ލަންކާގެ ރައީސަކަށް އަނޫރާ ހޮވިދާނެ ކަމަށް ބެލެވެން ފަށައިފި!

ސްރީލަންކާގެ ރިޔާސީ އިންތިޚާބުގައި ވާދަކުރައްވާ ނުފޫޒުގަދަ ސިޔާސީ ވަރުގަދަ ލީޑަރުން ބަލިކޮށް ކުޑަ ޕާޓީއަކުން ކުރިމަތިލައިފައިވާ އަނޫރާ ކުމާރަ ޑިސެނަޔަކަ ކުރިއަރަމުންދާކަމަށް މީޑިއާ ރިޕޯޓްތައް ބުނެފިއެވެ.

ލަންކާގައި އިއްޔެ އޮތް ރިޔާސީ އިންތީޚާބުގައި ވޯޓުލާ ނިމި މިހާރު ކުރިއަށް ދަނީ ވޯޓު ގުނުމުގެ މަސައްކަތްތަކެވެ. މިހާތަނަށް ގުނި ވޯޓުތަކުން ވާދަވެރި ނަތީޖާއެއް ފާޅުވަމުން އަންނައިރު ގިނަ ބަޔަކު ބުނަނީ އިންތިޚާބު ކާމިޔާބުކުރައްވާނީ އަނޫރާ ކުމާރު ޑިސަނަޔަކެ ކަމަށެވެ.

ސްރީލަންކާގައި އިއްޔެ ބޭއްވުނު ރިޔާސީ އިންތިޚާބުގެ ޕޯސްޓަލް ވޯޓުގެ 7 ދާއިރާއެއްގެ ނަތީޖާ މިހާތަނަށް ލިބިފައިވާއިރު، "ނޭޝަނަލް ޕީޕަލްސް ޕަވަރ" (އެންޕީޕީ) ގެ ލީޑަރު އަނޫރަ ކުމާރަ ދިސަނާޔަކެ ވަނީ އެހެން ކެންޑިޑޭޓުންނަށްވުރެ ބޮޑު ތަފާތަކުން ކުރިއަރައިފައެވެ. މި ނަތީޖާތަކުން އޭނާ ވަނީ ސްރީލަންކާގެ ނުވަވަނަ އިންތިޚާބީ ރައީސަކަށް ވުމުގެ ފުރުސަތު ބޮޑުވެފައެވެ.

އޭނާއަށް 52 ޕަސެންޓް ވަނީ ލިބިވަޑައިގެންފަ އެވެ. ރަނިލްއަށް 16.4 ޕަސެންޓް، ސަޖިތަށް 23.86 ޕަސެންޓް އަދި ނަމާލްއަށް 2.94 ޕަސެންޓް އެވެ.

އިންތިޚާބުގެ ވޯޓުލުން ކުރިއަށް ދިޔައީ ހޮނިހިރު ދުވަހު ހެނދުނު 7 ން ހަވީރު 4 އަށެވެ. މުޅި ޤައުމުގެ 13,400 އަށްވުރެ ގިނަ ވޯޓުލާ މަރުކަޒުތަކެއްގައި ވޯޓުލުން ކުރިއަށް ދިޔައެވެ.

ޑިސަނަޔަކެ ހޯއްދަވަމުންދާ ނަތީޖާއަށް ލަންކާ ސަރުކާރުގެ ބައެއް ވަޒީރުން މަރުހަބާ ދަންނަވައި އެއްބާރުލުން ދެއްވާނެ ކަމަށް ވިދާޅުވެ މިހާރުވެސް ދަނީ ސޯޝަލް މީޑިއާތަކުގައި ޝުއޫރު ފާޅުކުރައްވަމުންނެވެ.

ރިޕޯޓްތައް ބުނާ ގޮތުން ލަންކާގެ ސިޔާސީ މައިދާނުން ޑިސަނަޔަކެއަށް ކުއްލި މަޝްހޫރުކަމެއް ލިބިވަޑައިގެންފައި މިވަނީ އާންމުންގެ ޝުއޫރުތަކާ އޭނާ ކުޅުއްވާލެއް މޮޅުކަމުންނެވެ.

ލަންކާގެ އިގުތިސާދަށް އޮތް އެންމެ ބޮޑު ނުތަނަވަސް ކަމަކީ ކޮރަޕްޝަން ކަމަށް ޑިސަނަޔަކެ ވިދާޅުވި އެވެ. ނިކަމެތި މީހާއަށް ވަޒީފާއެއް ނުދެވިގެން އުޅެނީ މަޝްހޫރުކަން ހޯދަން ވެރިން މަސައްކަތްކުރާތީ ކަމަށް ވެސް އޭނާ ވިދާޅުވި އެވެ.

ދިސަނާޔަކެ ކާމިޔާބުކޮށްފިނަމަ، އޭނާއަކީ ސްރީލަންކާގެ ފުރަތަމަ މާކްސިސްޓު ރައީސްކަމަށް ވާނެއެވެ.