ދަތުރުވެރިންނަށް ބޭނުންވާ ހިދުމަތްތައް ގާއިމުކުރާނެ ކަމުގެ ޔަގީންކަން އާރްއޭސީއެލް އިން ދީފި

ދަތުރުކުރާ ފަރާތްތަކަށް ބޭނުންވާ އެންމެހައި ޙިދުމަތްތަކެއް ޤާއިމްކޮށްދޭނެ ކަމުގެ ޔަގީންކަން ރީޖަނަލް އެއަރޕޯޓްސް ކޮމްޕްނީ ލިމިޓެޑްގެ މެނޭޖިންގ ޑިރެކްޓަރ އަޙްމަދު މުބީން ދެއްވައިފިއެވެ.

މުބީން މިފަދައިން ވިދާޅުވީ އެ ކުންފުނީގެ 3 ވަނަ އަހަރީ ދުވަހާއި ގުޅިގެންނެވެ.

މުބީން ވަނީ  ރީޖަނަލް އެއަރޕޯޓްސް ކޮމްޕްނީ ލިމިޓެޑުން ހިންގަމުންދާ އެއަރޕޯޓްތަކުގެ ޙިދުމަތްތައް މިހާރަށް ވުރެއް ފުޅާކޮށް، އެ އެއާޕޯޓުތަކުން ދަތުރުކުރާ ފަރާތްތަކަށް ބޭނުންވާ އެންމެހައި ޙިދުމަތްތަކެއް ޤާއިމްކޮށްދޭނެ ޔަގީންކަން ދީފައެވެ.

މީގެ އިތުރުންވެސް އެބޭފުޅާ ވިދާޅުވީ އެ ކުންފުނި އުފައްދައި ކުންފުންޏާއި އެއަރޕޯޓްތައް ހަވާލުކުރެވުނު އިރު އޮތީ ވަރަށްވެސް ދަށް ހާލަތެއްގައި ކަމަށާއި ނަމަވެސް މިއަދު އެ ކުންފުނީގައި މަސައްކަތް ކުރަމުންދާ މުވައްޒަފުން ކުރި ހީވާގި މަސައްކަތްތަކުން ވަނީ ގިނަ ކުރިއެރުންތަކެއް ހޯދިފައި ކަމަށެވެ. އެގޮތުން ސިވިލް އޭވިއޭޝަންގެ މިންގަނޑުތަކަށް އެއަރޕޯޓްތައް ފައްތައި، ސެކިއުރިޓީގެ ކަންކަން އިތުރަށް ތަރައްޤީކޮށް، އިންހައުސް ޓްރެއިން ދެވޭ ފެންވަރަށް މީހުން ބިނާކުރެވި އަދި ދަތުރު ކުރާ ފަރާތްތަކަށް ދެވޭ ޙިދުމަތްތައް ފުޅާ ކުރެވިފައިވާކަން މުބީން ފާހަގަކުރެއްވިއެވެ.

އެހެންނަމަވެސް، މިއަދާއި ހަމައަށްވެސް އެކުންފުނިން ހިންގަމުންދާ އެއަރޕޯޓްތަކުގެ ތެރެއިން ބައެއް އެއަރޕޯޓްތަކުގައި ނަމާދު ކުރާނެ ކޮޓަރި،  މައިންނަށް ބޭނުންވާ ކޮޓަރި، ކެފޭ ނުވަތަ ޓަކް ސޮޕެއްގެ ޙިދުމަތް ފަދަ ބޭސިކް ފެސިލިޓީސް ނެތްކަން ވެސް މުބީން ވަނީ ފާހަގަކުރައްވާފައެވެ. އަދި މި ފަދަ ހިދުމަތްތައް ކުރިއަށް އޮތް ތާގައި ގާއިމު ކުރައްވާނެ ކަމުގެ ޔަގީންކަން މުބީން ވަނީ އަރުވާފައެވެ.

އާރްއޭސީއެލް އަކީ 11 ޖެނުއަރީ 2021 ވަނަ އަހަރު ރައީސުލް ޖުމްހޫރިއްޔާގެ ޤަރާރަކުން އުފައްދާފައިވާ %100 ދިވެހި ސަރުކާރު ހިއްސާވާ ކުންފުންޏެކެވެ. މި ކުންފުނި އުފައްދުމުގެ އެންމެ މައިގަނޑުއެއް ކީމަޤްސަދަ ސަރުކާރުން ހިންގާ އެއަރޕޯޓުތަކުން ރައްޔިތުންނަށް ދެވޭ ޙިދުމަތްތަކުގެ ފެންވަރު ރަގަޅުކުރުމާއ،ި އެއަރޕޯޓުތަށް ހިންގުމުގައި ސަރުކާރުގެ ބަޖެޓަށް ބަރޯސާވާ މިންވަރު ދަށްކުރުމެވެ.

އާރްއޭސީއެލް އަކީ ރާއްޖޭގެ 6 ޑޮމެސްޓިކް އެއަރޕޯޓު ކަމުގައިވާ ހޯރަފުށި އެއަރޕޯޓް، ކުޅުދުއްފުށި އެއަރޕޯޓް، ފޮނަދޫ އެއަރޕޯޓް، މާވަރުލު އެއަރޕޯޓް، ފަރެސްމާތޮޑާ އެއަރޕޯޓް އަދި ފުވައްމުލަކު އެއަރޕޯޓް ގެ އިތުރުން ހަނިމާދޫ އިންޓަނޭޝަނަލް އެއަރޕޯޓް އޮޕަރޭޓް ކުރަމުންގެންދާ ކުންފުންޏެވެ.

މި ކުންފުނީގެ އަމާޒަކީ ކުރިޔަށްއޮތް 3 އަހަރުގެ ތެރޭގައި އަމިއްލަ ފައިމައްޗަށް ތެދުވެ ކުރިމަގު އުޖާލާ، ސަރުކާރަށް ފައިދާވާ އަދި ރައްޔިތުންނަށް އިތުބާރު ހިފޭ ހިތްގައިމު ހިދުމަތެއް ފޯރުކޮށްދޭ ކުންފުންޏަކަށް ވުން ކަމަށް އާރްއޭސީއެލް އިން ބުނެއެވެ.