މޫސުން ގޯސްވެ މިއަދުވެސް ރާއްޖޭގެ އެކި ހިސާބުތަކަށް ވިއްސާރަކުރާނެ: މެޓް
ރާއްޖޭގެ އެކި ސަރަހައްދުތަކަށް މިއަދުވެސް މޫސުން ގޯސްވާނެ ކަމަށް ލަފާކޮށް މޫސުމާ ބެހޭ ޤައުމީ އިދާރާ (މެޓް) އޮފީހުން ބުނެފިއެވެ.
މޯލްޑިވްސް މީޓއޮލޮޖިކަލް ސެންޓަރުން ބުނީ، މިއަދުވެސް ރާއްޖޭގެ އެކި ހިސާބުތަކަށް ވިއްސާރަ ކުރުމާއެކު ގުގުރައި މެދު ރާއްޖެތެރޭގެ ރަށްތަކަށް ބޯކޮށް ވާރޭވެހުމަކީ އެކަށީގެންވާކަމެއް ކަމަށެވެ. މެޓް އޮފީހުން ވަނީ މޫސުން ގޯސްވާނެކަމަށް ލަފާކޮށް ބައެއް ސަރަހައްދުތަކަށް ހުދު ސުމާލުވެސް ނެރެފައެވެ.
މެޓް އޮފީހުން ބުނީ މޫސުން ގޯސްވާ ގަޑިތަކުގައި ވިލާގަނޑުގައި ގަޑިއަކު 40 މޭލަށް ވައިގަދަވާނޭކަމަށް ލަފާކުރެވޭ ކަމަށާއި ޖުމްލަގޮތެއްގައި ކަނޑުތައްވެސް މިއަދު ގަދަވާނޭކަމަށް ލަފާކުރެވޭ ކަމަށެވެ. ކަނޑުތައް ގަދަވާނެކަމަށް ބެލެވޭތީ، މެޓް އޮފީހުން ވަނީ ހުރިހާ ފަރާތްތަކުން، ހާއްސަ ގޮތެއްގައި ކަނޑުދަތުރުކުރާ ފަރާތްތަކުން ދަތުރަށް ފެށުމުގެ ކުރިން މޫސުމާ ބެހޭ އެންމެފަހުގެ މައުލޫމާތު ހޯދުމަށްފަހު ކަނޑު ދަތުރުކުރުމަށް އިލްތިމާސްކޮށްފައެވެ.
މޫސުން ގޯސްވުމުގެ ސަބަބުން މިދިޔަ ބްރާސްފަތި ދުވަހުން ފެށިގެން ކަނޑުމަތީގެ ނުރައްކާތެރި ހާދިސާތަކެއް ވަނީ ހިނގާފައެވެ.
Advertisement
This content is created and paid for by advertisers and does not involve Voice Journalists
