އިސްރާއީލު ސިފައިން، ފަލަސްޠީނުގެ ގެތަކުން ވައްކަން ކުރާ ވީޑިއޯއެއް؛ ވަގަށް ނެގި ތަކެތީގެ އަގު 25 މިލިއަން ޑޮލަރަށް!

ހައްދުފަހަނައަޅާފައިވާ އިސްރާއީލުގެ ސިފައިން، ފަލަސްޠީނުގެ މުސްލިމުންގެ ގެތަކުން، އަގުހުރި މުދަލާއި ފައިސާ ވަގަށް ނަގާ ވީޑިއޯ އެއް އާއްމުކޮށްފިއެވެ.

މި ވީޑިއޯ އާއްމު ކޮށްފައިވަނީ ޚުދު އިސްރާއީލުގެ ނިރުބަވެރި ސިފައިންނެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ހައްދުފަހަނައަޅާފައިވާ އިސްރާއީލުން ފަލަސްޠީނުގައި ހިންގަން ފެށި ގަތުލު ޢާއްމުގެ ތެރެއިން، އެމީހުން ވަނީ މުސްލިމުން ދިރިއުޅެމުން ދިޔަ އެތައް ހާސް ގެތަކެއް ބިމާއި ހަމަ ކޮށްފައެވެ.

އަދި ހަލާކު ނުކުރާ އެތަކެއް ގެތަކުން މުސްލިމުން ނެރެ، އެހެން ސަރަހައްދުތަކަށް ދިޔުމަށް މަޖުބޫރުކޮށް، މުސްލިމުންގެ އެތައް ގެތަކެއް އެމީހުން ވަނީ ޙިސާރުކޮށްފައެވެ.

އެގޮތުގެ މަތީން، މުސްލިމުން ނެރެ، އެމީހުން ހިސޯރުކުރި، އަދި ސުންނާފަތިކުރި ބައެއް ގެތަކުން ވައްކަންކުރާ މަންޒަރު ފެންނަ ވީޑިއޯތައް އިސްރާއީލުގެ ސިފައިން މީސްމީޑިއާގައި އާއްމުކޮށްފައި ވާއިރު، އެ ވީޑިއޯ ތަކުން ފެންނަ ގޮތުން، އިސްރާއީލް ސިފައިން ވަނީ ފަލަސްޠީނުގެ މުސްލިމުންގެ ގެތަކުގައި ހުރި ތިޖޫރީތައް ހަލާކުކޮށް، އަގުހުރި ގަހަނާ އާއި ފައިސާ ވަގަށް ނަގާފައެވެ. އަދި، ލާން ގެންގުޅޭ އަންނައުނާއި، ގޭގައި ޒީނަތްތެރި ކުރަން ބަހަށްޓާފައި ހުރި، އެކިއެކި ސާމާނު ތަކުގެ އިތުރުން ކާޕެޓް ފަދަ އެތަކެއް ތަކެއްޗެއް ވެސް ވަނީ ލޫޓުވާފައެވެ.

ފަލަސްތީނުގެ މީޑިއާ ތަކުން ބުނާ ގޮތުން، ނިރުބަވެރި އިސްރާއިލްގެ ސިފައިން މުސްލިމުންގެ ގެތަކުން ވައްކަން ކޮށްފައިވާކަމުގެ ގިނަ މައްސަލަ ތަކެއް ވަނީ ހުށަހަޅާފައެވެ. އަދި އެގޮތުގެ މަތީން އެމީހުން ވަގަށް ނެގި ފައިސާ އާއި މުދަލުގެ އަގު 25 މިލިއަން ޑޮލަރަށް ވުރެ މަތި ވާނެ ކަމަށް އަންދާޒާ ކުރެވެއެވެ.

މީގެ އިތުރުން، މިއަހަރުގެ ޖަނަވަރީ މަހުގެ ތެރޭގައިވެސް އިސްރާއީލުގެ ސިފައިން ފަލަސްތީނުގެ ޕޮޓް ފަދަ ތަކެތި ކާރުޚާނާއެއް ބަލައި ފާސްކުރި ވީޑިއޯއެއް އާއްމުކޮށްފައި ވާއިރު، އެ ކާރުޚާނާއިން އެމީހުން ވަގަށް ނެގި ޕޮޓާއި، ތަން ޒީނަތްތެރި ކުރުމަށް ބޭނުންކުރާ ތަކެތި، އިސްރާއީލުގެ ގާނޫނު ހަދާ މަޖިލީހުގައި ބަހަށްޓާފައި ހުރި ފޮޓޯތައް އާއްމުވެފައިވެއެވެ. ނަމަވެސް އެ ފޮޓޯ ތަކާއި ވީޑިއޯތައް ފަހުން ވަނީ ޑިލީޓް ކޮށްލާފައެވެ.

ނިރުބަވެރި އިސްރާއީލުން ފަލަސްތީނުގެ މުސްލިމުންގެ ގެތަކުން މުދާ ލޫޓުވާފައިވާއިރު، ހަނގުރާމައިގެ ތެރެއިން ލޫޓުވުމަކީ ބައިނަލްއަގްވާމީ ގާނޫނު ތަކާއި ޚިލާފް މަނާ ކުރެވިގެންވާ ކަމެއްކަން ފާހަގަކޮށްލަންޖެހެއެވެ.