ބާބްރި މިސްކިތް ތަޅާލި ބިމުގައި ހިންދޫ ދީނުގެ އެންމެ ބޮޑު ފައްޅި އަޅައި ނިންމައިފި

އިންޑިއާގެ އަޔޯދްޔާގައި ހުރި މިސްކިތެއް ތަޅާލައި އެތަނުގައި ހިންދޫ ދީނުގެ އެންމެ ބޮޑު ފައްޅި ކަމުގައިވާ ރާމް މަންދިރް އަޅައިފިއެވެ.

އެތަނުގައި ހުއްޓާ ތަޅާލި މިސްކިތަކީ 1528 ވަނަ އަހަރު ބިނާކޮށްފައިވާ ކަމަށްވާ ބާބްރީ މަސްޖިދް ނަމަކަށް ކިޔުނު މިސްކިތެކެވެ. މި މިސްކިތް ތަޅާލާފައިވަނީ 1992 ގެ ޑިސެންބަރު މަހުގެ 6 ވަނަ ދުވަހު 10 އަހަރުވަންދެން ކުރި އަނިޔާވެރި ކެމްޕޭނަކަށް ފަހު، ހިންދޫ ދީނުގެ ބަޔަކު އެމީހުންގެ ދީނީ ޝިއާރުތައް ކިޔަމުން ގޮސްފައެވެ. މި މިސްކިތް ތަޅާލުމަށް ހިންގި ހަމަނުޖެހުން ތަކުގައި 2000 އަށް ވުރެ ގިނަ މީހުން ވަނީ މަރުވެފައެވެ.

އަހަރުތަކެއް ވަންދެން މި މައްސަލަ އާންމުނަށް ސިއްރުކޮށްފައި ބޭއްވުމަށްފަހު ، ނޮވެމްބަރު 2019 ގައި އިންޑިއާގެ ސުޕްރީމް ކޯޓުން ވަނީ އެތަން ހިންދޫ ފައްޅިއެއް އެޅުމުގެ މަސައްކަތް ކުރާ ބަޔަކާއި އެ ބިން ހަވާލު ކުރުމަށް އަންގާފައެވެ.

އެތާނގައި އެ ފައްޅި އެޅީ ހިންދޫ ދީނުގެ މީހުން ގަބޫލު ކުރާ ގޮތުގައި އެ ބިމަކީ ހިންދޫންގެ ކަލާނގެ ރާމްއަށް އުފަންވި ބިމަށްވާތީ ރާމް އަށް ޚާއްޞަކޮށްފައިވާ ފައްޅިއެއް ކަމަށް ބުނެފައެވެ.

މި ބިމުގެ ބަދަލުގައި އަޔޯދްޔާގެ ބޭރުގައި އޮންނަ ދަންނިޕޫރު އަވަށުގެ ވަކި ބިންކޮޅެއް، ބާބްރީ މަސްޖިދުގެ ބަދަލުގައި އިނޑިއާގެ މުސްލިމުންނަށް ބޭނުންކުރެވޭނެ މިސްކިތެއް އެޅުމަށް ދީފައިވާއިރު، މި މިސްކިތުގެ މަސައްކަތް އަދި ނުފަށައެވެ.

ނަމަވެސް އިންޑިއާގެ ސަރުކާރުން ވަނީ މި ފައްޅި އެޅުމަށް 11.8 ބިލިއަން އިންޑިއަން ރުޕީސް ނުވަތަ 142 މިލިއަން ޑޮލަރު ވަނީ ޚަރަދުކޮށްފައެވެ.

"ބާބްރީ ހުރި ތަނާ ކައިރިން މިސްކިތް ބިނާކުރިނަމަ އަޅުގަނޑުމެންނަށް އަނިޔާވެރިކަމެއް ނުހިނގާކަން އަޅުގަނޑުމެންނަށް ގަބޫލުކޮށްދޭން މަސައްކަތް ކުރެވުނީސް. މިސްކިތް ހުރި ބިމާއި މާދުރުގައި އާ މިސްކިތް އަޅަން ބިން ދީފައި ހުރި އިރު އަދި އެތަން ހެދުމުގެ މަސައްކަތް ވެސް ފެށިފައެއް ނުވޭ. އެހެންވީމާ އަޅުގަނޑުމެން ކީކޭ ބުނާނީ؟"

ބާބްރީ މިސްކިތުގެ ހައްގުގައި ވަކާލާތު ކުރި މަހްބޫބް ބުންޏެވެ.

މިސްކިތް އެޅުމުގައި އިސްކޮށް އުޅޭ އިންޑިއާގެ ވެރިކަން ކުރާ ޕާޓީ  ބީޖޭޕީގެ މެމްބަރެއް ކަމުގައިވާ އަރަފާތު ޝައިޚް ބުނީ ލަސްތަކެއް ކުރިމަތިވީ އިމާރާތުގެ ޑިޒައިންއާ މެދު ޚިޔާލުތަފާތުވުންތަކެއް ހުރުމުން ނަމަވެސް ގަބޫލުކުރާ ގޮތުގައި އާ މިސްކިތަކީ އިންޑިއާގައި ފަސް މުންނާރު ހިމެނޭ ފުރަތަމަ މިސްކިތަކަށް ވާނެ ކަމަށެވެ.

މި ފައްޅި މިއަދު ހުޅުވުމަށް ހަމަޖެހިފައިވާއިރު މި ރަސްމިއްޔާތުގައި އިންޑިއާގެ ބޮޑު ވަޒީރު ނަރެންދްރަ މޯދީ ވެސް ބައިވެރިވެ ވަޑައިގަންނަވާނެއެވެ. މި ފައްޅި އަކީ މި އަހަރުގެ މާޗް އަދި މޭ މަހާއި ދެމެދު ބޭއްވުމަށް ހަމަޖެހިފައިވާ އިންޑިއާގެ އިންތިޚާބުގައި ބޮޑު ވަޒީރު ކަން އަނެއްކާވެސް ހޯދުމަށް މިހާރު އެގައުމުގެ ބޮޑު ވަޒީރު ކަމުގެ މަގާމުގައި ހުންނެވި މޯދީ ގެ "ކެމްޕޭން އުކުޅެއް" ކަމަށް ބައިނަލްއަގުވާމީ ނޫސްތަކުން ރިޕޯޓް ކުރެއެވެ.