ޣައްޒާގައި ދެމުންދާ ހަމަލާތައް 2025 އާއި ހިސާބަށް ދެމިގެންދާނެ: ނަތަންޔާހޫ

އަނިޔާވެރި އިސްރާއީލުން ޣައްޒާގައި ދެމުންދާ ލާއިންސާނީ ހަމަލާތައް 2025 އާއި ހިސާބަށް ދެމިގެންދާނެ ކަމަށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ބުނެފިއެވެ.

ރިޕޯޓްތައް ބުނާ ގޮތުގައި އިސްރާއީލުގެ ބޮޑުވަޒީރު ނަތަންޔާހޫ ވަނީ މިކަން ޣައްޒާ ކައިރީގައިވާ ޖަމާއަތްތަކުގެ ލޯކަލް ކައުންސިލްތަކުގެ ލީޑަރުންނަށް އިއްޔެ އަންގާފައިއެވެ.

މީގެއިތުރުންވެސް ޣައްޒާއާއި ގާތްގަނޑަކަށް 4 ކިލޯމީޓަރު ދުރުގައި އޮންނަ މީހުން ހުސްކޮށްފައިވާ ހިސާބަށް އެނބުރި ދާން ބޭނުންވާ އިސްރާއީލުގެ ރައްޔިތުންނަށް މާލީ އެހީތެރިކަން ފޯރުކޮށްދިނުމަށް އެ ގައުމުގެ ޑިފެންސް މިނިސްޓްރީން ކަނޑައެޅި އޮނިގަނޑެއް މުރާޖައާ ކުރުމަށް ނަތަންޔާހޫ އެއްބަސްވެފައިވާ ކަމަށް ވެސް ކަރުދާހުގައި އިތުރަށް ބުނެފައިވެ އެވެ.

ނަމަވެސް ލޯކަލް ކައުންސިލްގެ ލީޑަރުން ނަތަންޔާހޫއަށް ސަލާމަތީ ކަންބޮޑުވުންތަކާ ގުޅިގެން ގިނަ ރައްޔިތުން މިވަގުތު ފަސްޖެހޭ ކަމަށް ވަނީ އަންގާފައެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ހައްދުފަހަނައަޅާފައިވާ އިސްރާއީލުން ވަނީ ޣައްޒާއަށް ވައިގެ މަގުންނާއި ބިމުން ކެނޑިނޭޅި ހަމަލާތަކެއް ދީފައެވެ.

މި ހަމަލާތަކުގައި މިހާތަނަށް ފަލަސްތީނުގެ 24،285 މީހުން ޝަހީދުވެ، 61،154 މީހުން ޒަޚަމްވެފައިވާއިރު އޭގެތެރޭގައި ގިނައީ އަންހެނުންނާއި ކުޑަކުދިން ކަމަށް ފަލަސްތީނުގެ ސިއްހީ އިދާރާތަކުން ބުނެއެވެ.

އާބާދީގައި 2.3 މިލިއަން މީހުން ދިރިއުޅޭ ފަލަސްތީނުގެ 85 އިންސައްތަ މީހުންގެ ގެދޮރު ދޫކޮށްލުމަށް މަޖުބޫރުވެފައިވާ ކަމަށާއި، ކާނާއާއި ސާފު ބޯފެން އަދި ބޭސް ވެސް ޣައްޒާގެ ރައްޔިތުންނަށް ލިބުން ދަތިވެފައިވާ ކަމަށް އދ. އިން ބުނެއެވެ.