ކޮވިޑް-19ގެ ސަބަބުން ހީނަރުވެފައިވާ ދިވެހިރާއްޖޭގެ އިގްތިސާދު އަލުން އާރާސްތުކުރުމުގައި ޗައިނާއިން އެހީތެރިކަން ފޯރުކޮށްދޭނެކަމަށް އެގައުމުގެ ސަރުކާރުގެ ފަރާތުން ދިވެހިރާއްޖެއަށް ކަނޑައަޅާފައިވާ ސަފީރު ޝާންގ ލިޝޮންގ ވިދާޅުވެއްޖެއެވެ.

އެބޭފުޅާ މިފަދައިން ވިދާޅުވީ ޗައިނާގެ 71ވަނަ ގައުމީ ދުވަސް ފާހަގަކުރުމުގެ ގޮތުން ބޭއްވި ވާޗުއަލް ރަސްމިއްޔާތުގައި ވާހަކަ ދައްކަވަމުންނެވެ.

ޗައިނާގެ ސަފީރު ޝާންގ ވިދާޅުވީ ދިވެހިރާއްޖެއާއި ޗައިނާއާއި ދެމެދު އޮންނަ ގުޅުންތައް މިއަހަރު މައިގަނޑު ގޮތެއްގައި ބިނާވެފައިވަނީ ގުޅިގެން ކޮވިޑް-19 ބަލިމަޑުކަމާއި ދެކޮޅަށް މަސައްކަތްކުރުމާ ބެހޭގޮތުން ކަމަށެވެ. އެގޮތުން މީގެ ކުރިން ދެކެފައި ނުވާފަދަ ކަންތައްތަކާއި ކުރިމަތިލައި ދެގައުމުގެ ސަރުކާރާއި ރައްޔިތުން އެއް ބަޔަކު އަނެއް ބަޔަކަށް އެހީތެރިކަން ފޯރުކޮށްދީފައިވާކަމަށް އެބޭފުޅާ ފާހަގަކުރެއްވިއެވެ. އަދި ދެގައުމުގެ އެކުވެރިކަން އިތުރަށް ބަދަހިވެ، ދޭދޭ ގުޅުންތައް އިތުރަށް ހަރުދަނާވި ކަމަށްވެސް ޝާންގ ވިދާޅުވިއެވެ.

ސަފީރު ޝާންގ ވިދާޅުވީ ކޮވިޑް-19 އާއި ގުޅިގެން ރާއްޖޭން ޗައިނާއަށް އެއް ބިލިޔަން މަސްދަޅު ހަދިޔާކުރި ކަމަށާއި، ޗައިނާގެ ސަރުކާރާއި ކުންފުނިތަކުން ދިވެހިރާއްޖެއަށް ޕީޕީއީ ހަދިޔާކުރި ކަމަށެވެ. 

އެބޭފުޅާ އިތުރަށް ވިދާޅުވީ ތޫފާނަކަށްފަހު ވިއްސާރަ ދުނިއެއް އަބަދުވެސް ފެންނަ ކަމަށާއި، ކޮވިޑް-19 އަށް ފަހުގެ ދުވަސްތަކުގައި ޗައިނާ އިތުރަށް ތަރައްގީވާތަން ފެންނާނެކަމަށް ގަބޫލުކުރައްވާ ކަމަށެވެ. އަދި މި ހާލަތުގައި ދެގައުމުގެ ރަހުމަތްތެރިކަން އިތުރަށް ކުރިއަރައިދާނެކަމަށް ގަބޫލުކުރައްވާ ކަމަށްވެސް ޗައިނާގެ ސަފީރު ވިދާޅުވިއެވެ.

ސަފީރު ވަނީ އިގްތިސާދު އަލުން އާރާސްކުރުމަށާއި ކޮވިޑް-19 އާ ދެކޮޅަށް ރާއްޖޭން ކުރަމުންދާ މަސައްކަތްތަކުގައި އެހީތެރިކަން ފޯރުކޮށްދެމުންދާނެކަމަށް ވިދާޅުވެފައެވެ.