އޭޝިއަން ގޭމްސް؛ ރާއްޖޭގެ އަންހެން ބީޗް ވޮލީ ޓީމް ފަހު މެޗުން މޮޅުވެއްޖެ

ޖަޕާނުގައި މިހާރު ކުރިއަށްދާ އޭޝިއަން ގޭމްސްގެ ބީޗް ވޮލީ އިވެންޓުގައި ރާއްޖޭގެ އަންހެން ޓީމު ކުޅުނު ފަހު މެޗު ކާމިޔާބުކޮށްފިއެވެ.

މުބާރާތުގެ ބީޗް ވޮލީ އިވެންޓުގައި ރާއްޖޭގެ އަންހެން ޓީމު ނިކުތީ މޮންގޯލިއާއާ ދެކޮޅަށެވެ. ވާދަވެރި ކުޅުމެއް ފެނިގެންދިޔަ މި މެޗުން ރާއްޖޭގެ ޓީމު މޮޅުވީ ސީދާ ދެ ސެޓުންނެވެ. މި މެޗުގެ ފުރަތަމަ ސެޓު ރާއްޖެއިން 14-21 އިން ކާމިޔާބުކުރިއިރު، ދެވަނަ ސެޓު ގެންދިޔައީ 15-21 އިންނެވެ.

މި މެޗުގައި ރާއްޖޭގެ ޕެއާއަކީ ފާތިމަތު އަނާލް އާއި އާމިނަތު އަރީޝާ އެވެ. މޮންގޯލިއާ އަތުން ރާއްޖޭގެ އަންހެން ޓީމު މި މެޗުން މޮޅުވި ނަމަވެސް، މިއީ މި މުބާރާތުގައި ރާއްޖޭގެ އަންހެން ޓީމު ކުޅުނު ފަހު މެޗެވެ.

މިފަހަރުގެ އޭޝިއަން ގޭމްސްގެ ބީޗް ވޮލީ އިވެންޓުގައި ރާއްޖޭގެ އަންހެން ޓީމުން އެއް މެޗު ކާމިޔާބުކުރި ނަމަވެސް، މުބާރާތުގައި ވާދަކުރި ރާއްޖޭގެ ފިރިހެން ބީޗް ވޮލީ ޓީމަށް އެއްވެސް މެޗަކުން މޮޅުވެވިފައެއް ނުވެއެވެ.