ޣައްޒާގައި ހުރި އދ ގެ އެހީދޭ މަރުކަޒަކަށް ޔަހޫދީން ހަމަލާދީ 5 މީހަކު ޝަހީދުކޮށްލައިފި

ފަލަސްތީނުގެ ޣައްޒާގެ ހުރި އދ ގެ އެހީދޭ މަރުކަޒެއް ކަމަށްވާ ޔޫއެންއާރުޑަބްލިއުއޭ އަށް ޔަހޫދީން ހަމަލާދީ 5 މީހަކު ޝަހީދުކޮށްލައިފިއެވެ.

މިހަމަލާގައި 22 މީހަކު ޒަހަމްކޮށްލުމުގެ އިތުރުން، ހަމާސް ގެ ކޮމާންޑަރަކާއި އދ ގެ އެހީތެރިއެއްވެސް ޝަހީދުކޮށްލާފައިވާއިރު، އދ އިން ވަނީ މިއީ ބައިނަލްއަގުވާމީ އިންސާނީ ގާނޫނަށް ފާޅުކަން ބޮޑު ގޮތެއްގައި އިހްތިރާމް ކުޑަކުރުން ކަމަށް ސިފަކޮށް، މި ހަމަލާ ކުށްވެރިކޮށްފައެވެ.

މި ހަމަލާ އަމާޒުކޮށްފައިވަނީ، އެހީދޭ މަރުކަޒުގެ ކާބޯތަކެތި ރައްކާކުރާ ފަރާތަށް ކަމަށް ބޭރު ދުނިޔޭގެ ނޫސްތަކުން ރިޕޯޓްކުރެއެވެ. ކާބޯތަކެތީގެ އިތުރުންވެސް، އެހީގެ ގޮތުގައި ފޯރުކޮށްދޭ އެހެނިހެން މުހިއްމު ތަކެތިވެސް ރައްކާތެރި ކުރި މި ގުދަނަށް ހަމަލާދިން ވަގުތު އެތަނުގައި ގާތްގަނޑަކަށް 60 މީހުން މަސައްކަތް ކުރަމުންދިޔަ ކަމަށް އދ އިން ބުނެއެވެ.

ރަފާހްގައި ހުރި މި އެހީދޭ މަރުކަޒަށް ހަމަލާދިންއިރު، ރަފާހްއަކީ ޣައްޒާގެ އެހެން ސަރަހައްދުތަކަށް ހައްދުފަހަނައަޅާފައިވާ އިސްރާއީލުން ދެމުންގެންދާ ހަމަލާތަކުގެ ސަބަބުން ގެދޮރުގެއްލިފައިވާ ގާތްގަނޑަކަށް 1.5 މިލިއަން މީހުން ބޯހިޔާވަހިކަން ހޯދައި، ދިރިއުޅެމުން އަންނަ ސަރަހައްދުކަން ފާހަގަކޮށްލަން ޖެހެއެވެ.

ފާއިތުވި 24 ގަޑިއިރު ތެރޭގައި އެކަނިވެސް ޣައްޒާގެ 82 މީހަކު ޝަހީދުކޮށްލައި 122 މީހަކު ޝަހީދުކޮށްލާފައިވާއިރު، ޣައްޒާއަށް އެހީ ފޯރުކޯށްދިނުމަށް އިސްރާއީލުން ހުރަސް އެޅުމުގެ ސަބަބުން 300,000 ގިނަ މީހުން އަންނަނީ ބަނޑުހައިހޫނު ކަމުގެ ވޭން ތަހައްމަލު ކުރަމުންނެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ދޭން ފެށި މިހަލާތަކުގައި މިހާތަނަށް އދ އިން ޣައްޒާއަށް އެހީ ފޯރުކޮށްދޭ 150 އަށްވުރެ ގިނަ މަރުކަޒެއް ހަލާކުކޮށްލާފައިވާއިރު، އެހީދިނުމަށް ހަރަކާތްތެރިވަމުންދިޔަ 13,000 މީހުންގެ ތެރެއިން އެންމެ މަދުވެގެން ގާތްގަނޑަކަށް 165 މީހުން ޝަހީދުކޮށްލާފައިވާކަމަށް އދ އިން ހާމަކުރެއެވެ.

އިސްރާއީލުން ޣައްޒާއަށް ހުއްޓުމެއްނެތި ދެމުންގެންދާ ލާއިންސާނީ ހަމަލާތަކަށް 159 ދުވަސްވެފައިވާއިރު، މި ހަމަލާތަކުގައި  30,960 މީހަކު ޝަހީދުކޮށްލާފައިވާއިރު، 72,524 މީހަކު ވަނީ ޒަހަމްކޮށްލާފައެވެ. ބަރަކާތްތެރި ރަމަޟާން މަސް މިއަހަރު މުސްލިމުންނާއި ކުރިމަތިލިިއިރު، ޣައްޒާގެ ރައްޔިތުންނަށް ސާފުބޯފެނާއި ކާނާ ހޯދުން ވަނީ ވަރަށް ބޮޑަށް ދަތިވެފައެވެ.