އިންޑިއާ-އެމެރިކާ ވިޔަފާރީގެ އެއްބަސްވުން މިއަހަރު ނިމޭނެ!

އިންޑިއާއާއި އެމެރިކާއާ ދެމެދު އެކުލަވާލާ ވިޔަފާރީގެ އެއްބަސްވުމުގެ ފުރަތަމަ ބައި މިއަހަރުގެ ޚަރީފު މޫސުމުގެ ނިޔަލަށް ނިންމާލެވޭނެކަމަށް އުއްމީދުކުރެވޭކަމަށް އިންޑިއާގެ މާލީ ވަޒީރު ނިރްމަލާ ސިތާރަމަން ވިދާޅުވެއްޖެއެވެ.

އެމެރިކާއަށް ކުރައްވާ ދަތުރުފުޅެއްގައި ސެންފްރެންސިސްކޯގައި ދިރިއުޅޭ އިންޑިއާ ރައްޔިތުންނާ ބައްދަލުކުރައްވައި ވާހަކަ ދައްކަވަމުން ނިރްމަލާ ވިދާޅުވީ، އެމެރިކާއާއެކު މަޝްވަރާކުރަނީ ހަމައެކަނި ޓެރިފްތަކުގެ މައްސަލައިގައި ނޫންކަމަށާއި، އިންޑިއާގެ ވިޔަފާރީގެ އެންމެ ބޮޑު އެއް ބައިވެރިޔާއާއެކު މުހިއްމު މަޝްވަރާތަކެއް ކުރަން ޖެހިފައިވާކަމަށެވެ.

ނިރްމަލާ އެމެރިކާއަށް ކުރައްވާ ދަތުރުފުޅުގައި އައި.އެމް.އެފް އަދި ވޯލްޑް ބޭންކުގެ ބަހާރު މޫސުމުގެ ބައްދަލުވުންތަކުގައި ވޮޝިންޓަން ޑީސީގައި ބައިވެރިވެވަވަޑައިގަންނަވާނެއެވެ. އަދި ޖީ-20 ގެ ގައުމުތަކުގެ މާލީ ވަޒީރުންނާއި މަރުކަޒީ ބޭންކްތަކުގެ ގަވަރުނަރުންގެ ބައްދަލުވުމުގައި ބައިވެރިވެވަޑައިގަންނަވާނެއެވެ. އަދި އެމެރިކާގެ މާލީ ވަޒީރު ސްކޮޓް ބެސެންޓްއާއި، ޔޫ.އެސް ޓްރޭޑް ރެޕްރެޒެންޓޭޓިވްގެ އޮފީހުގެ އިސްވެރިންނާއިވެސް ބައްދަލުކުރައްވާނެ ކަމަށް އިންޑިއާއިން ބުނެއެވެ.

އެމެރިކާއިން އެކި ގައުމުތަކުން އެތެރެކުރާ މުދަލުން ޓެރިފް ނެގުމުގެ މައްސަލަ ބޮޑުވެފައިވާ މިދަނޑިވަޅުގައި، މިމައްސަލައިގައި އިންޑިއާގެ ފަރާތުން އެމެރިކާއާއެކު މަޝްވަރާކުރާ ޗީފް ނެގޯޝިއޭޓަރ ރަޖޭޝް އަގަރްވާލްވެސް މި ހަފްތާގެ ބުދަ ދުވަހު އެމެރިކާއަށް ވަޑައިގަންނަވާނެއެވެ.

އަނެއްކޮޅުން އެމެރިކާގެ ނައިބު ރައީސް ޖޭ.ޑީ ވޭންސް މިހާރު އުޅުއްވަނީ ރަސްމީ ދަތުރުފުޅެއްގައި އިންޑިއާގައެވެ.