ކިރްގިސްތާން އަތުންވެސް ރާއްޖެއަށް މޮޅެއް ނުވެވުނު

ބައިނަލްއަގްވާމީ ރަހުމަތްތެރިކަމުގެ މެޗެއްގައި މިރޭ ދިވެހިރާއްޖެ އާއި ކިރްގިސްތާން ބައްދަލުކުރިމެޗް ފަސޭހަކަމާއެކު ކިރްގިސްތާނުން ކާމިޔާބުކޮށްފިއެވެ.

ކިރްގިސްތާނުގައި ކުޅުނު މިމެޗް އެޓީމް ކާމިޔާބުކުރީ 5-0 ގެ ނަތީޖާއިންނެވެ. މިމެޗްގައި ފެނިގެންދިޔަ ފަސް ލަނޑުވެސް ޖަހާފައިވަނީ ފުރަތަމަ ހާފްގެ ކުޅުމުގެ ތެރޭގައެވެ. މެޗްގައި ކިރްގިސްތާނަށް ގޯލް ހުޅުވާލަދިނީ، 12 ވަނަ މިނެޓް ތެރޭގައި އެރްބޯލް އެވެ. މި ގޯލަކީ އޯފްސައިޑް ލަނޑެއްގެ ގޮތުގައި ބެލެވުނުނަމަވެސް ރެފްރީ ނިންމީ ލަނޑެއްގެ ގޮތުގައެވެ. މެޗްގައި ކިރްގިސްތާނުން ދެވަނަ ލަނޑު ޖަހާފައިވަނީ 20 ވަނަ މިނެޓް ތެރޭގައި  ސިރޮޖިއްދިން އަސްތަނަކުލޯވް އެވެ.

އޭގެ ކުޑައިރުކޮޅެއް ފަހުން ކައިރާތު ޜިރްގަލްބެކް އޫލޫ ތަނަވަސްކޮށްދިން ފުރުސަތެއްގައި، އެރްބޯލް އަތަބައޭވް ވަނީ ޓީމުގެ ތިންވަނަ ގޯލު ކާމިޔާބުކޮށްދީފައެވެ. މި މެޗުގައި ދިވެހިރާއްޖޭގެ ގައުމީ ޓީމުގެ ކުޅުންތެރިން ފެނުނީ ވަރަށް އާދައިގެ ކުޅުމެކެވެ. ދިވެހި ކުޅުންތެރިންނަށް މާބޮޑު ކަމެއް ނުކުރެވުނުއިރު، ކިރިގިސްތާންގެ ކުޅުންތެރިން ދިޔައީ ވަރަށް ފަސޭހަކަމާއެކު ރާއްޖޭގެ ކުޅުންތެރިން ކައިރިން ބޭނުންގޮތަކަށް ކުޅެމުންނެވެ.

މެޗްގައި ކިރްގިސްތާނުގެ ހަތަރުވަނަ ގޯލް ވެލެރީ މުރުޒަކޯވް ކާމިޔާބުކުރިއިރު، ފަސްވަނަ ގޯލު ޖެހީ ކޯޖޯ ޖޮއެލްއެވެ. ދެވަނަ ހާފުގައި ކިރިގިސްތާންގެ ކޯޗު އުރުމަތު އަބްދުކައިމޯވް ވަނީ އޭނާގެ ޓީމަށް ބޮޑެތި ބަދަލުތަކެއް ގެނެސްފައެވެ.

ކިރްގިސްތާނުން ރާއްޖެ 5-0 ގެ ނަތީޖާއިން ބަލިކުރިއިރު، ޗައިނާއިން ވަނީ ރާއްޖެ ކޮޅަށް ތިން ލަނޑު ޖަހާފައެވެ. މުބާރާތުގައި ދެން ރާއްޖެ ނިކުންނާނީ ލުބުނާނާ ދެކޮޅަށެވެ. މިމެޗް އޮންނާނީ އަންނަ އޮކްޓޯބަރުމަހުގެ އެއްވަނަ ދުވަހުއެވެ.