"އިނގިރޭސިވިލާތް އޮތީ އިޒްރޭލުގެ ޔަހޫދީންނާ އެކު; ބޭނުންވަނީ އިޒްރޭލު މޮޅުވާން"
ފަލަސްތީނުގެ ބިންތަކަށް ގަދަކަމުން ވެރިވެ، އެތަނުގައި ވަކި ދައުލަތެއް އުފައްދައި ވަޒަންވެރިވެފައިވާ އިސްރާއީލްގެ ހައްދުފަހަނައަޅާފައިވާ ޔަހޫދީން ފަލަސްޠީނާއި ދެކޮޅަށް ހިންގަމުންދާ ލާ އިންސާނީ ޖަރީމާތަކަށް ތައީދުކޮށް، އެ މައްސަލާގައި އިނގިރޭސިވިލާތުގެ ތާއީދު އޮތީ އިސްރާއީލަށް ކަމަށް އެގައުމުގެ ބޮޑުވަޒީރު ރިޝީ ސުނަކު ބުނެފި އެވެ.
ރިޝީ ސުނަކު މިއަދުގެ ވަގުތެއްގައި، ފަލަސްޠީނު އަތުން ފޭރިގަނެގެން އިޒްރޭލުގެ ޔަހޫދީން ވަޒަންވެރިވެގެން އުޅޭ ސަރަހައްދަށް ގޮސްފައިވާއިރު، އޭނާގެ އެ ދަތުރުގައި އިސްރާއީލްގެ ރައީސް އީސާކް ހަރުޒޯގްއާ، އެ ގައުމުގެ ހަރުކަށި ބޮޑު ވަޒީރު ބެންޖަމިން ނަތަންޔާހޫ އާއިވެސް ވަނީ ބައްދަލުކޮށްފައެވެ.
އެގޮތުން އިސްރާއީލުގެ ރައީސް އާއެކު ބޭއްވި ބައްދަލުވުމުގައި، އިސްރާއީލުގެ ސިފައިން ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތަކަކީ "އަމިއްލަ ދިފާއުގައި" ހިންގަމުންދާ ޖަރީމާތަކެއްގެ ގޮތުގައި ސިފަކުރަމުން ރިޝީ ވަނީ، އެ ލާއިންސާނީ އަމަލުތަކަށް އިނގިރޭސި ވިލާތުން ތާއީދު ކުރާ ކަމަށް ބުނެފައެވެ.
"އަހަރެމެން (އިނގިރޭސިވިލާތް) މިތިބީ އިސްރާއީލާއެކު. އަމިއްލަ ދިފާއުގައި ހަތިޔާރު އުފުލައި، އިސްރާއީލުގެ ސަލާމަތަށްޓަކައި މަސައްކަތް ކުރުމަށް ލިބިފައިވާ ހައްގުގެ ބޭނުން ކޮށްގެން ކުރަމުންދާ ކަންކަމަށް ތާއީދު ކުރަން." ފަލަސްޠީނުގެ އެތައް ހާސް ކުޑަކުދިންނާއި އަންހެނުންނާއި އާއްމުން ޝަހީދު ކުރަމުން އިސްރާއީލުން ހިންގަމުންގެންދާ ޢުދުވާނު ތަކަކީ އަމިއްލަ ދިފާއުގައި ކުރަމުންދާ ކަންކަން ކަމަށް ސިފަ ކުރަމުން ރިޝީ ބުނެފައިވެއެވެ.
އިޒްރޭލުގެ ރައީސް ވަނީ ރިޝީގެ ވާހަކަތަކަށް ޝުކުރު އަދާކޮށް، އޭނާ މިދަނޑިވަޅުގައި އިސްރާއީލުން ވަޒަންވެރިވެފައިވާ ސަރަޙައްދަށް އައުމަކީ އެމީހުންގެ ސިފައިންނަށްވެސް ލިބިގެންދާނެ ބޮޑު ހިތްވަރެއް ކަމަށް ބުނެފައެވެ.
މީގެ އިތުރުން ރިޝީ ސުނަކު ނަތަންޔާހޫއާއެކު ބައްދަލުކޮށް ވާހަކަ ދައްކަމުން ވަނީ، "އިނގިރޭސިވިލާތް ބޭނުންވަނީ އިޒްރޭލް މޮޅުވާން" ކަމަށް ބުނެފައެވެ.
ރިޝީގެ އިތުރުން އެމެރިކާގެ ރައީސް ޖޯ ބައިޑެން ވެސް ވަނީ އިސްރާއިލުން ގަދަކަމުން ވަޒަންވެރިވެފައިވާ ސަރަހައްދަށް މި ފަހުން ދަތުރުކޮއްފައެވެ.
ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސްގެ މުޖާހިދުން، އެގައުމަށް، އެގައުމުގެ ބިންތައް ފޭރިގަނެގެން ދިރިއުޅެމުންދާ އިސްރާއީލްގެ ޔަހޫދީންނަށް ދިން ކުއްލި ހަމަލާއަށް މިހާރު ދެ ހަފްތާވާން ގާތްވެފައިވާއިރު، ހަމާސްގެ ހަމަލާތަކުގެ ރައްދުގައި އިސްރާއީލުން ވަނީ ހަނގުރާމަ އިއުލާންކޮށް ރައްދުގައި ގިނަ ހަމަލާތަކެއް ފަލަސްޠީނުގެ ޢާއްމުންނަށް އަމާޒުކޮށް ދީފައެވެ.
އެގޮތުން ފަލަސްޠީނަށް މިހާރު އިޒްރާއިލުން ދެމުންދާ ހަމަލާތަކުގެ ސަބަބުން ޝަހީދުވި މީހުންގެ ޢަދަދު ގާތްގަނޑަކަށް 4000 ވަނީ އަރައިފައެވެ. ޒަޚަމްވެފައިވާ މީހުންގެ ޢަދަދު 12000މައްޗަށް ވަނީ އަރައިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
