ޣައްޒާގައި ހިނގަމުންދާ ގަތުލުއާއްމު ވަގުތުން ހުއްޓާލުމަށް ގޮވާލައި އެމެރިކާއިން އދ އަށް ގަރާރެއް ހުށައަޅައިފި

ޣައްޒާގައި ހިނގަމުންދާ ގަތުލުއާއްމު ވަގުތުން ހުއްޓާލުމަށް ގޮވާލައި އެމެރިކާއިން އދ އަށް ގަރާރެއް ހުށައަޅައިފިއެވެ.

އެމެރިކާގެ ޚާރިޖީ ވަޒީރު އެންޓޯނީ ބްލިންކެން މެދުއިރުމަތީގެ ގައުމުތަކަށް މިހާރު ކުރައްވަމުން ގެންދަވާ ދަތުރުފުޅުގައި ސައުދީ އަރަބިއާ އަށް ވަޑައިގެން ސައުދީގެ އަލްހަދާތު ޗެނަލް އަށް ދެއްވި ބަސްދީގަތުމެއްގައި ވިދާޅުވީ، ޣައްޒާގައި ހިނގަމުންދާ ގަތުލުއާއްމު ހުއްޓުވައި، ރަހީނުކޮށްފައިވާ މީހުން ދޫކޮށްލުމަށް ގޮވާލާ ގަރާރެއް އދ ގެ ސަލާމަތާއި ބެހޭ މަޖިލީހަށް ހުށައަޅާފައިވާ ކަމަށެވެ.

އެމެރިކާއިން މި ގަރާރު ހުށައެޅި އިރު، މީގެ ކުރިން ޣައްޒާގައި ހިނގަމުންދާ ލާއިންސާނީ ހަމަލާތައް ހުއްޓާލުމަށް އދ އަށް ހުށައެޅުނު ތިން ގަރާރު ވެސް އެގައުމުން ވަނީ ވީޓޯ ކޮށްފައިއެވެ.

މި މައްސަލަ އާއި ގުޅިގެން އެންމެ ފަހުން ހުށައެޅި ގަރާރު އެމެރިކާއިން ވީޓޯ ކުރީ، މިއީ ހަނގުރާމަ މެދުކަނޑާލައި ރަހީނުކޮށްފައިވާ ފަރާތްތައް ދޫކޮށްލުމަށް އެމެރިކާ، މިސްރު އަދި ގަތަރުން ކުރާ މަސައްކަތަށް ނުރައްކާވެދާނެ ކަމެއް ކަމަށް ބުނެއެވެ.

އެމެރިކާ އިން އާއްމުކޮަށް އދ ގެ މަޖިލިސްތަކުގައި ހައްދުފަހަނަ އަޅާފައިވާ އިސްރާއީލްގެ ދިފާއުގައި ވަކާލާތުކުރި ނަމަވެސް، ފަހަކަށް އައިސް ޣައްޒާއަށް ދޭ އެހީ އިތުރުކުރުމާއި ހަނގުރާމަ ހުއްޓުވުމަށް ގޮވާލުމާއި ގުޅޭ ގަރާރުތައް ފާސްކުރުމަށް ބާރުއަޅާކަން ފާހަގަކޮށްލަން ޖެހެއެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ނިރުބަވެރި އިސްރާއީލުން ޣައްޒާއަށް ހަމަލާދޭން ފެށިފަހުން މެދުއިރުމަތީގެ ގައުމުތަކަށް ބްލިންކެން ކުރައްވަމުން ގެންދަވާ އޭނާގެ ހަވަނަ ދަތުރުފުޅުގައި އޭނާ ދަނީ މެދުއިރުމަތީގެ ގައުމުތަކުގެ ވެރިންނާއި ބައްދަލުކޮށް ޣައްޒާގައި ހިނގަމުންދާ ގަތުލުއާއްމު ހުއްޓާލުމާއި ގުޅޭ ގޮތުން މަޝްވަރާ ކުރަމުންނެވެ.