އިސްރާއީލާއި ގުޅުން ހުރި ހަތިޔާރުގެ ޝިޕްމަންޓްތައް ބެލެހެއްޓުމަށް އިންޑިއާގެ ޓްރޭޑް ޔޫނިއަނަކުން ދެކޮޅު ހަދައިފި

އިސްރާއީލާއި ގުޅުން ހުރި ހަތިޔާރުގެ ޝިޕްމަންޓްތައް ބެލެހެއްޓުމަށް އިންޑިއާގެ ޓްރޭޑް ޔޫނިއަނަކުން ދެކޮޅު ހަދައިފިއެވެ.

މި ޓްރޭޑް ޔޫނިއަން އަކި އިންޑިއާގެ ޕޯޓްސް ގައި މަސައްކަތް ކުރާ އެތައް ހާސް މުއައްޒަފުންނެއް ތަމްސީލު ކުރާ ޔޫނިއަން އެކެވެ.

އިންޑިއާގެ ބޮޑެތި 11 ބަނދަރެއްގައި 3،500 އަށް ވުރެ ގިނަ މަސައްކަތްތެރިން ހިމެނޭ ވޯޓާ ޓްރާންސްޕޯޓް ވޯކަރސް ފެޑެރޭޝަނުން މި ނިންމުން އިއުލާންކޮށްފައިވަނީ ފެބްރުއަރީ 14 ވަނަ ދުވަހު ފޮނުވި ސިޓީއަކުންނެވެ. މި ސިޓީގައި އިސްރާއީލުން ޣައްޒާގައި ހިންގަމުންދާ އަނިޔާވެރިކަމާއި އެ ޔޫނިއަން ގެ މަސައްކަތްތެރިން ދެކޮޅު ކަމަށް ވެސް ވަނީ ބުނެފައެވެ.

އިންޑިއާގެ ޕޯޓްސްގައި މަސައްކަތް ކުރާ އެހެން ފަރާތްތަކަށް ވެސް އިސްރާއީލަށް އަސްކަރީ ތަކެތި ގެންދާ އެއްވެސް ބޯޓެއް ނުބެލެހެއްޓުމަށް މި ޔޫނިއަން އިން ވަނީ ގޮވާލާފައެވެ. އަދި މީގެ އިތުރުން ވެސް ޣައްޒާގައި ހިންގަމުންދާ ލާއިންސާނީ އަމަލުތައް ވަގުތުން ހުއްޓާލުމަށް ވެސް މި ޔޫނިއަން އިން ވަނީ ގޮވާލާފައެވެ.

އަރަބް ނިއުސް އިން ރިޕޯޓް ކުރާ ގޮތުގައި އެ ފެޑެރޭޝަންގެ ޖެނެރަލް ސެކްރެޓަރީ ނަރެންދްރާ ރާއޯ ވަނީ އެ ފެޑަރޭޝަންއިން އަބަދުވެސް ހަނގުރާމަ ތަކާއި ދެކޮޅު ކަމަށް ބުނެފައެވެ. މީގެ އިތުރުން ވެސް އޭނާ ބުނީ ފަލަސްތީނުގެ މިނިވަންކަން އަނބުރާދިނުމަށް ތާއީދު ކުރުމުގެ ގޮތުން އިސްރާއީލާއި ގުޅުން ހުރި މިފަދަ އެއްވެސް އާލާތެއް އިންޑިއާ އަށް އެތެރެކޮށްފި ނަމަ އެ ޔޫނިއަން ގެ މުއައްޒަފުން އެތަކެތި ބޮއިކޮޓް ކުރާނެ ކަމަށެވެ.

މީގެ އިތުރުންވެސް އިންޑިއާގެ އެންމެ ދުވަސްވީ އަދި ދެވަނައަށް އެންމެ ބޮޑު ޓްރޭޑް ޔޫނިއަން ފެޑެރޭޝަން ކަމަށްވާ އޯލް އިންޑިއާ ޓްރޭޑް ޔޫނިއަން ކޮންގްރެސް އިން ވެސް ވަނީ ވޯޓާ ޓްރާންސްޕޯޓް ވޯކަރސް ފެޑެރޭޝަނުގެ މި ނިންމުމަށް ތާއީދުކޮށްފައެވެ.

މި ފެޑަރޭޝަން އިން މި ފިޔަވަޅު ނަގާފައިވާއިރު، އިންޑިއާއިން އިސްރާއީލުގެ އަސްކަރިއްޔާއަށް 20 އަށް ވުރެ ގިނަ އަސްކަރީ ޑްރޯން އެކްސްޕޯޓްކޮށްފައިވާ ކަމަށް އިންޑިއާގެ ނޫސް ތަކުން ވަނީ ރިޕޯޓްކޮށްފައެވެ. އަދި އިސްރާއީލުގެ އަސްކަރީ ސާމާނު އެންމެ ގިނައިން ގަންނަ އެއް ގައުމަކީ ވެސް އިންޑިއާ ކަމަށާއި، މިގޮތުން އަހަރަކު ގާތްގަނޑަކަށް ދެ ބިލިއަން ޑޮލަރުގެ ހަތިޔާރު ގަންނަ ކަމަށްވެސް  ރިޕޯޓްތައް ބުނެ އެވެ.