ބަނޑުހައިހޫނުކަމުގެ ސަބަބުން ޣައްޒާގައި ތިބި ކުޑަކުދިން ރުއިލާނެ ހަކަތަ ވެސް ނެތް: އދ

ޔަހޫދީން ޣައްޒާއަށް ދެމުންގެންދާ ލާއިންސާނީ ހަމަލާތަކުގެ ސަބަބުން، ޣައްޒާގައި މިހާތަނަށް 13،000 އަށް ވުރެ ގިނަ ކުޑަކުދިން ޝަހީދުވެފައިވާ ކަމަށާއި، ބާކީ ތިިބި ކުދިން ވެސް ތިބީ ބަނޑުހައިހޫނުކަމުގައި ކަމަށް އދ ގެ ކުޑަކުދިންގެ ރައްކާތެރިކަމަށް މަސައްކަތްކުރާ ޔުނައިޓެޑް ނޭޝަންސް އިންޓަނޭޝަލް ޗިލްޑްރެންސް އެމަޖެންސީ ފަންޑް  (ޔުނިސެފް) އިން ބުނެފިއެވެ.

ޔުނިސެފް އިން ބުނީ ބަނޑުހޫނުކަމުގެ ވޭނުގެ ސަބަބުން ޣައްޒާގައި ސަލާމަތުން ތިބި ކުދިން ރޯލާނެ ހަކަތަ ވެސް ނެތް ކަމަށެވެ.

މިހާތަނަށް ޝަހީދުވި ކުޑަކުދިންގެ ޖުމްލަ އަދަދު ސީދާކޮށް ބުނެދެން ނޭނގޭ ސަބަބަކީ މިހާރު ވެސް ބިމާއި ހަމަވެފައިވާ އިމާރާތްތަކުގެ ދަށުވެ، ގެއްލިފައިވާ ވުން ކަމަށާއި، މިއީ މިހާތަނަށް ދުނިޔޭގައި ހިނގި ހަމަނުޖެހުމެއްގައި އެންމެ ގިނައިން ކުޑަކުދިން ޝަހީދުވެފައިވާ ހަމަނުޖެހުން ކަމަށް ވެސް ޔުނިސެފް އިން ވަނީ ބުނެފައެވެ.

"އެނީމިއާ މަލްނިއުޓްރިޝަން ޖެހިފައިވާ ކުދިންގެ ވާޑްތަކަށް އަޅުގަނޑު ޒިޔާރަތް ކުރިން. މުޅި ވާޑް އޮތީ މުޅިން ހަމަހިމޭންކޮށް. އެހެނީ ކުދިންނަށް، ތުއްތު ކުދިން... ރޯނެ ހަކަތައެއްވެސް ނެތީމަ"

ޔުނިސެފްގެ އެގްޒެކެޓިވް ޑިރެކްޓަރު ކެތަރިން ރަސެލް ވިދާޅުވިއެވެ.

ރަސެލް ވިދާޅުވީ، އެހީގެ އުޅަނދުތައް ޣައްޒާއަށް ވަނުމުގައި ބޮޑެތި ގޮންޖެހުންތަކާއި ކުރިމަތިލާން ޖެހޭކަމަށާއި، މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން މިހާތަނަށް ފަލަސްތީނުގެ ދެ މިލިއަނަށް ވުރެ ގިނަ މީހުން ބަނޑުހައިހޫނު ކަމުގައި ތިބި ކަމަށެވެ.

އދ.ގެ ރެފިއުޖީންނަށް އެހީފޯރުކޮށްދޭ (ޔޫއެންއާރުޑަބްލިޔުއޭ) އިން ހާމަކުރި ގޮތުގައި، އުތުރު ޣައްޒާގައި އުމުރުން ދެ އަހަރުން ދަށުގެ ކޮންމެ ތިން ކުއްޖަކުން އެއްކުއްޖަކީ ކާނާ ނުލިބި، ބަނޑުހައިހޫނުކަން ތަހައްމަލު ކުރަމުން އަންނަ ކުއްޖެކެވެ. އެ އެޖެންސީން ވަނީ ފާއިތުވި 5 މަހު ކެނޑިނޭޅި ޣައްޒާއަށް ދެމުންގެންދާ ހަމަލާތަކުގެ ސަބަބުން ޣައްޒާގައި ބަނޑުހައިހޫނުކަން އިތުރުވާ މިންވަރު ވަރަށް ބޮޑަށް މަތިވަމުން އަންނަ ކަމުގެ އިންޒާރުވެސް ދީފައެވެ.

އުތުރު ޣައްޒާގައި 300,000 މީހުން ތާށިވެފައި ތިބި އިރު، ބަނޑުހައިހޫނުކަން ފިލުވުމަށްޓަކައި އެމީހުން އަންނަނީ ޖަނަވާރުތަކަށް ކާންދޭ ތަކެއްޗާއި ވިނަ ފަދަ ތަކެތި ކެއުމަށް ބޭނުންކުރަމުންނެވެ. ސާފު ބޯފެނުންވެސް އެމީހުން މަހުރޫމްވެ، ބަނޑުހައިހޫނުކަމުގެ ސަބަބުން މިހާތަނަށް ޣައްޒާގައި 27 ކުޑަކުއްޖަކު ޝަހީދުވެފައިވާއިރު، ފާއިތުވެދިޔަ ހަފްތާތަކުގައި ޔަހޫދީން ވަނީ ޣައްޒާއަށް އެހީގެ ތަކެތި އެތެރެ ކުރުމަށް ދަތިތައް ކުރިމަތި ކުރުވާފައެވެ.