ބޭންކް އެކައުންޓްތައް ފްރީޒް ކުރުމަކީ ޑިމޮކްރަސީއަށް ދިން ހަމަލާއެއް ކަމަށް ބުނެ ކޮންގްރެސް ގެ ފާޑުކިޔުން މޯދީއަށް!

އިންޑިއާގެ ކޮންގްރެސް ޕާޓީގެ ބޭންކް އެކައުންޓްތައް އިންޑިއާގެ ވެރިކަން ކުރާ މައި ޕާޓީ ބީޖޭޕީ އިން ފްރީޒް ކުރުމަކީ ޑިމޮކްރަސީއަށް ދިން ހަމަލާއެއް ކަމަށް ބުނެ ކޮންގްރެސް އިން އިންޑިއާގެ ބޮޑުވަޒީރު ނަރެންދްރަ މޯދީ އަށް އެ ޕާޓީގެ ފާޑުކިޔުންތައް އަމާޒުކޮށްފިއެވެ.

ކޮންގްރެސްގެ ލީޑަރު ރާހުލް ގާންދީ ބުނީ އެ ޕާޓީގެ ބޭންކް އެކައުންޓްތައް ފްރީޒް ކުރުމުގެ ސަބަބުން ކުރިއަށް އޮތް އިންޑިއާގެ އިންތިހާބަށް އެ ޕާޓީން ކުރިމަތިލާ ކެނޑިޑޭޓުންނަށް ތާއީދު ހޯދުމަށް ކުރަމުންގެންދާ މަސައްކަތްތަކަށް ބޮޑެތި ހުރަސްތައް ކުރިމަތި ވަމުންދާކަމަށެވެ.

މިއީ އިންޑިއާގެ ބޮޑުވަޒީރު މޯދީ އާއި ޔޫނިއަން ހޯމް މިނިސްޓަރު އަމިތު ޝާހު، ކޮންގްރެސް އާއި މެދު އަޅާފައިވާ ކްރިމިނަލް ފިޔަވަޅެއްކަން ސިފަކޮށް، ރާހުލް ބުނީ، އިންޑިއާގައި ޑިމޮކްރަސީ އެއް ނެތްކަމަށާއި، އެ ގައުމަކީ ޑިމޮކްރެޓިކް ގައުމެއް ކަމަށް ބުނެ ފަތުރަމުންދަނީ ދޮގެއް ކަމަށެވެ.

"އިންޑިއާއަކީ ޑިމޮކްރަޓިކް ގައުމެއް ކަމަށް ބުނާ ޚިޔާލަކީ ދޮގެއް. މިއަދު އިންޑިއާގައި ޑިމޮކްރަސީއެއް ނެތް. އިންޑިއާއަކީ ދުނިޔޭގެ އެންމެ ބޮޑު ޑިމޮކްރަސީ ކަމަށް ބުނާ ޚިޔާލަކީ ދޮގެއް. އިންޑިއާގެ %20 އަޅުގަނޑުމެންނަށް ވޯޓު ދޭއިރު، އަޅުގަނޑުމެންނަށް 2 ރުޕީސް ވެސް އެއްވެސް ކަމަކަށް ދެއްކޭކަށް ނެތް."

ރާހުލް ގާންދީ

ރާހުލް ވިދާޅުވީ، މިއީ ކުރިއަށް އޮތް އެގައުމުގެ އިންތިހާބުގައި އެމީހުން ބަލިކަށިކޮށްލުމަށް އެޅި ފިޔަވަޅެއް ކަމަށާއި، އެޕާޓީގެ ބޭންކް އެކައުންޓްތައް އަންފްރީޒް ކުރިއަސް ޑިމޮކްރަސީ އަށް ވަނީ ވަރަށް ބޮޑަށް ގެއްލުން ވެފައި ކަމަށެވެ.

އިންޑިއާގެ އިންތިހާބާއި ކުރިމަތިލާން ދެމަހަށް ވެފައި އޮއްވާ ބީޖޭޕީ އިން އެޅި މި ފިޔަވަޅުގެ ސަބަބުން އެ ޕާޓީގެ އެއްވެސް މުއައްޒަފަކަށް ރުފިޔާ ނުދެވޭ ކަމަށާއި، އެއްވެސް ކެމްޕޭން ހަރަކާތެއް ވެސް ކުރިއަށް ނުގެންދެވޭއިރު، ކެނޑިޑޭޓުންނަށް ކެމްޕޭން ކޮށްދިނުމުގައި ވެސް ދަތި ތަކެއް ހުރިކަން ރާހުލް ފާހަގަކުރިއެވެ.

އިންޑިއާގެ ލޯކް ސަބާ އިންތިހާބު އޭޕްރިލް މަހުގެ 19 ވަނަ ދުވަހު ފެށުމަށް ހަމަޖެހިފައިވާއިރު، އިންތިހާބުގެ ނަތީޖާ އިއުލާން ކުރާނީ ޖޫން މަހުގެ 4 ވަނަ ދުވަހުއެވެ.