ހެވީމެޓަލް މިއުޒިކަށް ރާއްޖޭގައި ހުއްދަ ދެވިގެންނުވާނެ: ސަލަފްގެ ރައީސް
ހެވީމެޓަލް މިއުޒިކަށް ރާއްޖޭގައި ހުއްދަދެވިގެން ނުވާނެކަމަށް ޖަމްއިއްޔަތުއް ސަލަފްގެ ރައީސް އައްޝައިޚް އަބްދުﷲ ބިން މުހައްމަދު އިބްރާހިމް ވިދާޅުވެއްޖެއެވެ.
ސަލަފްގެ ރައީސް މިފަދައިން ވިދާޅުވެ ޓުވީޓުކުރައްވާފައިމިވަނީ ރާއްޖޭގައި މެޓަލް ބޭންޑުތަކަށް ހިތްވަރުދީ އެފަރާތްތައް ކުރިއެރުވުމަށް މަސައްކަތްކުރާ އިނިޝިއޭޓިވް އެއް ކަމަށްވާ މެޓަލް ވޯސް މޯލްޑިވްސް (އެމްޑަބްލިއުއެމް) އިން ރާއްޖޭގައި ފުރަތަމަ ފަހަރަށް ހެވީ މެޓަލް މުބާރާތެއް ފަށައިގެން ކުރިއަށް ގެންދަމުންދާ ދަނޑިވަޅެއްގައިއެވެ.
މި މުބާރާތާއި ބެހޭގޮތުން ލިޔެފައިވާ ހަބަރު ހިއްސާކުރައްވަމުން ސަލަފްގެ ރައީސް އައްޝައިޚް އަބްދުﷲ ވިދާޅުވިގޮތުގައި ހެވީމެޓަލް މިއުޒިކް ބިނާވެފައިވަނީ ޝައިޠާނާއަށް އަޅުކަންކޮށް،ފާޅުގައި ﷲއަށް އުރެދުމުގެ މައްޗައްކަމަށެވެ.
"ހެވީމެޓަލް މިވައްތަރުގެ މިޔުޒިކް ބިނާވެފައިވަނީ ޝައިޠާނާއަށް އަޅުކަންކޮށް،ފާޅުގައި ﷲއަށް އުރެދި، މަސްތުވާތަކެއްޗާ،ފާޙިޝްކަންކަމަށް ޞަރީޙަ ޢިބާރާތުން ދަޢުވަތު ދިނުގެ ނުބައި ފަސާދައިގެ މައްޗަށެވެ.މިކަންކަމަށް ރާއްޖޭގައި ހުއްދަދެވިގެންނުވާނެ!" އިސްލާމިކް މިނިސްޓްރީގެ ޓުވިޓަރ ޓެގްކުރައްވައި އަބްދުﷲ ވިދާޅުވިއެވެ.
މިހާރު ކުރިއަށް ދާ މުބާރާތަކީ ދިވެހި މެޓަލް ބޭންޑުތައް އުފެއްދުމަށް ހިތްވަރުދީ އަމިއްލަ އަދި އޮރިޖިނަލް ލަވަތައް އުފެއްދުމަށް ބާރުއެޅުމަށް ކުރިއަށް ގެންދާ މުބާރާތެއްކަމަށް މުބާރާތް އިންތިޒާމްކުރާ ފަރާތުން ހާމަކުރައްވާފައިވާއިރު މި މުބާރާތުގެ އެއްވަނަ އިނާމަށް ވަނީ 38،000 ރުފިޔާ ފައިސާގެ އިނާމުގެ ހުށަހަޅާފައެވެ.
Advertisement
This content is created and paid for by advertisers and does not involve Voice Journalists