ބާބްރީ މިސްކިތް ތަޅާލާފައި އެޅި ބޮޑު ފައްޅި ހިމާޔަތް ކުރަން އިންޑިޔާއިން އިސްރާއީލުގެ ހަތިޔާރު ބޭނުންކުރަނީ!

އިންޑިއާގެ އަޔޯދްޔާގައި ހުރި ބާބްރީ މިސްކިތް  ތަޅާލައި އެތަނުގައި އެޅި ހިންދޫ ދީނުގެ އެންމެ ބޮޑު ފައްޅި ކަމުގައިވާ ރާމް މަންދިރް ހިމާޔަތް ކުރުމަށް އިންޑިއާއިން އިސްރާއީލުގެ ހަތިޔާރު ބޭނުންކުރަން ނިންމައިފިއެވެ.

މިގޮތުން ރާމް ފައްޅީގެ ސަލާމަތީ ކަންކަން ރަނގަޅު ކުރުމަށްޓަކައި ހައްދުފަހަނަ އަޅާފައިވާ ޔަހޫދީ އިސްރާއީލުން އުފައްދާފައިވާ އެންޓި ޑްރޯން ސިސްޓަމެއް ބޭނުން ކުރަން ނިންމާފައިވާ ކަމަށް އުއްތަރްޕްރަދޭޝް ސްޓޭޓްގެ ފުލުހުން ވަނީ ބުނެފައެވެ.

އިންޑިއާގެ ފުލުހުން ވަނީ މިހާރު މިތަކެތި ގަތުމަށް ބޭނުންވާ ލިޔެކިޔުންތަކުގެ ޕްރޮކިއުމެންޓް މަސައްކަތްތައް ނިންމާފަފައެވެ. އަދި އިސްރާއީލުން ގެނެވޭ ޒަމާނީ ޝީލްޑް ސިސްޓަމްތަކަކީ އެގައުމުގެ ފުލުހުން މިހާރުވެސް ބޭނުންކުރަމުންދާ އެންމެ ފަހުގެ ޓެކްނޮލޮޖީތަކުގެ ބައެއްގެ ގޮތުގައި ވަރަށް އަވަހަށް ވެގެންދާނެ ކަމަށް ބެލެވޭ ކަމަށް ވެސް އިންޑިއާގެ ފުލުހުން ވަނީ ބުނެފައެވެ.

އުއްތަރްޕަރްދޭޝްގެ ފުލުހުންގެ ތަރުޖަމާނު ސީ އެން އެން - ނިއުސް 18 ޓީވީ ޗެނަލަށް ދިން ހާއްސަ އިންޓަވިއު އެއްގައި ބުނީ އަޔޯދާ ބުދު ފައްޅި އަކީ އިންޑިއާގެ ރައްޔިތުންނަށް ވަރަށް މުހިއްމު ބިނާ އަކަށް ވާތީ އެ ތަނުގެ ސަލާމަތީ ކަންކަން ބެލެހެއްޓުމުގައި އެއްވެސް ކަހަލަ ފަރުވާކުޑަކުރުމެއްގެ ފުރުސަތު ނޯންނާނެ ކަމަށެވެ.

ގާތްގަނޑަކަށް 5 ކިލޯ މީޓަރު ދުރުގައި އޮންނަ ދުޝްމަނު ޑްރޯން ދެނެގަތުމުގެ އިތުރުން އޭގެ ރޭޑަރަށް އަރާ ކޮންމެ ދުޝްމަނު ޑްރޯން އެއް ޑިސްއޭބަލް ކުރާހާ ބާރުގަދަ މި ޑްރޯން ތަކުގެ ގާތްގަނޑަކަށް 10 ޑްރޯން އިންޑިއާގެ ފުލުހުން ގަތުމުގެ މަސައްކަތް އަންނަނީ ކުރަމުންނެވެ.

އިންޑިއާއިން ރާމް މަންދިރް އެޅި ބިމަކީ  1528 ވަނަ އަހަރު ބިނާކޮށްފައިވާ ކަމަށްވާ ބާބްރީ މަސްޖިދް ނަމަކަށް ކިޔުނު މިސްކިތެއް ހުރި ބިމެކެވެ. މި މިސްކިތް ތަޅާލާފައިވަނީ 1992 ގެ ޑިސެންބަރު މަހުގެ 6 ވަނަ ދުވަހު 10 އަހަރުވަންދެން ކުރި އަނިޔާވެރި ކެމްޕޭނަކަށް ފަހު، ހިންދޫ ދީނުގެ ބަޔަކު އެމީހުންގެ ދީނީ ޝިއާރުތައް ކިޔަމުން ގޮސްފައެވެ. މި މިސްކިތް ތަޅާލުމަށް ހިންގި ހަމަނުޖެހުން ތަކުގައި 2000 އަށް ވުރެ ގިނަ މީހުން ވަނީ މަރުވެފައެވެ.

އެތާނގައި އެ ފައްޅި އެޅީ ހިންދޫ ދީނުގެ މީހުން ގަބޫލު ކުރާ ގޮތުގައި އެ ބިމަކީ ހިންދޫންގެ ކަލާނގެ ރާމްއަށް އުފަންވި ބިމަށްވާތީ ރާމް އަށް ޚާއްޞަކޮށްފައިވާ ފައްޅިއެއް ކަމަށް ބުނެފައެވެ. މި ފައްޅި އަކީ މި އަހަރުގެ މާޗް އަދި މޭ މަހާއި ދެމެދު ބޭއްވުމަށް ހަމަޖެހިފައިވާ އިންޑިއާގެ އިންތިޚާބުގައި ބޮޑު ވަޒީރު ކަން އަނެއްކާވެސް ހޯދުމަށް މިހާރު އެގައުމުގެ ބޮޑު ވަޒީރު ކަމުގެ މަގާމުގައި ހުންނެވި މޯދީ ގެ "ކެމްޕޭން އުކުޅެއް" ކަމަށް ބައިނަލްއަގުވާމީ ނޫސްތަކުން ރިޕޯޓް ކުރެއެވެ.

މި ބިމުގެ ބަދަލުގައި އަޔޯދްޔާގެ ބޭރުގައި އޮންނަ ދަންނިޕޫރު އަވަށުގެ ވަކި ބިންކޮޅެއް، ބާބްރީ މަސްޖިދުގެ ބަދަލުގައި އިނޑިއާގެ މުސްލިމުންނަށް ބޭނުންކުރެވޭނެ މިސްކިތެއް އެޅުމަށް ދީފައިވާއިރު، މި މިސްކިތުގެ މަސައްކަތް އަދި ނުފަށައެވެ.