ފިރިމީހާ މަސް ބޭނުމަށް ދެވި ހިފާފައިވާތީ ވަރިވާން ސިޓީލައިފި

ޗައިނާގެ ޝަންގޑޮންގް ޕްރޮވިންސްގައި ދިރިއުޅެމުންދާ ދެމަފިރިންގެ ތެރެއިން، ފިރިމީހާ މަސް ބޭނުމަށް މާބޮޑަށް ދެވި ހިފާފައިވާތީ އޭނާ ކައިރިން ވަރިވުމަށް އޭނާގެ އަންހެނުން ސިޓީ ލައިފިއެވެ.

ޗައިނާގެ ނޫހުން މި މައްސަލައާ ހަވާލާދީ ބުނެފައިވަނީ، ވަރިވުމަށް ސިޓީ ލާފައިވާ އަންހެން މީހާގެ ނަމަކީ ޖާންގ ކަމަށެވެ. އަދި އޭނާ ވަރިވުމަށް އެދިފައިވަނީ މުޅި ދުވަހު ބުރަކޮށް އެކަނި އުޅެން ޖެހުމުންނެވެ.

އެގޮތުން، ވަރިއަށް އެދި މައްސަލަ ކޯޓަށް ހުށަހަޅަމުން އަންހެން މީހާ ވަނީ، އިނދެގެން އުޅޭތާ 10 އަހަރު ވީއިރުވެސް، ފިރިމީހާގެ ހުރިހާ ވަގުތެއް ހުސްކޮށްފައިވަނީ މަސްބާނަން ކަމަށާ، އޭގެ ސަބަބުން ދަރިން ބެލުމާއި ގޭތެރޭގެ ހުރިހާ ކަމެއް އަންހެން މީހާ ކުރަން ޖެހެނީ އެކަނިކަމަށް ބުނެފައެވެ. އަދި ފިރިމީހާ ވަޒީފާއަކަށް ނުދާ އިރު، އޭނާ ގޭތެރޭގެ އެއްވެސް ކަމެއްގެ އެހީތެރިވެ ނުދޭ ކަމަށާ، ގިނަ ވަގުތު ހޭދަކުރަނީ މަސް ބޭނުމުގައި ކަމަށް ބުނެފައިވެއެވެ.

މީގެ އިތުރުން، ޗައިނާގެ ނޫހުން ރިޕޯޓް ކޮށްފައިވާ ގޮތުގައި، އަންހެންމީހާ ވަރިވުމަށް ސިޓީލުމުން ކޯޓުގައި ހާޒިރުވާންވެސް ފިރިމީހާއަށް ވަގުތެއް ނުވި ކަމަށާ، އެގޮތަށް ދިމާވީ އެގަޑީގައިވެސް އޭނާ މަހަށް ގޮސްފައިވީމައެވެ.

އެދެމީހުން ވަރިކޮށްދެމުން ގާޒީ ބުނެފައިވަނީ، މަސް ބޭނުމަށް ޝައުގުވެރިކަން ހުރުމަކީ ގޯސް ކަމެއް ނޫން ކަމަށެވެ. އެހެންނަމަވެސް އެއްވެސް ކަމަކީ އޭގެ ހައްދުން ބޭރުވުމުން ރަނގަޅު ކަމެއް ނޫން ކަމަށާއި، ކައިވެނިކޮށްގެން އުޅޭއިރު، އާއިލާއަށް ވަގުތު ދިނުމަކީ މުހިއްމު ކަމެއްކަމަށެވެ.