ތާރު މަތީގައި ކެއުމަށް ފަސިންޖަރުންނަށް ހުއްދަ ދިނުމުން އިންޑިގޯ 144،000 ޑޮލަރުން ޖޫރިމަނާކޮށްފި

އިންޑިއާގެ އެއާލައިން އިންޑިގޯގެ މަތިންދާބޯޓުގެ ކައިރީގައި ތާރު މަތީގައި ކެއުމަށް ފަސިންޖަރުންނަށް ހުއްދަ ދިނުމުން އިންޑިގޯ 144،000 ޑޮލަރުން ޖޫރިމަނާކޮށްފިއެވެ.

އިންޑިގޯއިން ޕަސެންޖަރުންނަށް ފްލައިޓުން ބޭރަށް ނުކުމެ، ތާރު މަތީގައި ތިބެ ކެއުމުގެ ހުއްދަ ދިނީ މުމްބާއީ އެއާޕޯޓުގައި އޮތް އެ ފްލައިޓް ޑިލޭ ވުމުންނެވެ.

ތާރު މަތީ މީހުން ތިބެގެން ކާ މަންޒަރު ފެންނަ ވީޑީއޯއެއް ވައިރަލް ވެފައިވާއިރު އިންޑިގޯ ޖޫރިމަނާ ކޮށްފައިވަނީ ވައިގެ މަގުން ދަތުރުކުރާ މީހުންގެ ރައްކާތެރިކަން މޮނިޓަރ ކުރާ ޑިރެކްޓަރޭޓް ޖެނެރަލް އޮފް ސިވިލް އޭވިއޭޝަނުންނެވެ. އެއީ ފާއިތުވި އަހަރުތަކުގައި އިންޑިއާގެ އެއާލައިނަކަށް އެފަދަ އެންމެ ބޮޑު ޖޫރިމަނާއެއް ކަމަށް އިންޑިއާ ޓައިމްސް އިން ރިޕޯޓްކޮށްފައިވެ އެވެ.

މި މައްސަލަ ބިއުރޯ އޮފް ސިވިލް އޭވިއޭޝަން ސެކިއުރިޓީއަށް ރިޕޯޓް ކޮށްފައިނުވާތީ މުމްބާއީ އެއާޕޯޓް ވެސް ވަނީ 36،000 ޑޮލަރުން ޖޫރިމަނާކޮށްފަ އެވެ.

ޖެނުއަރީ 14 ވަނަ ދުވަހު ގޯއާ އިން ދިއްލީއަށް ދިޔަ އިންޑިގޯގެ ފްލައިޓެއް ޑައިވަރޓްކޮށް މުމްބާއީއަށް ޖައްސަން މަޖުބޫރުވީ ފޮގްގެ ސަބަބުން ތަންތަން ފެނުމަށް ދަތިވުމުގެ ސަބަބުންނެވެ. ބޯޓު ފުރަންދެން ފަސިންޖަރުންނަށް ބޯޓުން ފައިބައިގެން ދިއުމަށް ހުއްދަ ދިނުމުން ގިނަ ބަޔަކު ވަނީ ތާރު މަތީ ތިބެގެން ކައިފައެވެ.

ސޯޝަލް މީޑިއާގައި އާންމުވި ވީޑިއޯގައި އެއާޕޯޓުގެ ތާރުމަތީގައި އިށީނދެގެން ތިބި ފަސިންޖަރުން ކާބޯތަކެތި އެކަކު އަނެކަކަށް ދިނުމާއި މޯބައިލް ފޯނު ބޭނުންކުރުމާއި އިންޑިގޯ މަތިންދާބޯޓުގެ ކައިރީގައި އަރާމުކުރާ މަންޒަރު ފެނެއެވެ.

މިކަމާއި ގުޅިގެން އިންޑިގޯ އިން ވަނީ ކަސްޓަމަރުންގެ ކިބައިން މާފަށް އެދި ކުރިއަށް އޮތްތަނުގައި މިފަދަ ހާދިސާތަކުން ސަލާމަތްވުމަށް އަޅަންޖެހޭ ފިޔަވަޅުތައް އަޅާނެ ކަމަށް ބުނެފައެވެ.