ބަނޑަށް 24 ހަފްތާ ވުމުގެ ކުރިން ދަރިފުޅު މަރާލުން ހުއްދަ ކަމަަށް އިންޑިއާއިން ނިންމައިފި

މާ ބަނޑު އަންހެނާގެ ބަނޑަށް 24 ހަފްތާ ވުމުގެ ކުރިން އޭނާގެ ބަނޑުގައި އޮންނަ ދަރިފުޅު މަރާލުމަކީ، ނުވަތަ އެބޯޓް ކޮށްލުމަކީ ހުއްދަ ކަމެއް ކަމަށް އިންޑިއާގެ ސްޕްރީމްކޯޓުން ނިންމައިފިއެވެ.

މިދިޔަ ބުރާސްފަތި ދުވަހު އިންޑިއާގެ ސްޕްރީމްކޯޓުގެ ފަނޑިޔާރު ޑީ.ވައި.ޗަންދްރަޗޫދު ކުރި ހުކުމެއްގައި ބުނެފައިވަނީ، މީހަކާ އިނދެގެން ހުރި އަންހެނެއް ކަމުގައި ވިޔަސް، މީހަކާ ނުއިނދެ ހުރި އަންހެނެއް ކަމުގައި ވިޔަސް، ބަނޑަށް 24 ހަފްތާގައި ބަނޑުގައި އޮންނަ ދަރިފުޅު އެބޯޓް ކޮށްލުމަކީ ގާނޫނީ ގޮތުން ހުއްދަ ކަމެއް ކަމަށެވެ. އަދި އަންހެނާ ކައިވެންޏެއް ކޮށްގެން ހުރުމަކީ ނުވަތަ ހުސްހަށިބައިކޮށް ހުރުމަކީ އޭނާ ދަރިފުޅު އެބޯޓް ކުރުމުގެ ހައްގުން އުނިކުރުވާ ކަމެއް ނޫން ކަމަށްވެސް އެ ކޯޓުން ބުނެފައިވެއެވެ.

"ބަނޑުގައި އޮންނަ ދަރިފުޅު އެބޯޓް ކޮށްލަންވީތޯ ނުވަތަ ނޫންތޯ ނިންމުމަކީ އަންހެންމީހާގެ ހައްގެއް. އެ ނިންމުން ނިންމަންވާނީ، އެހެން އެއްވެސް މީހެއްގެ ނުފޫޒެއް ނެތި" އިންޑިއާ ގެ ސްޕްރީމް ކޯޓުގެ ނިންމުމުގައި ވެއެވެ.

އިންޑިއާގެ ސްޕްރީމްކޯޓުން މި ނިންމުން ނިންމާފައި މިވަނީ، ނަހަލާލަށް އަންހެނަކު ބަލިވެ އިނދާ، އޭނާ ޒިނޭ ކުރި ފިރިހެން މީހާ، އެ އަންހެން މިހާ އާއި ގުޅުން ކަނޑައިލުމުން، އަންހެނާގެ ބަނޑުގައި އޮތް ދަރިފުޅު އޭނާ އެބޯޓް ކުރަން ބޭނުންވެ، އެކަމާއި ގުޅޭގޮތުން ޕެޓިޝަނެއް ކޯޓަށް ހުށަހެޅުމާއި ގުޅިގެންނެވެ.

އިންޑިއާގެ މަތީ ކޯޓުން މިފަދަ ނިންމުމެއް ނިންމާފައިވާއިރު މިކަމުގެ ސަބަބުން، އިންޑިއާގައި ހަށިވިއްކުމުގެ ވިޔަފާރިއާއި، އެފަދަ ނުބައި ފާހިޝް ކަންކަން އިންތިހާއަށް އިތުރުވެގެންދާނެ ކަމަށް މީސްމީޑިއާ އެކަމާއި ގުޅިގެން ޚިޔާލު ފާޅުކޮށްފައިވާ މީހުން ބުނެއެވެ. އަދި، އިންޑިއާ އަކީ މުސްލިމުންގެ ބޮޑު އާބާދީއެއް އޮންނަ ގައުމަކަށް ވާއިރު، މިފަދަ ނިންމުމެއް ނިންމުމަކީ، މުސްލިމުންގެ މެދުގައި ޒިނޭ އާއި ފާހިޝް ކަންކަން ފަދަ ހަރާމް ކަންކަން އިތުރުވެގެންދާނެ ކަމެއް ކަމަށްވެސް މީހަކު ބުނެފައިވެއެވެ.

އަދި މީގެ އިތުރުން، އިސްލާމް ދީނުގައި ބަނޑުގައި އޮންނަ ދަރިފުޅު ވައްޓާލުން ކޮންމެ ކޮންމެ ހާލަތެއްގައި ހުއްދަ ވެސް ނުވާއިރު، މިއީ ނުހައްގުން ތުއްތު ފުރާނައެއް ގަސްތުގައި މަރާލުން ކަމުގައިވެސް އެއަށް ކޮމެންޓު ކޮށްފައި ހުރި އިންޑިއާގެ މުސްލިމުން ބުނެފައިވެއެވެ.