމަތް ފެށުމާއެކު، ދަތުރުފަތުރުކުރުމަށް ބޮޑެތި ލުއި ފަސޭހަތަކެއް ލިބިގެން ގޮސްފައިވާކަމަށް އާއްމުން އަންނަނީ ބުނަމުންނެވެ.