ފަލަސްތީނުގެ އާ ބޮޑު ވަޒީރަކަށް މަހުމޫދު އައްބާސްގެ އެކުވެރި، މުސްތަފާ

ފަލަސްތީނުގެ އާ ބޮޑު ވަޒީރަކަށް ރައީސް މަޙްމޫދު އައްބާސްގެ ޒަމާންވީ އެކުވެރިޔާ އަދި އިކޮނަމިކް އެޑްވައިޒަރު މުޙައްމަދު މުސްތަފާ މުޙައްމަދު އައްޔަންކޮށްފިއެވެ.

މުސްޠަފާ ބޮޑުވަޒީރު އައްޔަންކުރައްވައިފައިވަނީ އިސްރާއީލުން ގަދަކަމުން ފޭރިގެންފައިވާ ފަލަސްތީނުގެ ހުޅަނގުއައްސޭރީގެ ސަރަހައްދުތަކުގެ ވެރިކަންކުރާ ފަރާތްތައް ބަދަލުކޮށް އެ ސަރަހައްދުގެ ވެރިކަން ރަނގަޅުކުރުމަށް އެ ސަރަހައްދުގައި ވެރިކަން ކުރާ ޕަލަސްތީން އޮތޯރިޓީ (ޕީއޭ) އަށް އެމެރިކާގެ ޕްރެޝަރު ބޮޑުވަމުންދާ ދަނޑިވަޅެއްގައެވެ. މުސްތަފާ އަކީ އެމެރިކާއިން ތައުލީމް ހާސިލްކުރައްވައިގެން ހުންނެވި، އިކޮނަމިސްޓެކެވެ.

ބޮޑުވަޒީރުގެ މަގާމު މުސްތަފާއާއި ހަވާލު ކުރެެއްވުމަށްފަހު، ވާހަކަ ދައްކަވަމުން މަހުމޫދު އައްބާސް ވަނީ، ޕީއޭ އިސްލާހުކުރުމަށް އެހީތެރިވުމާއި، ފަލަސްތީނުގައި ދައުލަތެއް ހިންގޭނެ ސިޔާސީ އޮނިގަނޑެއްގެ އެކުލަވާލުމުގެ މަސައްކަތުގައި އެހީވުމަށް އެދިވަޑައިގެންފައެވެ.

ފަލަސްތީނުގެ ދައުލަތުގެ ނޫސް ކަމަށްވާ، ވަފާ ނޫހުން ރިޕޯޓުކޮށްފައިވާ ގޮތުގައި، ޣައްޒާ ގައި ހިނގަމުންދާ ގަތުލު އާއްމުތައް ނިމުމަކަށް ގެނެސް ޣައްޒާ އަލުން އާރާސްތުކުރުމާއި، ޕީއޭގެ މުއްސަސާތައް އިސްލާހު ކުރުމަކ މުސްތަފާގެ ޒިންމާއެކެވެ.

ބޮޑު ވަޒީރުގެ މަގާމަށް މުސްތަފާ އައްޔަނު ކުރެވުނު ނަމަވެސް ރައީސްގެ ހައިސިއްޔަތުން އައްބާސް އަދިވެސް ހުންނެވީ ފަލަސްތީނުގެ އޮތޯރިޓީގެ އެންމެ ބާރުގަދަ ވެރިޔާގެ ގޮތުގައެވެ.

ފަލަސްތީނުގެ ބޮޑުވަޒީރުގެ މަގާމަށް މުސްތަފާ އައްޔަނު ކޮށްފައި މިވަނީ ކުރިން އެ މަގާމުގައި ހުންނެވި، މުހައްމަދު ޝްތައްޔާ މިދިޔަ ފެބްރުއަރީ 26 ވަނަ ދުވަހު މަގާމުން އިސްތިއުފާ ދެއްވުމުންނެވެ.

އިސްތިއުފާ އިއުލާން ކުރައްވަމުން ޝްތައްޔާ ވިދާޅުވީ އޭނާ މަގާމުން އިސްތިއުފާ ދެއްވަން ނިންމެވީ ހަރުކަށި ޔަހޫދީން ގަދަކަމުން ފޭރިގެންފައިވާ ހުޅަނގު އައްސޭރި އާއި ގުދުސްގައި ހަމަނުޖެހުންތަކެއް އުފެދި، ޣައްޒާގައި ހިނގަމުންދާ ހަނގުރާމައާއި ޖަރީމާތަކާއި ބަނޑުހައިހޫނުކަމުގެ ސަބަބުން ކަމަށެވެ.