ހެޔޮ ފިހާރައިން ދެ ގަޑިއިރުތެރޭ ބައިލައްކައަށްވުރެ ގިނަ ރުފިޔާ ފަލަސްޠީނަށް!

ހެޔޮ ފިހާރަ 1 އަދި ހެޔޮ ފިހާރަ 2 ކުން ހާލުގައި ޖެހިފައިވާ ފަލަސްޠީނުގެ އަހުންނާއި އުހުތުންނަށް އެހީވުމަށް މިއަދު ކުރިއަށް ގެންދިޔަ ފަންޑު ރައިސިން އިވެންޓަށް 2 ގަޑި އިރުން ބައި ލައްކައަށް ވުރެ ގިނަ ރުފިޔާ ލިބިއްޖެއެވެ.

މިމަހު 7 ވަނަ ދުވަހު، ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސް ޖަމާއަތުން އެގައުމަށް ގަދަކަމުން ވެރިވެގެންފައިވާ އިސްރާއިލަށް އަމާޒުކޮށް ދިން ކުއްލި ހަމަލާއާއި ގުޅިގެން އިސްރާއީލުން ވަނީ ފަލަސްތީނާ ދެކޮޅަށް ހަނގުރާމަ އިއުލާންކޮށްފައެވެ. އެއާއެކު, އެމީހުންގެ ވަރުގަދަ ހަމަލާތައް ކެނޑިނޭޅި ފަލަސްޠީނުގެ ކުޑަކުދިންނާއި އަންހެނުން ހިމެނޭހެން އާއްމުންނަށް އަމާޒުކުރަމުންދާއިރު, ހަނގުރާމައިގެ ސަބަބުން އެތައް ހާސް މުސްލިމުން ވަނީ އަސާސީ ހައްގުތަކުން މަހްރޫމްވެ ބިކަ ހާލުގައި ޖެހިފަ އެވެ.

އެ ރައްޔިތުންނަަށް އެހީވުމަށް އިންޓަނޭޝަނަލް އެއިޑް ކެންޕެއިން (އައިއޭސީން) ހުޅުވާލާފައިވާ ފަންޑް ރެއިޒިން އިވެންޓަށް ފައިސާ ހަދިޔާ ކުރުމަށް ހެޔޮ ފިހާރަ 1 އަދި ހެޔޮ ފިހާރަ 2 އިން މިއަދު ވަނީ ފަންޑް ރެއިޒިން އިވެންޓެއް ކުރިއަށް ގެންގޮސްފައެވެ.

އެގޮތުން މިއަދު، ހެޔޮފިހާރަ 1 އަދި ހެޔޮފިހާރަ 2 އިން ކުރާ ވިޔަފާރީގެ %50 ފަލަސްޠީނުގެ އަހުންނާއި އުހުތުންނަށް ހަދިޔާ ކުރުމަށް އެ ފިހާރައިން ނިންމާފައިވާއިރު، ފަންޑު ފޮށްޓެއްވެސް ވަނީ އެ ފިހާރައިގައި ބަހައްޓާފައެވެ. އަދި އެ ފަންޑު ރައިސިން އިވެންޓުން 2 ގަޑި އިރުން 55541.50 ރުފިޔާ ލިބިފައިވާ ކަމަށް އެ ފިހާރައިން ބުނެފައިވެއެވެ.

އެ ފައިސާ މިހާރު އިންޓަނޭޝަނަލް އެއިޑް ކެމްޕޭންގެ އެކައުންޓަށް ޖަމާކުރެވިފައިވާއިރު، މި އިވެންޓުގައި ބައިވެރި ހެޔޮފިހާރައިގެ ހުރިހާ ކަސްޓަމަރުންނަށް އެ ފިހާރައިން ވަނީ ވަރަށް ބޮޑަށް ޝުކުރު އަދާކޮށްފައެވެ.