ކޮވިޑް-19ގެ ބަލިމަޑުކަމުން އަރައިގަނެ ދިވެހިރާއްޖޭގެ އިގްތިސާދު އާރާސްތުކުރުމަށް ކުރަމުންދާ މަސައްކަތުގައި ޗައިނާއިން ބޮޑު އެހީއެއް ފޯރުކޮށްދެމުންދާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެބޭފުޅާ މިހެން ވިދާޅުވީ ޗައިނާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޝާންގ ލިޝޮންގއާއި އިއްޔެ ބައްދަލުކުރެއްވުމަށްފަހު ކުރެއްވި ޓްވީޓެއްގައެވެ. މި ބައްދަލުވުމުގައި ފޮރިން މިނިސްޓަރގެ އަރިހުގައި ފިނޭންސް މިނިސްޓަރ އިބްރާހިމް އަމީރުވެސް ބައިވެރިވެ ވަޑައިގެންނެވިއެވެ.

ޝާހިދު ކުރެއްވި ޓްވީޓްގައި ވިދާޅުވީ ކޮވިޑް-19ގެ ހާލަތަށް ފަހު އިގްތިސާދީ ރޮނގުން ގުޅިގެން މަސައްކަތްކުރުމާއި މެދު އެބޭފުޅާއާއި މިނިސްޓަރ އަމީރަށް، ޗައިނާގެ ސަފީރު ޝާންގ އާއި އެކު ރަނގަޅު މަޝްވަރާއެއް ކުރެވިފައިވާކަމަށެވެ. އަދި ކޮވިޑް-19ގެ ބަލިމަޑުކަމުން އަރައިގަނެ ދިވެހިރާއްޖޭގެ އިގްތިސާދު އާރާސްތުކުރުމަށް ކުރަމުންދާ މަސައްކަތުގައާއި އެހެނިހެން ދާއިރާތަކުން ޗައިނާއިން ބޮޑު އެހީތެރިކަމެއް ފޯރުކޮށްދެމުންދާކަމަށް އެބޭފުޅާ ވިދާޅުވިއެވެ.

ފޮރިން މިނިސްޓްރީން މައުލޫމާތުދޭ ގޮތުގައި މި މަޝްވަރާތައް ކުރިއަށްދިޔައީ ފޮރިން މިނިސްޓްރީއާއި ޗައިނާ އެމްބަސީގެ އިސް އޮފިޝަލުންވެސް ހިމެނޭ ގޮތަށް، އިއްޔެގެ މެންދުރު ކުރީގައި މިނިސްޓްރީ އޮފް ފޮރިން އެފެއަރޒްގައެވެ.

ޗައިނާއިން އަކީ ރާއްޖޭގެ އިޤްތިޞާދަށް ބޮޑު އެހީތެރިކަމެއް ފޯރުކޮށްދެމުންދާ ގައުމެކެވެ. އެގޮތުން މި ބަލިމަޑުކަމުގެ ތެރޭގައިވެސް ޗައިނާ ސަރުކާރާއި ކުންފުނިތަކުން ރާއްޖެއަށް ވަރަށް ބޮޑަށް އެހީތެރިކަން ފޯރުކޮށްދީފައިވެއެވެ.