ޕާކިސްތާނުން ފޮނުވާ އެހީ އަވަހަށް ލިބެން އޮތީ ލަންކާ ސަރުކާރުން އިންޑިއާ އާ ވާހަކަދައްކައިގެން: ލަންކާގެ އިދިކޮޅު އެމްޕީ

ޕާކިސްތާނުގެ މަތިންދާބޯޓުތަކަށް އިންޑިއާގެ ވައިގެ ސަރަހައްދު ބޭނުންކުރުމުގައި ލުއި އުސޫލްތަކެއް ހަމަޖެއްސުމާ ގުޅޭގޮތުން ސްރީލަންކާ ސަރުކާރުން ވާހަކަ ދައްކަންޖެހޭކަމަށް ލަންކާގެ ޤާނޫނު ހަދާމަޖިލީހުގެ އިދިކޮޅު މެމްބަރަކު ވިދާޅުވެއްޖެއެވެ.

ސްރީލަންކާގެ ޤާނޫނު ހަދާ މަޖިލީހުގައި ހިމެނި ވަޑައިގަންނަވާ އިދިކޮޅަށް ނިސްބަތްވާ މެމްބަރެއްކަމަށްވާ މުޖީބު ރަހްމާން ވިދާޅުވީ ޕާކިސްތާނުން ސްރީލަންކާއަށް ފޮނުވާ އެހީގެ ތަކެތި ލިބެން އޮތީ، ޕާކިސްތާނުގެ ފްލައިޓްތަކަށް އިންޑިއާގެ ވައިގެ ސަރަހައްދު ބޭނުންކުރެވިގެންކަމަށެވެ.

ޕާކިސްތާނާ އިންޑިއާ ސަރުކާރާ ދެމެދު މިއަހަރުގެ މެއިމަހުގެ ތެރޭގައި ހިނގާދިޔަ ހަމަލާ ބަދަލުކުރުންތަކަށްފަހު އެއްޤައުމު އަނެއް ޤައުމަށް، އެ ޤައުމެއްގެ ވައިގެ ސަރަހައްދު ބޭނުންކުރުން އޮތީ ހިފަހައްޓާފައެވެ. އިންޑިއާގެ ވައިގެ ސަރަހައްދު ބޭނުންނުކޮށް ސްރީލަންކާއަށް އެހީގެ ތަކެތި ހިފައިގެންދާ ޕާކިސްތާނުގެ މަތިންދާބޯޓުތަކަށް ދިގު ދަތުރެއް ކުރަންޖެހޭއިރު، ޕާކިސްތާނުން ވަނީ އިންޑިއާގެ ވައިގެ ސަރަހައްދު ބޭނުންކުރުމުގެ ހުއްދައަކަށް އިއްޔެ އެދިފައެވެ. މިކަމާ ގުޅިގެން ޕާކިސްތާނުން ވަނީ 6 ގަޑިއިރުގެ ހާއްސަ ހުއްދައެއް ދީފައެވެ.

މިކަމާ ގުޅޭގޮތުން އެމްޕީ މުޖީބު ރަހްމާން ވިދާޅުވީ ކުއްލި ހާލަތުގައި ސްރީލަންކާއަށް އެހީވުމަށް ޕާކިސްތާނުގެ ބޯޓުތަކަށް އިންޑިއާގެ ވައިގެ ސަރަހައްދު ބޭނުންކުރުމުގެ ހުއްދަ ދީފައިވަނީ އެންމެ ރަނގަޅު އުސޫލަކުން ނޫންކަމަށެވެ. އޭނާ ވިދާޅުވީ 6 ގަޑިއިރުގެ މުއްދަތަކީ މި ބާވަތުގެ ކަމަކަށް ކުރު ވަގުތެއްކަމަށާއި، އެގޮތުން އެންމެ އަވަސްވެގެންވެސް ޕާކިސްތާނުގެ ރާވަލް ޕިންޑީން ސްރީލަންކާއަށް ދަތުރުކުރުމަށް 4 ގަޑިއިރާ 30 މިނެޓް ހޭދަވާކަމަށެވެ. އޭނާ ވިދާޅުވީ މިކަމުގައި ސްރީލަންކާ ސަރުކާރުން އިންޑިއާ ސަރުކާރުގެ ކަމާބެހޭ ފަރާތްތަކާ ވާހަކަދައްކަންޖެހޭކަމަށް ގަބޫލުކުރާ ކަމަށެވެ.

މިކަމާ ގުޅިގެން ޕާކިސްތާނުގެ ހާރިޖިއްޔާއިން ވަނީ ސްރީލަންކާއަށް އެހީގެ ތަކެތި ގެންދިއުމަށް އިންޑިއާގެ ފަރާތުން އެކަށީގެންވާ އެއްބާރުލުމެއް ލިބެމުން ނުދާކަމަށް ބުނެ ވާހަކަ ދައްކާފައެވެ. ހާރިޖިއްޔާއިން ބުނީ، ކުއްލި ހާލަތުގައި ޕާކިސްތާނުގެ އެއާފޯސްއަށް ނިސްބަތްވާ ބޯޓެއް އިންޑިއާގެ ވައިގެ ސަރަހައްދު ބޭނުންކުރުމުގެ ހުއްދައަށް އެދުމުން ޝަރުތުތަކާއެކު އެ ބޯޓަށް ހުއްދަ ދީފައިވަނީ 60 ގަޑިއިރު ފަހުންކަމަށެވެ. އެގޮތުން ޕާކިސްތާނުގެ ހާރިޖިއްޔާއިން ވަނީ މި މައްސަލާގައި އިންޑިއާ ސަރުކާރަށް ވަރަށްބޮޑަށް ފާޑުކިޔާފައެވެ.