ނިރުބަވެރި ޔަހޫދީ ސިފައިން ހަދަމުން ދިޔަ މަގަކުން، ޣައްޒާގެ އުތުރާއި ދެކުނު ވަކިކޮށްލައިފި!

އެއްގަމު މަގުން ޣައްޒާއަށް ނިރުބަވެރި އިސްރާއީލުގެ ޔަހޫދީ ސިފައިން އެރީއްސުރެ، ހަދަމުން ދިޔަ މަގަކުން، ޣައްޒާގެ އުތުރާއި ދެކުނު ވަކިކޮށްލައިފިއެވެ.

ސީއެންއެން އިން ރިޕޯޓްކޮށްފައިވާ ގޮތުގައި ޣައްޒާ ދެބައިކޮށްލާފައި މިވަނީ އިރުން ހުޅަނގަށް އިސްރާއީލުގެ ސިފައިން ހެދި ބޮޑު މަގަކުންނެވެ. މާޗް މަހުގެ ހަ ވަނަ ދުވަހު ނަގާފައިވާ ސެޓެލައިޓް ފޮޓޯއަކުން އެނގޭ ގޮތުގައި ޔަހޫދީން ވަނީ ގާތްގަނޑަކަށް 6.5 ކިލޯމީޓަރު މަގެއް ހަދާފައެވެ. ހަފްތާތަކެއް ވަންދެން ޣައްޒާގެ އިރުމަތިން ހުޅަނގަށް ޔަހޫދީން ހަދަމުން އަންނަ މަގު ޣައްޒާ އާއި އިސްރާއީލުގެ ބޯޑަރު ސަރަހައްދުން ފެށިގެން، ޣައްޒާ ހުރަސްކޮށް، މެޑިޓެރޭނިއަން ކަނޑުގެ އައްސޭރިފަށާއި ހަމަވުމަށް ބާކީ އިނީ ގާތްގަނޑަކަށް 2 ކިލޯމީޓަރު ކަމަށް ވެސް ސީއެންއެން އިން ރިޕޯޓް ކުރެއެވެ.

އަނިޔާވެރި އިސްރާއީލު ސިފައިން ހެދި މި މަގުގެ ސަބަބުން މިހާރު ޣައްޒާގެ އުތުރާއި ދެކުނަކީ ވަކި ވެފައިވާ ދެތަކެވެ. އުތުރުގައި ގާޒާގެ 100،000 އެއްހާ މީހުން ތާށިވެފައި ތިބި އިރު ދެކުނުގައި 1.5 މިލިއަން މީހުން އެބަތިއްބެއެވެ.

އިސްރާއީލުގެ މުޅި ޕްލޭނަކީ ގާޒާ އަތްދަށުލުން ކަމަށް ޔަހޫދީ ބައެއް ވަޒީރުންގެ ވާހަކައިގެން އެނގޭއިރު އެމީހުން ވަނީ ޣައްޒާގައި އާބާދު ކުރާނެ ޔަހޫދީން ހޯދުމަށް ތަސައްވުރުތައް ކިޔާދިނުމަށް ބޮޑު ކޮންވެންޝަނެއްވެސް ބާއްވާފައެވެ. އިސްރާއީލުގެ މި އާ ޕްލޭންގައި 3000 މީހުން ވަޒަންވެރި ކުރުން ހިމަނާފައި އޮތް އިރު، އެކަމާ ގުޅޭ ކުރެހުންތަކާއި ގެތައް ހުންނާނެ ގޮތުގެ ނަކަލުތައް ވެސް ވަނީ ދައްކާފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ފަލަސްތީނުގެ ޣައްޒާގެ ރައްޔިތުންނާއި މެދު އިސްރާއީލުން ހިންގަމުންދާ ލާއިންސާނީ އަމަލު ތަކުގެ ސަބަބުން މިހާތަނަށް 30,960 މީހަކު ޝަހީދުވެފައިވާއިރު، 72,524 މީހަކު ވަނީ ޒަހަމްވެފައެވެ. މި ހަމަލާތަކަށް 156 ދުވަސްވެފައިވާއިރު، ޣައްޒާގެ އެތައްހާސް އާންމުންނެއް ދަނީ ކާއެއްޗެއް ނުލިބި، ހައި ހޫނު ކަމުގެ ވޭން ތަޙައްމަލު ކުރަމުންނެވެ.

ކުރިއަށް އޮތް ބަރަކާތްތެރި ރަމަޟާން މަހަށް ޣައްޒާގައި ހިންގަމުންދާ ގަތުލުއާއްމު ހުއްޓާލާނެކަމުގެ އުންމީދު އޮތް ކަމަށް ބޭރު ގައުމުތަކުން ބުނި ނަމަވެސް، ހައްދުފަހަނަ އަޅާފައިވާ އިސްރާއީލުން ޣައްޒާއަށް ދެމުންގެންދާ ހަމަލާތަކަށް މިއަދާއި ހަމައަށް ވެސް ހުއްޓުމެއް އައިސްފައިނުވާކަން ފާހަގަކޮށްލަންޖެހެއެވެ.