ޓައިވާނުގެ މިސައިލްތަކުގެ ބާރު ދައްކާލައިފި
ލިޔުންތެރިޔާ
ޝަފްރާޒް އަހްމަދު
ޓައިވާނުން އެގައުމުގެ މިސައިލްތަކުގެ ޤާބިލުކަން ދައްކާލުމަށް ނޫސްވެރިންގެ ހާޒިރުގައި ބައެއް މިސައިލްތައް ޓެސްޓްކޮށްފިއެވެ.
މިއަދު ހަނދުނު މި މިސައިލްތައް ޓެސްޓްކޮށްފައިވަނީ މަދުން ނޫނީ ޓެސްޓްތައް ނުކުރާ ޖިއުޕެންގް އަސްކަރީ ބޭސްގައެވެ. މިސައިލް ޓެސްޓްގައި ޓައިވާނުން ވަނީ އެމެރިކާއިން އުފައްދާ ޕެޓްރިއޮޓް މިސައިލަކާއި، ޓައިވާނުން އަމިއްލައަށް އުފައްދާ ސްކައި ބައު 3 މަރުކާގެ މިސައިލްތައް ޓެސްޓްކޮށްފައެވެ. އަދި އައްސޭރިފަށާއި ކައިރީގައި އޮތް މަނަވަރަކުން އާރް.އެމް.އައި-66 ސްޓޭންޑަރޑް މިސައިލެއްވެސް ޓެސްޓަކަށް އުދުއްސާލާފައިވެއެވެ.
ޓައިވާނުގެ ދިފާޢީ ވުޒާރާގެ ތަރުޖަމާނު ސުން ލީ-ފަންގް ވިދާޅުވީ ޓެސްޓް މިސައިލްތައް އޭގެ އަމާޒަށް ވާޞިލް ވެފައިވާކަމަށެވެ. އަދި މިއަދުގެ ޓެސްޓްތަކުގެ ބޭނުމަކީ ޓައިވާނުގެ އަސްކަރިއްޔާގެ ސިފައިންނަށް ދީފައިވާ ތަމްރީންތަކުގެ ބޭނުން ރަނގަޅު ގޮތުގައި ހިފޭތޯ ބެލުމާއި، ޓައިވާނުގެ މިސައިލްތަކުގެ ޤާބިލްކަން ކަށަވަރުކޮށް، ދައްކާލުން ކަމަށެވެ.
މިސައިލްތަކަކީ ޗައިނާއިން ޓައިވާން ހިފަން މަސައްކަތްކޮށްފި ހިނދެއްގައި ޓައިވާނުން ރައްދުގައި ބޭނުންކުރާނެ ހަތިޔާރުގެ ލިސްޓުގެ އެންމެ ކުރީގައިވާ އެއް ހަތިޔާރެވެ. މިއަދު މިސައިލްތައް ޓެސްޓްކުރި ސަރަހައްދުގައި ޓައިވާނުން ވަނީ މިސައިލްތައް އުފައްދާ ޓެސްޓްކުރާ އިދާރާއެއްވެސް ޤާއިމްކޮށްފައެވެ. ސިއު-ފެންގް މިސައިލްގެ ދުރުރާސްތާ މިސައިލްތައްވެސް ޓެސްޓްކުރަނީ މިތަނުގައެވެ. މިއީ ޗައިނާގެ އެތެރޭގެ އަމާޒުތަކަށް ވާޞިލްވެވޭ މިސައިލެއްކަމަށް ޓައިވާނުން ބުނެއެވެ.
ޗައިނާއިން ގަބޫލުކުރާ ގޮތުގައި ޓައިވާނަކީ ޗައިނާއާއި ވަކިނުކުރެވޭނެ، ޗައިނާގެ ޕްރޮވިންސެކެވެ. އެހެންނަމަވެސް ޓައިވާނުން މިނިވަންކަން އިއުލާންކޮށް، ވަކިވެރިކަމެއް ކުރަމުން އަންނަތާ އެތައް އަހަރުތަކެއް ވަނީ ވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
