ޣައްޒާގައި ބަނޑުހައިހޫނު ކަމުގެ ސަބަބުން ޝަހީދުވި މީހުންގެ އަދަދު 27 އަށް އަރައިފި!

ފަލަސްތީން ގެ ޣައްޒާގައި ޔަހޫދީން ހިންގަމުންދާ ލާއިންސާނީ އުދުވާން ތަކުގެ ސަބަބުން ކާއެއްޗެއް ނުލިބި، ބަނޑުހައިހޫނު ކަމުގެ ސަބަބުން ޝަހީދުވި މީހުންގެ އަދަދު 27 އަށް އަރައިފިއެވެ.

ހައިހޫނު ކަމުގެ  ވޭނުގައި އިއްޔެ އުތުރު ޣައްޒާގައި އަލަށް ވިހޭ ތުއްތު 2 ކުދިންވެސް ވަނީ ޝަހީދުވެފައެވެ. މި ދެކުދިން ޝަހީދު ވެފައިވަނީ، ޔަހޫދީން އުތުރު ޣައްޒާއަށް ކާބޯތަކެއްޗާއި ސިއްހީ ހިދުމަތަށް ބޭނުންވާ ތަކެތި ފޯރުކޮށްދިނުމަށް ހުރަސް އެޅުމުން ކަމަށް އެ ދެކުދިންނަށް ފަރުވާ ދިނުމުގައި ހަރާތްތެރިވި ކަމަލް އަދްވާން ހޮސްޕިޓަލް ގެ ކުޑަކުދިންގެ ހާއްސަ ޑޮކްޓަރެއް ވަނީ ވިދާޅުވެފައެވެ.

ހަމައެއާއިއެކު، އުތުރު ޣައްޒާގައި ހަރަކާތްތެރި ވަމުން އަންނަ ގާތްގަނޑަކަށް 2000 ސިއްހީ އެހީތެރިން ވެސް އަންނަނީ ބަނޑުހައިހޫނު ކަމުގެ ވޭން ތަހައްމަލު ކުރަމުންނެވެ. މިގޮތުން، މިއަހަރުގެ ބަރަކާތްތެރި ރޯދަ މަހުވެސް ސިއްހީ އެހީތެރިން ރޯދަ އަށް ތިބެނީ ހާރުގެ އިތުރުން، ރޯދަވީއްލާ ގަޑީގައި ވެސް އެއްވެސް އެއްޗެއް ނުކައި ކަމަށް ޣައްޒާގެ ސިއްހީ ވުޒާރާއިން ވަނީ ހާމަކޮށްފައެވެ.

ޣައްޒާގެ މުނިސިޕަލް ސްޕޯސްކްޕާސަން، ހުސްނީ މަހްނާ ވިދާޅުވި ގޮތުގައި މީގެ ކުރިން 90 ލިޓަރު ފެން ލިބުނު ނަމަވެސް، ފެން ލިބޭ މިންވަރު ވަރަށް ބޮޑަށް ޣައްޒާގެ ކޮންމެ ރައްޔިތަކަށް ދުވާލެއްގެ މައްޗަށް ލިބެނީ ހަމައެކަނި 2 ލިޓަރު ފެންކަމަށެވެ. މީގެ އިތުރުންވެސް ހުސްނީ މަހްނާ ވިދާޅުވީ، އިސްރާއީލުން ގެ ސިފައިން ޣައްޒާގައި ހުރި 40 ފެންވަޅާއި، 9 ރިޒާވާއި، 42 ކިލޯމީޓަރުގެ ވޯޓާ ނެޓްވޯކްތަކުގެ އިތުރުން، އެކި ހިސާބުތަކުގައި ފެން ފޯރުކޮށްދިނުމަށް ބަހައްޓާފައި ހުރި އެކި ސައިޒް ތަކުގެ 500 އަށްވުރެ ގިނަ ފެން އިސްކޫރުތައް ހަލާކުކޮށްލާފައިވާ ކަމަށެވެ.

މާތްވެގެންވާ ރަމަޟާން މަސް މިއަހަރު ޣައްޒާގެ ރައްޔިތުންނާއި ބައްދަލުކުރިއިރު، ޣައްޒާގެ 85 އިންސައްތަ އަށް ވުރެ ގިނަ މީހުން ވަނީ ގެދޮރުހަލާކުވެ، މަގުމަތި ވެފައިއެވެ. އަދި ފެނާއި ކާބޯތަކެއްޗާއި ބޭސްފަރުވާގެ ދަތިކަން އިންތިހާއަށް ބޮޑުވެފައިވާއިރު، ޣައްޒާގެ 60 އިންސައްތަ އިމާރާތްތައް ވަނީ ބިމާއި ހަމަކޮށްލާފައެވެ. އިސްރާއީލުން ދަނީ ޣައްޒާގެ ރައްޔިތުންނަށް ބޭނުންވާ އެހީގެ ތަކެތި އެތެރެކުރުމަށް ހުރަސް އަޅަމުންނެވެ. ޣައްޒާގެ ރައްޔިތުންނަށް އެހީ ފޯރުކޮށްދިނުމަށް ޓަކައި، އެމެރިކާއިން ވަނީ ޣައްޒާގެ އައްސޭރިފަށުގައި، ވަގުތީ ބަނދަރެއް ހެދުމަށް އެގައުމުގެ ސިފައިން ފޮނުވުމަށް ނިންމާފައެވެ.

ހައްދުފަހަނައަޅާފައިވާ ޔަހޫދީން މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ކެނޑިނޭޅި ޣައްޒާއަށް ދެމުންގެންދާ ހަމަލާތަކުގެ ސަބަބުން މިހާތަނަށް 31,045 މީހަކު ޝަހީދުވެފައިވާއިރު،  72,654 މީހަކު ވަނީ ޒަހަމްވެފައެވެ.