ސްރީލަންކާގެ އެންމެ ނުރައްކާތެރި އެއް ގޭންގް ލީޑަރުގެ މުޅި މިލްކިއްޔާތު ދައުލަތަށް ނަގަނީ

އަވައްޓެރި ސްރީލަންކާގެ އެންމެ ނުރައްކާތެރި ކުށްވެރިންގެ ތެރޭގައި ހިމެނޭ ލަތުވަހަންދީ ސުޖީވާ ރުވަން ކުމާރާ ޑި ސިލްވާ (ލޯކު ޕެޓީ) ގެ މުޅި މިލްކިއްޔާތު ދައުލަތަށް ނެގުމަށް އެގައުމުގެ ކަމާބެހޭ ފަރާތްތަކުން ނިންމައިފިއެވެ.

ލޯކު ޕެޓީއަކީ ސްރީލަންކާގެ އެންމެ ނުަރައްކާތެރި އެއް ގޭންގް ލީޑަރުގެ އިތުރުން ފުޅާދާއިރާއެއްގައި ޑްރަގް ޑީލަރެކެވެ. ލަންކާގެ ނޫސްތަކުން ބުނީ، މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ބަންދުކޮށްފައިވާ ލޯކް ޕެޓީގެ މިލްކިއްޔާތުގައި ހުރި ކަމަށް ބެލެވޭ ގާތްގަނޑަކަށް 35 މިލިއަން ރުޕީސްގެ މުދާ ހިފެހެއްޓުމުގެ މަސައްކަތް ފުލުހުންގެ އިލީގަލް އެސެޓްސް އިންވެސްޓިގޭޝަން ޑިވިޜަނުން މިހާރު ވަނީ ފަށާފައެވެ.

ފުލުހުން ހާމަކޮށްފައިވާ މައުލޫމާތުތަކަށް ބަލާއިރު ލޯކު ޕެޓީގެ ހިފަހައްޓާފައިވާ މުދަލުގެ ތެރޭގައި 15 ޕާޗުގެ ބިމަކާއި އެ ބިމުގައި އިމާރާތްކޮށްފައިވާ ގެއެއް ހިމެނެއެވެ. ބެލެވޭ ގޮތުގައި މި މުދަލަކީ މަސްތުވާތަކެތީގެ ވިޔަފާރިން ލިބިފައިވާ ފައިސާއިން ހޯދާފައިވާ ތަކެތިކަމަށް ފުލުހުން ވަނީ ތުހުމަތުކޮށްފައެވެ.

ލޯކު ޕެޓީ ހައްޔަރުކޮށްފައިވަނީ ފިލައިގެން ބެލަރޫސްގައި އުޅެނިކޮށެވެ. ލޯކު ޕެޓީ ލަންކާއަށް ގެނެސް ތަހްގީގުތައް ފަށާފައިވާއިރު، އޭނާ އަކީ ކުރިން ސްރީލަންކާގެ އަސްކަރިއްޔާގައި އުޅުނު މީހެކެވެ.